pointer

اعراض السكر

عطش مستمر

pointer

اعراض السكر

زيادة مرات دخول الحمام بهدف التبوّل

pointer

اعراض السكر

الجوع بسرعة على غير العادة

pointer

اعراض السكر

فقدان في الوزن فجأة وبدون سبب واضح

pointer

اعراض السكر

إرهاق مستمر

pointer

اعراض السكر

الرؤية بتكون ضبابية

pointer

اعراض السكر

أي جرح أو قرحة بتاخد وقت أكبر في الشفاء

pointer

اعراض السكر

الالتهابات الجلدية المفاجئة خاصة بين أصابع القدم

اعراض مرض السكر

اعراض مرض السكر الرئيسية اللي مش بتختلف عند النساء من الرجال من الأطفال، هي:

  1. عطش مستمر
  2. زيادة مرات دخول الحمام بهدف التبوّل
  3. الجوع بسرعة
  4. فقدان في الوزن فجأة وبدون سبب واضح
  5. إرهاق مستمر
  6. الرؤية بتكون ضبابية
  7. أي جرح أو قرحة بتاخد وقت أكبر في الشفاء
  8. الالتهابات مفاجأة، زي الالتهابات الجلدية خاصة بين أصابع القدم، وأيضًا انتشار الالتهابات المهبلية عند الإناث.

اسباب مرض السكر

اسباب مرض السكر -النوع الأول-:

  • عوامل وراثية: انتشار التاريخ المرضي بمرض السكر في العائلة.
  • خلل في مناعة الجسم نتيجة الإصابة ببعض الفيروسات والأمراض.

اسباب مرض السكر -النوع الثاني-

  • عدم قدرة البنكرياس على إفراز كمية كافية من الأنسولين.
  • مقاومة خلايا الجسم للتفاعل مع الأنسولين اللي تم إفرازه
  • بعض الجينات الوراثية من  أحد الأبوين.
  • السمنة المفرطة
  • ارتفاع مستوى الدهون الثلاثية بالجسم

اسباب سكر الحمل:

  • عدم التوازن بين مستوى هرمونات المشيمة ومستوى هرمون الأنسولين بالجسم.
  • 90% من الأمهات بيختفي منهن سكر الحمل بعد الولادة.
  • 10% بس ممكن يستمر معاهم مرض السكر بعد الولادة ووقتها هيتصنف أنه مرض السكر من النوع التاني.

علاج مرض السكر

يختلف علاج السكر بالأدوية على حسب انواع مرض السكر، وبيشمل:

علاج السكر من النوع الأول

علاج السكر من النوع الأول بينقسم لشقين:

1- علاج السكر بحقن الأنسولين.

2- مراقبة نسبة السكر في الدم + تسجيلها.

علاج السكر (النوع الثاني):

 علاج السكر من النوع الثاني متقسم ل 4 أقسام:

أولا: تغيير الروتين اليومي.

ثانيًا: ادوية السكر

ثالثًا: حقن الأنسولين

رابعًأ: مراقبة نسبة السكر في الدم

علاج سكر الحمل:

الالتزام ببعض بخطوات علاج سكر الحمل، وهي:

  • التزمي بنظام صحي، يتناسب مع فترة الحمل ومع السكر.
  • مارسي الرياضة المناسبة للحمل، تحت إشراف طبيب النسا والتوليد.
  • لازم تتابعي نسبة السكر في الدم بشكل يومي، علشان التقارير دي هتفرق جداً مع دكتور النسا وقت الولادة.
  • لو كل الحلول دي ملهاش نتيجة واضحة تفرق قبل الولادة، ممكن يلجأ الطبيب المعالج لوصف علاج سكر الحمل بحقن الأنسولين وأدوية السكر المناسبة للحمل.

دوس هنا علشان تعرف علاج السكر بالتفصيل

انفوجرافيك مرض السكر


ايه هو مرض السكر


انواع مرض السكر


اعراض مرض السكر


اسباب مرض السكر


الأكثر عرضة للإصابة بمرض السكر


مضاعفات مرض السكر


متى يجب زيارة الطبيب، وما هي التحاليل المطلوبة؟


علاقة مرض السكر بأمراض أخرى


علاج السكر


كيفية التعايش مع مرض السكر


مفاهيم خاطئة عن مرض السكر


المصادر

ما هو مرض السكر

هو مرض مزمن بيصيب حوالي 9% من البالغين في العالم، وبيحصل لما البنكرياس مبيكونش قادر على إنتاج الأنسولين بكمية كافية، أو لما الجسم ميكونش قادر يستخدم ويستجيب للأنسولين اللي بينتجه.

 يصيب أي جزء في الجسم ودور هذا العضو بالجسم؟

مرض السكر بيحصل بسبب اعتلال في البنكرياس لخلايا بيتا، خلايا بيتا مسؤلة عن افراز 3 هرمونات:
  1- هرمون الأنسولين
المسؤل عن محافظة على مستوى سكر معين في الدم علشان مستوى السكر ميسببش حدوث ضرر لأعضاء الجسم المختلفة
  2- هرمون سي الببتيد – C-peptide
بيتم افرازه بكميات متساوية مع كمية الأنسولين ودوره بيكون مختلف لأن وظيفته الرئيسية المساعدة على منع الإعتلال العصبي ومشاكل الأوعية الدموية، عشان كده مرضى السكر دايمًا عندهم مشاكل في الأعصاب نتيجة نقص هرمون سي-الببتيد C-peptide
  3- هرمون الأميلين Amylin
وظيفة الأميلين مشابهة لوظيفة الأنسولين في الجسم إلا إن هرمون الأميليلن بينظم مستوى السكر في الدم على المدى القصير يعني أول كام ساعة من بداية الأكل، أمَا هرمون الأنسولين بينظم مستوى السكر في الدم على مدار اليوم كله وأثناء الصيام.

نتيجة إصابة الجسم بمرض السكر:

اعتلال خلايا بيتا بالبنكرياس بيؤدي إلى نقص هرمون الأنسولين في الدم وخلايا الجسم و نقص هرمون سي-الببتيد وبالتالي بينتج عن كدا زيادة نسبة الجلوكوز في الدم والخلايا ومشاكل في الأعصاب و الأوعية الدموية الصغيرة زي اللي موجودة بالعين.

 انواع مرض السكر

سكر الحمل

سكر الحمل، المرأة بتُصاب بالنوع دا من مرض السكر خلال فترة الحمل فقط؛ بيحصل لحوالي 6% من الحوامل وممكن يختفي لوحده بعد الولادة عند 90% من الحوامل، و 10% بس بتفضل الأم تعاني من مرض السكر حتى بعد الولادة؛ طبقًا المعهد الوطني للسكري وأمراض الجهاز الهضمي والكلى بالولايات المتحدة.

النوع ده بردو الأكثر انتشاراً عند بعض النساء زي:

  • من أصول أمريكية لاتينية
  • أصول هندية
  • أصول الأفرو * أصول أمريكية
  • معظم النساء اللي تاريخهم العائلي فيه مرضى سكر

علاج سكر الحمل بيتم تحديده بالمتابعة مع دكتور مختص في أمراض الباطنة بجانب المتابعة مع دكتور النساء والولادة، وعلى حسب نتيجة تحليل سكر الحمل وشدة خطورة المرض بيقدر الطبيب يحدد أفضل علاج للأم.

سكر البالغين

اعراض مرض السكر أو كما يُسمى سكر النمط الثاني أو سكر البالغين بتظهر في أي عمر خاصًة في سن من 35 ل 40 سنة أو أكبر وبيمثل حوالي 80% من مرضى السكر.

النوع ده ممكن بيحصل بسبب وراثي أو بسبب عادات الأكل الخاطئة والسمنة المفرطة؛ لكن العملية دي بتكون بطيئة جدا، وبتستمر بعشرات السنين.

ولو فيه شخص عنده هبوط أو انخفاض في إفراز الأنسولين لكن لياقته البدنية جيدة ووزنه صحي، هتكون احتمالية إصابته بمرض السكر بتكون قليلة جدًا؛ أما لو كان الشخص وزنه مش صحي ولا يمارس أي نوع من أنواع  النشاط البدني، فإحتمالية إصابته بمرض السكر بتكون أكبر بكتير.

معظم علاج السكر من النوع الثاني بيكون عن طريق  ادوية السكر على هيئة اقراص، مع تظبيط الأكل و نظام غذائي لمرضى السكر، وبيكون الاعتماد على حقن الأنسولين أقل.

سكر صغار السن

اعراض مرض السكر من النوع الاول بتظهر في صغار السن خاصًة الأطفال وغالبًا بيكون غير شائع الحدوث لأنه بيمثل 10% بس من مرضى السكر.

والسبب في ظهوره مشاكل جينية أو عوامل بيئية زي الأمراض الفيروسية بيتسببوا في تدمير خلايا بيتا المنتجة للأنسولين، بالإضافة أن الجهاز المناعي اللي هدفه الاساسي انه يحمي الجسم من أي عدوى خارجية ويقتل البكتيريا، بيحصل خلل في وظيفته و بيقوم بإتلاف خلايا بيتا في البنكرياس

عملية الإتلاف دي بتحصل بسرعة أكتر عند الأطفال؛ وبتفضل عملية الإتلاف دي شغالة لمدة طويلة، بتبدأ بأسبوع وتنتهي بسنين؛ لكن النوع ده تحديداً بيظهر غالباً في سن الطفولة وسن المراهقة.

وعلاج السكر من النوع الأول بيكون معتمد بشكل أساسي على حقن الأنسولين مع نظام غذائي خاص مدى الحياة منذ الصغر.

اعراض مرض السكر

غالبًا مفيش فرق بين اعراض مرض السكر باختلاف انواعه، لكن الفرق بيكون في سرعة ظهور الأعراض دي، وبيتم ملاحظة أن اعراض مرض السكر من النوع الأول أو سكر الصغار بتظهر أسرع من اعراض مرض السكر النوع التاني لدرجة أنها ممكن تظهر خلال أسابيع قليلة من ولادة الطفل، أما اعراض مرض السكر النوع التاني أو سكر البالغين -في أغلب الأحيان- مش بتظهر على الشخص إلا بعد سنين طويلة من الإصابة بالمرض وفي حالات كتير من حالات مرضى السكر من النوع التاني مش بيكتشفوا الإصابة بمرض السكر إلا بسبب ملاحظة المشاكل الصحية المصاحبة لمرض السكر زي مشاكل في الرؤية.

صعوبة شفاء القرح والجروح

ارهاق مستمر من أقل مجهود

الجوع بسرعة على غير العادة

العطش المستمر

التهابات مفاجئة خاصة بين أصابع القدم

الرؤوية المشوشة أو الضبابية

فقدان في الوزن فجأة بدون سبب واضح

زيادة مرات دخول الحمام بهدف التبوّل

اعراض مرض السكر الخاصة بالنساء

  • عدوى الجهاز البولي (التهاب المسالك البولية Urinary tract infection): هذه الالتهابات منتشرة بشكل عام بين النساء ولكنها منتشرة بكثرة عند النساء المصابين بمرض السكر مقارنة بالرجال؛ فحوالي 12.9% من الإناث المصابات بمرض السكر بتظهر عليهم أعراض عدوى والتهابات الجهاز البولي، أما 3.9% فقط من الرجال بيصابوا بالنوع دا من الالتهابات بسبب مرض السكر.

    اعراض الالتهابات دي بتشمل:
    1. ألم شديد والإحساس بحرقة أثناء التبول.
    2. تعكر البول
    3. ملاحظة قطرات دم في البول.
  • ضعف الرغبة الجنسية: انتشار عدوى والتهاب الجهاز البولي خاصة بالفطريات من نوع المبيضات ممكن يسبب انخفاض الرغبة الجنسية عند النساء.
    وبسبب زيادة نسبة السكر في الدم بيحصل تلف لبعض الألياف العصبية وده يسمى (خلل الأعصاب السكرية Diabetic neuropathy) اللي بينتج عنه ضعف الإحساس في اليد والقدم والمهبل.

كل دا بيسبب ظهور بعض الأعراض للنساء زي:
1. قلة السوائل المهبلية و ألم شديد أثناء الجماع.
2. صعوبة الإثارة الجنسية.
3. الرغبة الشديدة في الحكة بسبب الفطريات.
4. القلق والاكتئاب.

ملحوظة: الفطريات من النوع (المبيضات Candida) بتصيب الفم والمهبل، علشان كدا ممكن يظهر بعض الإفرازات البيضاء غير المستحبة على اللسان عند النساء المصابات بمرض السكر.

اسباب مرض السكر

اسباب سكر الحمل

مع بداية الحمل بتبدأ المشيمة تفرز هرمونات علشان تحافظ على الحمل و تمد الجنين بالغذاء اللي يحتاجه زي هرمون محفز الالبان البشري المشيمي؛ لكن الهرمونات دي أحيانا بتزود من مقاومة خلايا الجسم للأنسولين وبتساعد في زيادة نسبة الجلوكوز في الدم وإمداد الحنين بالغذاء اللي يحتاجه.

وعلى الناحية التانية هتلاقي ان البنكرياس بيحاول يفرز كميات أكبر من الأنسولين علشان يعادل المقاومة اللي بتحصل بسبب هرمونات المشيمة، لكن أحياناً البنكرياس مش بيكون قادر يفرز الكمية المناسبة اللي تتغلب على نسبة هرمونات المشيمة وتفضل نسبة الجلوكوز تعلى في الدم لحد ما تسبب سكر الحمل

لازم الأم تنتبه لعمل تحليل سكر الحمل اللي بيوصي بيه دكتور  النساء خصوصًا بعد الاسبوع ال 20 لأن عدم علاج سكر الحمل بيؤدي إلى مضاعفات خطيرة اثناء الولادة وبعد الولادة، لأن سكر الحمل -لو لم يتم علاجه- بيزيد من خطر إصابة الأم بمرض السكر من النوع الثاني بعد الولادة؛ واثبت الدراسات أن التي تلد طفلا يزيد وزنه عن 4 كجم فانها تكون اكثر عرضة عن غيرها من الأمهات للاصابة بمرض السكر من النوع الثاني.  

لكن مفيش داعي للقلق لأن 90% من الأمهات بيختفي منهن سكر الحمل بعد الولادة و10% بس ممكن يستمر معاهم مرض السكر بعد الولادة.

اسباب مرض السكر - سكر البالغين

السبب الرئيسي لظهور اعراض مرض السكر من النوع الثاني هو عدم إفراز خلايا بيتا بالبنكرياس لكمية كافية من الأنسولين علشان تواجه كمية الجلوكوز اللي بيتناولها الشخص بكثرة، أو بسبب إفراز كمية مناسبة من الأنسولين لكن خلايا الجسم مش بتستجيب للأنسولين بالدرجة الكافية اللي تسمح بعدم تراكم الجلوكوز في الدم.

السببين دول بيحصلوا نتيجة بعض العوامل زي:

  • الجينات الوراثية: ممكن تتوارث الجينات المسببة للمرض بين أجيال العائلة الواحدة وبالتالي بتزيد احتمالية الإصابة بالمرض خاصةً لو القرايب من الدرجة الأولى مصابون المرض.
  • السمنة: زيادة الوزن بتأثر  على الجسم وتسبب الإصابة بالنوع التاني من مرض السكر، وذلك بسبب ان زيادة الدهون بالجسم بتزيد من قوة مقاومة الخلايا لهرمون الأنسولين اللي بيتفرز من البنكرياس، وتراكم الدهون بالبطن بتزيد من احتمالية الإصابة بالنوع التاني من مرض السكر عن أي مكان تاني بالجسم –طبقًا للمعهد الوطني للسكري وأمراض الجهاز الهضمي والكلى بالولايات المتحدة-.
  • الاصابة ببعض الامراض المزمنة زي ضغط الدم المرتفع.
  • سكر الحمل لو لم يتم علاجه بتصبح الأم مريضة بالسكر من النوع الثاني بعد الولادة

اسباب مرض السكر - صغار السن

السبب العلمي وراء ظهور اعراض مرض السكر من النوع الأول هو أن الجهاز المناعي بيحارب أي بكتيريا ضارة كالعادة، والخلل اللي بيؤدي لمرض السكر بيحصل لما الجهاز المناعي بيهاجم الخلايا المنتجة للأنسولين الموجودة في البنكرياس لحد لما يسبب إتلافها

وبالتالي الجسم مش بيكون فيه نسبة الأنسولين الكافية، و السكر اللي كان المفروض يروح للخلايا دي؛ حصله تراكم في مجرى الدم، لأن الخلايا تم إتلافها بواسطة الجهاز المناعي.

وحتى الآن العلم لسه موصلش للسبب الدقيق اللي بيسبب ظهور النوع الأول من مرض السكر، لكن أجمع العلماء أن في بعض العوامل ممكن تسبب المرض:

  • عوامل وراثية: انتشار التاريخ المرضي بمرض السكر في العائلة.
  • 6% هي احتمالية إصابة الفرد بمرض السكر من النوع الأول نتيجة إصابة أحد الأقارب زي الأم والأب والأخ والأخت.
    و 0.5% هي احتمالية إصابة الفرد بالنوع الأول من مرض السكر لو مفيش حد من أقاربه مصاب بمرض السكر من النوع الأول.
  • الإصابة ببعض الفيروسات نتيجة البيئة المحيطة، واللي ممكن تسبب خلل في أساليب دفاع الجهاز المناعي عن الجسم.

الأكثر عرضة للإصابة بمرض السكر

من حيث السن والأمراض المزمنة:

  • بيزيد خطر الاصابة بمرض السكر من النوع التاني في سن 45 سنة أو أكثر.
  • ارتفاع ضغط الدم (High blood pressure): المصابون بامرض ارتفاع ضغط الدم بيزيد ليهم نسبة الاصابة بالنوع التاني من مرض السكر.
  • ارتفاع نسبة الدهون الثلاثية بالدم والكولسترول الضار بتزيد من امكانية الاصابة بمرض السكر من النوع الثاني، حيث أن النسبة الطبيعية للكولسترول الكلي بالدم هي 200 مليجرام/ديسيلتر ، وتعتبر النسبة خطرة على صحة الانسان لو زادت عن 240 مليجرام/ديسيلتر للبالغين.
  • تكيس المبيض: وهو مرض ممكن يصيب الإناث بعد البلوغ بسبب اضطراب الهرمونات بالجسم، وبينتج عنه زيادة ملحوظة في نمو الشعر وزيادة الوزن ايضا والاصابة بالنوع الثاني من مرض السكر.

من حيث الجنس:

  • إن النساء اكثر عرضة للاصابة بهذا المرض بسبب تغيرات الهرمونات للحوامل.

من حيث الوزن

  • كتلة الجسم لو أكبر من 25 دا معناه بداية السمنة واحتمالية الإصابة بمرض السكر بتزيد.
  • لحساب كتلة الجسم= وزن الجسم بالكيلوجرام/  2*طول الجسم بالمتر
  • تقدر تستخدم الطريقة دي في حساب كتلة الجسم في حال لو سنك من 18 ل 65 سنة وغير مواظب على رياضة بناء الكتلة العضلية، ولو مش حامل أو مرضعة.

مضاعفات مرض السكر

مريض السكر لازم يتبع نظامه العلاجي ونظامه في الأكل الصحي طبقًا ارشادات الدكتور المعالج علشان يضبط معدل السكر في الجسم، وعلشان يتجنب إحدى مضاعفات السكر التالية:

ارتفاع ضغط الدم

  •  من اكتر المضاعفات اللي بتحصل لمريض السكر هي ارتفاع ضغط الدم وده بيكون له مضاعفات اكبر زي الإصابة بالنوبة القلبية Heart attack او السكتة الدماغية Strock  او أمراض الكلى Kidney diseases .
  • ضغط الدم المرتفع بيكون أعلى من 140/90 ودا بيلزم المريض بتناول أدوية الضغط بأستمرار واتباع نظام أكل صحي يجنبه مخاطر مضاعفات ارتفاع ضغط الدم.

امراض القلب والأوعية الدموية

مرض السكر بيزود خطورة الإصابة بأمراض القلب والأوعية الدموية، زي:

  • مشاكل الشريان التاجي وألم الصدر اللي بينتج عنهم الإصابة بمرض الذبحة الصدرية
  • زيادة احتمالية الإصابة بالنوبة القلبية والسكتة الدماغية نتيجة تصلب الشرايين، خصوصًا في حال ارتفاع ضغط الدم وزيادة نسبة الكوليسترول لدى مريض السكر.
  • احتمالية اصابة مريض السكر بالسكتة الدماغية أعلى ب 1.5 عن الشخص غير المصاب بالسكر.
  • بتزيد احتمالية اصابة مريض السكر بالأمراض دي خصوصًا لو عمره أكبر من 55 سنة، في حالة المعاناة من السمنة، أو التدخين.

مضاعفات على العين

مرضى السكر من النوع الأول والثاني بيكونوا عرضًة للإصابة بمخاطر مضاعفات العين واعتلال وخلل في الأعصاب المحيطة بالعين، ومن ضمن مضاعفات مرض السكر على العين:

  • تكوين مياه زرقاء على العين Glaucoma: وكلمّا زاد سن مريض السكر كلمّا زادت خطورة الإصابة بالمياه الزرقاء على العين، والسبب الرئيسي في الإصابة بالمياه الزرقاء على العين هو ارتفاع ضغط الدم في الأوعية الدموية الصغيرة اللي بتنقل الدم إلى شبكية العين والعصب البصري.
  • إعتام عدسة العين، ودي حالة مرضية ممكن تصيب بعض الناس غير مصابي السكر لكن مرض السكر بيزيد من خطورة الإصابة بإعتام عدسة العين خصوصًا في سن صغير، ودا اللي بيسبب ضبابية وانعدام رؤية جزئي لمرضى السكر وبيزيد من احتياجهم لارتداء نظارة طبية معظم الوقت.
  •  وفي الحالات الشديدة بيسبب تلف الأوعية الدموية في شبكية العين وهي حالة طبية مشهور بأسم اعتلال الشبكية السكري Diabetic Retinopathy اللي ممكن تؤدي إلى العمى في الحالات المتأخرة.

اعتلال الأعصاب

حوالي 50% من مرضى السكر بيعانوا من تلف الأعصاب وبيشتكوا من مشاكل الأعصاب وأعراضها زي تنميل اليد والقدم بكثرة ومشاكل السمع نتيجة إصابة أعصاب الأذن، لكن مشاكل الأعصاب دي بتظهر بعد سنين مش كتير من اكتشاف المرضى اصابتهم بمرض السكر ومش بتظهر فجأة علشان كدا معظم مشاكل الأعصاب مش بيتم علاجها في مراحلها الأولى.

وتم تسجيل شكاوى عصبية مختلفة لبعض المرضى، بتمشل:

  • اعتلال العصب الأحادي و اللي بيحصل بسبب تلف في عصب معين بالوجه أو الجذع أو الساق، وبينتج عنه ألم في الصدر والبطن والجزء الأمامي من الفخذ، ولو أصاب التلف عصب العين بينتج عنه ازدواجية الرؤية واحتمالية شعور المريض بألم خلف عين واحدة.
  • الضمور العضلي اللي بيصيب كتير من مرضى السكر -بالأخص من النوع الثاني- ممكن يسبب اعتلال العصبي الفخذي واللي بينتج عنه صعوبة في القيام من وضعية الجلوس و وألم شديد ومفاجئ في الفخذ والأرداف أكتر من مرة في اليوم.
  • اعتلال الجهاز العصبي المستقل اللي بينتج عنه مشاكل في القلب والمعدة والمثانة والمسؤول بشكل كبير عن شكوى مرضى السكر بحالات الضعف الجنسي.
  • اعتلال الأعصاب السطحي اللي بتزيد أعراضه بالليل زي تنميل الأطراف، فقد القدرة على ردود الأفعال خصوصًا في الكاحل.
  • وبعض النظريات محل الدراسة بترجح أن ارتفاع مستويات السكر بالدم ومشاكل الأعصاب ممكن تسبب في ارتفاع احتمالية الإصابة بمرض الزهايمر.

القدم السكري

القدم السكري بتحصل لحوالي 15% ل 25% من مرضى السكر لبعض الأسباب زي:

  • التهاب الاعصاب في الأطراف اللي بينتج عنه فقد احساس المريض بالمناطق دي.
  • مشاكل بالشرايين المغذية للأطراف بتقلل من تدفق الدم للقدم.
  • العدوى البكتيرية والفطريات اللي بتسبب تقرحات القدم خاصة بين الأصابع.


في بعض العوامل بتزيد من احتمالية الإصابة بالقدم السكري زي:

  • ارتداء أنواع رديئة من الأحذية تسبب تقرح القدم.
  • عدم الأهتمام بالنظافة الشخصية خصوصًا غسل القدم وبين الأصابع بأستمرار، وتجفيفها جيدًا بعد الانتهاء.
  • إدمان الكحول.
  • إدمان التدخين لأنه بيسبب مشاكل الشرايين اللي بينتج عنها تقليل تدفق الدم لأعضاء الجسم المختلفة.
  • أمراض السمنة، وأمراض القلب وأمراض الكلى.

وبيتمثل علاج القدم السكري في الأهتمام بالنظافة الشخصية وصحة القدم وضبط مستويات السكر بالدم عن طريق الأكل الصحي وتناول بعض الأدوية اللي هيوصفها الدكتور المعالج حسب الحالة، وفي الحالات المتأخرة ممكن يلجأ الدكتور المعالج للحل الجراحي لعلاج القدم السكري.

امراض الجلد

من أسرع  علامات وأعراض مرض السكر اللي بتظهر على المريض هي أمراض الجلد اللي بتختلف في شدتها على حسب شدة المرض، زي:

  • صعوبة التئام الجروح بسبب مشاكل بالجلد ومشاكل الأوعية الدموية الشرايين.
  • ارتفاع خطورة الإصابة بالعدوى البكتيرية في الجلد اللي بتسبب التهابات غدد جفن العين، التهاب بصيلات الشعر، الدمامل بمناطق مختلفة من الجسم، عدوى والتهابات الأظافر والجلد المحيط بها.
  • ارتفاع خطورة الإصابة بأنواع مختلفة من عدوى الفطريات اللي بتسبب ظهور طفح جلدي في مناطق مختلفة من الجسم خصوصًا المناطق الرطبة زي الثديين، حول الأظافر، بين أصابع اليد والقدم، زوايا الفم، الإبطين، والفخذ.
  • العدوى البكتيرية والفطريات بيسببوا زيادة الشعور بالحكة في الجلد وانتفاخ وتورم وتهيج الأجزاء المصابة واحمرارها.
  • احتمالية الإصابة بمرض زيادة تصبغ الجلد وظهور بقع لونها أسود أو بُني خصوصًا في الرقبة والإبطين والفخذ، وأحيانًا ممكن تظهر في اليد والكوع والركبة؛ والمرض دا شائع الحدوث مع مرضى السكر اللي بيعانوا من السمنة وبيتم علاجه ببعض الكريمات وملطفات الجلد حسب ارشادات الطبيب المعالج.
  • احتمالية الإصابة بمرض اعتلال الجلد السكري واللي بسببها بيلاحظ المريض قشرة لونها أبيض أو بُني بتظهر بالأخص في الجزء الأمامي من الساقين؛ وغالبًا الحالة دي مش بتحتاج علاج لأنها مش خطيرة ومش بتسبب أي ألم أو الشعور بالحكة للمريض.
  • احتمالية الإصابة بمرض تقرح الجلد في أماكن عديدة من الجسم، وهي حالة نادرة بتصيب حوالي 0.3% من مرضى السكر وبالأخص النساء، وبتظهر التقرحات دي على هيئة مناطق باهتة بالجلد لونها أحمر بتتحول لشكل ندبات لونها بنفسجي لامع، ومن شدة المرض ممكن تظهر بوضوح الأوعية الدموية اللي تحت الجلد بالمنطقة المصابة.
  • الإصابة بحساسية الجلد نتيجة تعاطي أدوية السكر زي حقن الأنسولين، ولازم يتم التوجه للدكتور المعالج فورًأ إذا نتج عن الحساسية دي أي طفح جلدي بيتسبب في ألم للمريض.
  • الإصابة بمرض بثور مرضى السكري وهي حالة نادرة بينتج عنها ظهور بثور على أصابع اليدين والقدمين، وبتظهر أكتر مع المصابين باعتلال الأعصاب السكري وممكن تكون كبيرة لكنها غير مؤلمة ومفيش ليها علاج غير ضبط مستويات السكر بالدم وبتختفي خلال 3 أسابيع بالكتير بعد ضبط مستوى السكر.
  • في بعض الأحيان ممكن يشعر مريض السكر بأن بشرته سميكة وليها ملمس شمعي خصوصًأ بشرة اليد.

غيبوبة السكر

غيبوبة السكر ممكن تحصل بسبب ارتفاع أو انخفاض مستوى السكر في الدم بسبب اختلال التوازن بين نسبة الأنسولين والجلوكوز في الجسم، وغيبوبة السكر من الحالات الطارئة اللي لازم يتم علاجها فورًا وإلا هينتج عنها إصابة المريض بتلف الدماغ الدائم والوفاة.

أسباب غيبوبة السكر:

  • ارتفاع نسبة احماض في الجسم اسمها الكيتونات واللي بينتجها الجسم نتيجة تكسير الدهون في العضلات وقت احتياج الطاقة، وبسبب ارتفاع أحماض الكيتونات في الدم والبول مع ارتفاع نسبة السكر في الدم بيحصل غيبوبة السكر، والحالة دي بتكون منتشرة أكتر في مرض السكر من النوع الأول، لكنها ممكن تحصل بنسبة أقل مع مرضى السكر من النوع الثاني وفي سكر الحمل.
  • ارتفاع شديد في مستوى السكر بالدم لحوالي 600 ملليغرام لكل ديسيلتر، عدم علاج الارتفاع الشديد دا في نسبة السكر هو المسؤول عن حدوث غيبوبة السكر لحوالي من 25 ل 50% من مرضى السكر.
  • نقص مستوى السكر في الدم بيحصل بسبب نقص في تناول المريض للكمية المناسبة اللي محتاجها جسمه من الطعام أو بسبب أخذ جرعة كبيرة من الأنسولين أو الإفراط في ممارسة التمارين الرياضية لحد الإغماء.

أعراض غيبوبة السكر:

 

اعراض انخفاض السكر اعراض ارتفاع السكر
صعوبة في النطق. رائحة الفم والنفس بتشبه رائحة الفاكهة.
الجوع الشديد والغثيان الغثيان والقيء مع ضيق بالتنفس.
عصبية وقلق مع زيادة إفراز الجسم للعرق. زيادة سرعة ضربات القلب.
دوخة شديدة والإحساس بالتشويش. العطش الشديد مع زيادة الرغبة في التبول.
رعشة بالجسم. جفاف شديد بالفم.
ارهاق وضعف عام بالجسم. ألم شديد بالمعدة

 

الوقاية من غيبوبة السكر:

  • عدم إهمال نظام الأكل الصحي حسب ارشادات الدكتور المعالج.
  • عدم الإفراط في ممارسة الأنشطة الرياضية إلا بخطة مسبقة مع الدكتور المعالج.
  • الحرص على تناول أدوية السكر بانتظام في مواعيدها.
  • تابع مستوى السكر باستمرار ولو النسبة زادت عن 250 ملليغرام لكل ديسيلتر في أكتر من تحليلين في أوقات مختلفة من اليوم، لازم تتوجه للدكتور فورًا علشان تضبط ارتفاع مستوى السكر في الدم وتتجنب غيبوبة السكر.
  • لو حسيت بأي من اعراض غيبوبة السكر السابقة لازم تتوجه للدكتور فورًا وتعمل تحاليل الكيتونات بالدم والبول.
  • لو حسيت بأحد اعراض انخفاض السكر في الدم لازم تتناول كمية قليلة من السكر مقدار نصف معلقة شاي وتطلب المساعدة من المحيطين بيك للتوجه للمستشفى.
  • امتنع عن شرب الكحوليات.

امتى لازم تزور الطبيب

يجب زيارة طبيب أمراض باطنة لضبط مستوى السكر بالدم لو ظهر على المريض أي من اعراض مرض السكر، أو المتابعة مع الطبيب المختص مرة كل  3 أو 6 شهور على الأقل للأطمئنان على الحالة الصحية لو في تاريخ عائلي بمرض السكر حتى لو لم تظهر اعراض مرض السكر على الشخص.

تحاليل السكر لتأكيد التشخيص

في الزيارة الأولى للطبيب هيطلب من المريض بعض فحوصات وتحاليل الدم اللي من خلالها بيتم تشخيص درجة خطورة مرض السكر ونوعه؛ ومنها

تحليل عشوائي لمستوى السكر في الدم

تحليل السكر العشوائي لا يستلزم الصيام قبله وبيكون إشارة لأحتمالية إصابة المريض بمرض السكر بالفعل، لو زادت النسبة عن الطبيعي هيطلب الطبيب المعالج عمل تحليل مستوى السكر في الدم يستلزم الصيام قبله بحوالي 8 ل 12 ساعة.

مستوى السكر بالدم درجة الخطورة
80 ل 140 مليجرام/ديسيلتر الطبيعي
140 ل 200 مليجرام/ديسيلتر بداية الإصابة بمرض السكر
أكبر من 200 مليجرام/ديسيلتر تأكيد الإصابة بمرض السكر

ملحوظة:

  • هذه الأرقام بتوضح احتمالية الإصابة بمرض السكر من خلال تحليل السكر العشوائي للبالغين.
  • يُفضل عمل تحليل السكر العشوائي بعد تناول وجبتك الأساسية بساعة على الأقل، علشان تحصل على نتائج أقرب للحقيقة.
  • في حالة تناول أي ادوية مثل أدوية الكورتيزون وأدوية الصرع والتشنجات يًرجي ابلاغ الطبيب.
  • تحليل السكر العشوائي ممكن تعمله في الصيدلية أو بجهاز قياس السكر المنزلي لو حسيت بأي من اعراض مرض السكر، لكن لازم تتوجه للطبيب فورًا في حال كانت النسبة أكبر من 160 مليجرام/ديسيلتر لأكتر من مرتين على مدار اليوم.

تحليل مستوى السكر في الدم-صائم-

تحليل مستوى السكر للصائم عن الأكل والشرب لمدة لا تقل عن 8 ساعات يُعتبر فحص أدق لتشخيص الإصابة بمرض السكر، وبتكون النسب كالآتي:

مستوى السكر بالدم درجة الخطورة
80 ل 100 مليجرام/ديسيلتر الطبيعي
100 ل 125 مليجرام/ديسيلتر بداية الإصابة بمرض السكر
أعلى من 126 مليجرام/ديسيلتر تأكيد الإصابة بمرض السكر

تحليل سكر الحمل

في تحليل سكر الحمل بأختبار تحليل تحمل الجلوكوز بيكون من الأفضل قياس مستويات السكر في الدم على مدار 3 ساعات بعد تناول الماء المحلى.

وتحليل تحمل الجلوكوز بيعتمد على قياس نسبة السكر في الدم للمريض مرتين في نفس اليوم، المرة الأولى بعد صيام المريض عن الأكل والشرب لمدة لا تقل عن 8 ساعات، والمرة التانية بعدها على طول بساعتين بعد تناول المريض كوب مايه (237 ملليمتر) و دايب فيه 75 جرام من السكر.

مستوى السكر الطبيعي للحامل حالة الحامل بمراحل التحليل حسب عدد الساعات
95 مليجرام/ديسيلتر حالة الصيام – 8 ساعات على الأقل-
180 مليجرام/ديسيلتر بعد شرب الماء المحلى بساعة
155 مليجرام/ديسيلتر بعد شرب الماء المحلى بساعتين
140 مليجرام/ديسيلتر بعد شرب الماء المحلى ب 3 ساعات

الكشف المبدئي في الزيارة الأولى للطبيب

في الكشف المبدئي لمريض السكر، بيشخص الطبيب نوع مرض السكر من خلال بعض عوامل الخطر اللي بيلاحظها الطبيب على المريض، فمثلًا:

تشخيص مبدئي للنوع الأول من مرض السكر

  • بيشك الطبيب في الإصابة بالنوع الأول من مرض السكر لو ظهرت الأعراض على الأطفال، أو كان سن المريض أصغر من 16 سنة.
  • الأطباء والخبراء بينصحوا بالمتابعة مع دكتور مختص وعمل تحاليل سكر دورية في سن الأطفال بين 10 ل 18 سنة لو بيعانوا من السمنة وزيادة الوزن أو وجود تاريخ عائلي بيأكد وجود عوامل خطر الإصابة بمرض السكر.
  • لو الأم كانت بتعاني من سكر الحمل، هيزيد احتمالية إصابة الطفل بالنوع الأول من مرض السكر.
  • بعد الولادة، لو وزن المولود أقل من الطبيعي (2500 جرام إلى 4000 جرام)، هتزيد احتمالية إصابة الطفل بمرض السكر.
  • طلب بعض تحاليل من المريض.

تشخيص مبدئي للنوع الثاني من مرض السكر

  • بيشك الطبيب في الإصابة بالنوع الثاني من مرض السكر لو ظهرت الأعراض على البالغين وتحديدًا لو السن من 19 ل 44 وبيعانوا من السمنة.
  • السن أكبر من 45 سنة بيكون عرضًة للإصابة بالنوع التاني من مرض السكر خصوصًا مع وجود تاريخ عائلي بالمرض.
  • الأم في حالة الإصابة بمرض سكر الحمل سابقًا بتكون عرضة للإصابة بالنوع التاني من مرض السكر.
  • طلب بعض التحاليل من المريض.

تشخيص مبدئي لسكر الحمل

  • كل الحوامل لازم يخضعوا لمتابعة مستمرة لمستويات السكر بالدم، علشان كدا دكتور النساء اللي بتتابع معاه الحامل بيطلب منها تحاليل السكر كل فترة للاطمئنان على صحة الأم والجنين.
  • من الأسبوع ال 24 ل الاسبوع 28 بيشك الدكتور في احتمالية إصابة الأم بسكر الحمل لو ظهر عليها أي من أعراض سكر الحمل.
  • تأكيد التشخيص من خلال بعض التحاليل الطبية.

تحليل السكر التراكمي

اختبار الهيموجلوبين السكري أو المعروف في المعمل بأسم تحليل السكر التراكمي HbA1c، هو نوع من انواع تحاليل السكر اللي بيقيس مستوى ارتباط الهيموجلوبين بالسكر على مدار ال 3 شهور السابقة من تاريخ التحليل ومش بيستلزم الصيام قبل إجراءه؛ وبيتم اعتبار التحليل دا من أدق تحاليل السكر اللي بيطلبها معظم الدكاترة من المرضى سواء في بداية تشخيص المرض أو في مرحلة المتابعة، لتحديد مستوى خطورة إصابة المريض بالسكر خصوصًا من النوع الثاني

 

النسبة المئوية للهيموجلوبين السكري درجة الخطورة
أقل من 5.7% الطبيعي
من 5.7% ل 6.4% بداية التشخيص بمرض السكر
6.5% أو اعلى تأكيد الإصابة بمرض السكر

عادة التحليل دا بتكون نتيجته بالنسبة المئوية لمستوى الربط بين السكر والهيموجلوبين، وكل ما زاد مستوى السكر في الدم كل ما هتزيد النسبة المئوية دي، على سبيل المثال:

مستوى السكر بالدم النسبة المئوية لتحليل A1C
126 مليجرام/ديسيلتر 6%
154 مليجرام/ديسيلتر 7%
183 مليجرام/ديسيلتر 8%
212 مليجرام/ديسيلتر 9%
240 مليجرام/ديسيلتر 10%
269 مليجرام/ديسيلتر 11%
298 مليجرام/ديسيلتر 12%

ملحوظة: نتيجة التحليل دا بتعبر عن مستوى السكر خلال 3 شهور سابقة من تاريخ التحليل، وعادًة الطبيب المعالج بيكون محدد هدف لنسبة معينة يوصلها المريض في نتائج التحليل دا نتيجة اتباع المريض لخطة علاج مرض السكر المناسبة لحالته.

عوامل تؤثر على نتيجة تحليل السكر التراكمي
  • لو المريض بيعاني من حالة نزيف حاد أو نزيف مزمن بيأثر على نسبة الهيموجلوبين في الدم، ودا ممكن يسبب انخفاض خاطيء ونتيجة غير صحيحة في نتائج التحليل.
  • لو المريض بيعاني من مرض فقر الدم الناتج عن نقص الحديد المشهور بأسم انيميا نقص الحديد، دا ممكن يسبب ارتفاع خاطيء في نسبة ارتباط السكر بالهيموجلوبين وبالتالي نتيجة تحاليل غير صحيحة.
  • لو المريض بيعاني من نوع مختلف من الأنيميا زي أنيميا تحلل الدم والأنيميا المنجلية أو فقر الدم المنجلي، أو خضع لعملية نقل دم خلال آخر 3 شهور قبل تحليل الهيموجلوبين السكري، دا ممكن يسبب انخفاض خاطيء في نتيجة التحليل.
  • لو في حالة نادرة موجودة في 2 ل 3% بس من سكان العالم اسمها “الهيموجلوبين المتغير” وغالبًا بتصيب الأشخاص أصحاب البشرة السوداء وأشخاص من منطقة البحر المتوسط أو جنوب شرق آسيا؛ حالة الهيموجلوبين المتغير بتسبب ارتفاع أو انخفاض في نسبة ارتباط السكر بالهيموجلوبين بدم المريض، وعلشان يحصل المريض على نتيجة دقيقة لتحاليل السكر لازم يتوجه لمعامل متخصصة في تحاليل الحالات النادرة.

علاقة مرض السكر بأمراض الأخرى

أمراض الاضطراب الهرموني

  • الإصابة بمتلازمة كوشينج أو متلازمة فرط كورتيزول الدم نتيجة اعتلال في إفراز هرمونات الغدة الكظرية، فـ ارتفاع مستوى الكورتيزول في الدم بيقلل من مستوى الأنسولين في الدم وبالتلي إصابة المريض بالسكر.

ملحوظة: مستوى الكورتيزول بيزيد في الجسم نتيجة الضغط والقلق النفسي والعصبية علشان كدا ممكن يتم تشخيص أولي خاطيء أن الشخص مريض بالسكر لو تم عمل تحليل سكر في فترة القلق اللي بيمر بيها الشخص.

  • الإصابة بمتلازمة العملقة أو متلازمة تضخم الأطراف نتيجة اعتلال في الغدة النخامية و زيادة في هرمون النمو، ودا بينتج عنه نقص في مستوى هرمون الأنسولين وإصابة مريض المتلازمة بمرض السكر.
  • فرط نشاط الغدة الدرقية و زيادة إفراز هرمونات الغدة الدرقية بيسبب نقص في إفراز هرمون الأنسولين وبالتالي إصابة المريض بمرض السكر.

امراض البنكرياس

جميع أمراض البنكرياس بتسبب خلل في إفراز هرمون الأنسولين وإصابة المريض بمرض السكر، زي:

  • التهاب البنكرياس اللي بيحصل نتيجة أسباب كتير زي:
    1. إدمان الكحول
    2. حصوات المرارة
    3. ارتفاع الدهون الثلاثية
    4. أمراض الغدة الدرقية. 
  • أورام وسرطان البنكرياس.
  • استئصال البنكرياس نتيجة انتشار الأورام أو غيرها من الأمراض.

الطفرات الجينية

  • الطفرات الجينية اللي بتحصل في جين واحد من الجينات المسؤولة عن إنتاج هرمون الأنسولين بتتسبب في ظهور نوع من انواع مرض السكر اسمه السكر الأحادي، وفي الأغلب بتحصل الحالة دي نتيجة التوارث العائلي للجين دا أو ممكن تحصل الطفرة الجينية من نفسها غير معروف أسبابها ومن غير ما يكون في توارث عائلي؛ والطفرات الجينية بتكون حالة طبية غير شائعة الحدوث لكنها بتكون مسؤولة عن بعض حالات الإصابة بالنوع الأول من مرض السكر.
  • إصابة المريض بمرض التليف الكيسي في البنكرياس وهو حالة متأخرة ممكن تحصل بسبب الطفرات الجينية بتسبب انتاج مخاط سميك ينتج عنه ندبات بالبنكرياس ويكون غير قادر على انتاج هرمون الانسولين.
  • إصابة المريض بالمرض الوراثي المعروف بفرط امتصاص الحديد، لو لم يتم علاج المرض دا هيتسبب في تراكم الحديد في الجسم وتدمير البنكرياس وبالتالي إصابة المريض بمرض السكر.

بعض الأدوية

من الآثار الجانبية لتناول بعض الأدوية هو الإصابة بمرض السكر، زي:

  • فيتامين ب3 (vit b3)
  • أنواع معينة من مدرات البول بيتم وصفها لمرضى ارتفاع ضغط الدم.
  • أدوية الصرع المضادة للتشنجات، وأدوية علاج القلق و علاج الاكتئاب.
  • ادوية علاج نقص المناعة زي ادوية مرض الايدز.
  • بعض أدوية الالتهاب الرئوي.
  • الادوية المضادة للالتهاب من نوع الكورتيزون اللي بيتم استخدامها في علاج الروماتويد -التهاب المفاصل الروماتويدي-، علاج الربو والذئبة الحمراء.

علاج السكر

علاج السكر النوع الأول

بعد تشخيص المريض بالنوع الأول من مرض السكر بيلزمه الطبيب بنظام أكل صحي ومجموعة من الأدوية واللي بيكون فيها علاج السكر معتمد بشكل أساسي على جرعة من الأنسولين بيتم ضبطها مع الطبيب المعالج على حسب المجهود البدني اللي بيقوم بيه المريض وعلى حسب احتياجه من الأنسولين؛ علشان كدا علاج السكر من النوع الأول بينقسم لشقين:

أولًا: علاج السكر بحقن الأنسولين

في علاج السكر بالأنسولين، بيحدد الطبيب المعالج نوع الأنسولين المناسب لحالة المريض لأن كل نوع من أنواع الأنسولين بيشتغل في جسم الإنسان بطريقة مختلفة من حيث سرعة التفاعل مع الجسم وبناء عليه بيتم تحديد الجرعة توقيتها قبل الأكل أو بعد الأكل وهكذا.

نوع الإنسولين

سرعة النوع في بداية تفاعله مع الجسم

مدة استمرار مفعول نوع الأنسولين في الجسم

أنسولين سريع المفعول بعد 15 دقيقة من الحقن من 2 ل 4 ساعات
أنسولين قصير المفعول بعد 30 دقيقة من الحقن من 3 ل 6 ساعات
أنسولين متوسط المفعول بعد 2 ل 4 ساعات من الحقن من 12 ل 18 ساعة
أنسولين طويل المفعول أكتر من 4 ساعات من الحقن حوالي 24 ساعة أو اكتر

ملحوظة: الجدول دا توضيحي للأنواع والإرشادات المناسبة لكل نوع من أنواع الأنسولين، والطبيب المعالج وحده هو المسؤول عن تحديد نوع الأنسولين والجرعة المناسبة حسب حالة المريض، ولازم يتم الالتزام بالجرعة لأن أي زيادة عن الجرعة المحددة هتسبب هبوط مستوى السكر في الدم اللي بدوره ممكن يؤدي لحالة غيبوبة سكر او الوفاة.

الفرق بين أنواع الإنسولين المختلفة:
  • الإنسولين سريع المفعول عادًة بيتم وصفه قبل الأكل مباشرة لأن مفعوله في الجسم بيبدأ بسرعة جدًا مقارنة بالأنواع الأخرى.
  • الإنسولين قصير المفعول ممكن يوصفه الطبيب قبل الأكل.
  • الإنسولين متوسط المفعول ممكن يتم وصفه في بداية اليوم لأنه بيحافظ على مستوى السكر في الدم لفترة طويلة.
  • الإنسولين طويل المفعول ممكن ميكنش الاختيار الأمثل لطبيب السكر في خطة علاج السكر لأنه بيبدأ مفعوله في الجسم بعد ساعات طويلة من الحقن، لكن ممكن يتم وصفه قبل وجبة العشاء أو قبل النوم علشان يحافظ على مستوى السكر في الدم طول فترة النوم، مع العلم أن أخذ جرعة الإنسولين طويل المفعول مش بيغني عن جرعة الإنسولين قصير المفعول قبل وجبات الإفطار والغداء.

ثانيًا: مراقبة نسبة السكر في الدم وتسجيلها.

كل الأطباء دايماً شايفين ان كلما زادت مرات مراقبتك للسكر، كلما قل احتياجك لأدوية علاج السكر، لأن من خلال المراقبة دي الدكتور بيقدر يحدد نسبة الأنسولين اللي الجسم محتاجها في الفترة دي بالظبط.

ومن أهم الطرق اللي نقدر نقيس بيها نسبة السكر في الدم هي:

الطريقة الأولى: جهاز الإصبع…

الجهاز الخاص بقياس السكر عن طريق شكة صغير في الإصبع، علشان تنزل منه قطرة الدم، ويبدأ يقيس نسبة السكر في الدم.

الطريقة الثانية: الأجهزة المتطورة

الأجهزة دي بتكون موجودة تحت الجلد، ودورها انها تقيس تركيز السكر في الجسم بشكل مستمر -على مدار اليوم- وممكن تغير المواعيد اللي بتقيس فيها نسبة السكر، على حسب برمجة الجهاز؛ لكن المسؤول عن برمجة الجهاز ده هي الجهة المعالجة.

علاج السكر النوع الثاني

إذا تم تشخيص المريض بالنوع الثاني من مرض السكر بيتبع معاه الطبيب المعالج روتين معين بيتقسم ل 4 أجزاء، وممكن يكون الاعتماد في علاج النوع دا هو حبوب وأقراص علاج السكر من غير الأعتماد بشكل رئيسي على حقن الأنسولين ودا طبعًأ بيتم تحديده مع الطبيب المعالج ومع التزام المريض بخطة العلاج والأكل الصحي وممارسة الرياضة.

علاج مرض السكر من النوع الثاني (سكر البالغين) هيكون متقسم ل 4 أقسام:

أولا: تغيير الروتين اليومي.

الحل ده مبني على أن نمط الحياة يتحول لنمط حياة صحي اللي بتبدأ بـــ

1- النظام الغذائي: لازم النظام الغذائي يتغير من السكر الكتير في الأكل والمواد الحافظة، لنظام أكل صحي ينفع يتماشى مع الحالة الصحية دي.

2- الرياضة: أول لما الدكتور المختص يشوف الفحوصات ويبلغك بإيجابية التحاليل والإصابة بالمرض، هيلزمك باتباع نظام يومي صحي من الأكل والرياضة لكن لازم تبعد عن الرياضة الشاقة أو العنيفة للحفاظ على مستوى السكر والأنسولين مظبوطين في الدم.
ممكن تسأل الدكتور عن أنواع الرياضة البدنية اللي ممكن تعملها، لأن نوع الرياضة بيختلف من مريض للتاني على حسب حالته البدنية والصحية وإذا مصاب بأمراض تانية غير مرض السكر أو لأ.

3- خفض الوزن: في العادي الوزن كل لما يزيد، كلما زادت مقاومة الجهاز المناعي للأنسولين، وبالتالي بيحصل مرض السكر؛ وبالتالي بعد خفض الوزن مقاومة الجهاز المناعي للأنسولين هتقل، والسيطرة على مستوى السكر واجتناب المضاعفات هتزيد.

ثانيًا: ادوية السكر

  1. الميتفورمين: العلاج ده هدفه انه يكبت انتاج الجلوكوز في الكبد علشان يتسبب في تخفيض السكر في الدم، وبيعتبر من أفضل اختيارات الأطباء في علاج السكر مع الأشخاص اللي عندهم سمنة مفرطة.
    ملحوظة: من أهم التأثيرات الجانبية المعروفة عن الميتفورمين انه بيسبب انخفاض في الوزن، ويؤثر على الجهاز الهضمي؛ أما الأشخاص اللي عندهم فشل كلوي مزمن مينفعش ياخده أصلاً، لانه هيكون مضر أكثر من كونه نافع.
  2. السولفانيل-أوريا (Sulfonylurea): هو واحد من ادوية السكر اللي بتساعد الجسم على زيادة انتاج الانسولين عن طريق تغيير الشحنة الكهربية الخاصة بغشاء الخلايا اللي بتفرز الأنسولين.
    ملحوظة: الأعراض الجانبية لأدوية السكر من النوع دا ده هو زيادة الوزن، و هبوط في مستوى السكر في الدم، وبالتالي الأشخاص الكبار في السن، أو الأشخاص المعرّضين لحالات هبوط حادة في تركيز الجلوكوز، العلاج ده مش هيكون مناسب ليهم تماماً.
  3. الثيازوليدينيديونز (thiazolidinediones): بيزيد من حساسية خلايا الجسم للأنسولين يعني بيقلل مقاومة الجسم للأنسولين وبيساعد في إفراز نسبة أكبر من الأنسولين من البنكرياس.
  4. ميجليتينيد (Meglitinides): النوع ده بردو بيساعد على تغيير الشحنة الكهربية الخاصة بغشاء الخلايا اللي بتفرز الأنسولين؛ وبالتالي يساعد الجسم على زيادة انتاج الانسولين، لكنه بيساعد على زيادة الوزن.
  5. مثبّطات ألفا-غلوكوزيداز: العلاج ده بيشتغل على أنه يبطئ امتصاص السكر في الجهاز الهضمي؛ لكن من أهم تأثيراته الجانبية هي انها بتسبب انتفاخ وإسهال.
  6. مثبّطات دي بي بي 4: دور العلاج ده هو انه يساعد في تنظيم وتركيز السكر في الجسم؛ لكن على الجانب الآخر هتلاقي ان ادوية السكر من النوع دا مش قوية كفاية انها تقلل نسبة ارتباط السكر بالهيموجلوبين بشكل ملحوظ  زي باقي الأدوية، علشان كدا مش بيسبب زيادة الوزن، وكمان مش بيسبب اي خطورة عالية ممكن يحصل بسببها هبوط حاد في نسبة السكر في الدم.
  7. أدوية الـسكر من النوع GLP-1: الأدوية دي دورها انها توازن نسبة الجلوكوز في الدم؛ لكن من آثارها الجانبية إن العلاج ده بيسبب انخفاض الوزن، والتقيّؤ، والغثيان، والإسهال.

ثالثًا: حقن الأنسولين

بيحدد الطبيب المعالج النوع المناسب من أنواع الإنسولين المختلفة على حسب حالة المريض، وفي معظم الحالات لو اتبع المريض إرشادات الطبيب وقلل من وزنه وأتبع نظام غذائي لمرضى السكر المناسب لمستوى السكر في دمه.

رابعًأ: مراقبة نسبة السكر في الدم

مراقبة مستويات السكر في الدم بيعتبر أهم روتين المفروض تعملها لو مصاب بمرض السكر هي انك تراقب نسبة السكر في الدم، وخصوصاً في الساعات الصباحية من اليوم، لأن الساعات الصباحية دي هي اللي بتظهر المعلومات الحقيقية عن المرض في جسم الشخص؛ وكمان على أساس النتيجة اللي بتطلع في الوقت دا، بيقدر الطبيب المعالج يحدد خطة العلاج هتكمل ازاي، وهل هيزيد عليها أدوية تانية ولا هيقلل الأدوية.

علاج سكر الحمل

علشان تقدري تحافظي على صحة الجنين، وصحتك كمان وقت الولادة، لازم نسبة السكر في الدم تكون مظبوطة قبل عملية الولادة؛ علشان كده بننصحك انك تلتزمي بخطوات علاج سكر الحمل، وهي:

    • التزمي بنظام صحي، يتناسب مع فترة الحمل ومع السكر.
    • مارسي الرياضة المناسبة للحمل، تحت إشراف طبيب النسا والتوليد.
    • لازم تتابعي نسبة السكر في الدم بشكل يومي، علشان التقارير دي هتفرق جداً مع دكتور النسا وقت الولادة.
    • لو كل الحلول دي ملهاش نتيجة واضحة تفرق قبل الولادة، ممكن يلجأ الطبيب المعالج لوصف علاج سكر الحمل بحقن الأنسولين وأدوية السكر المناسبة للحمل.

    كيفية التعايش مع مرض السكر

    للتعايش مع مرض السكر وتقليل خطر الإصابة بمضاعفات السكر، لازم يلتزم المريض بنظام غذائي لمرضى السكر مناسب لحالته ويمارس الأنشطة الرياضية المناسبة لحالته الصحية.

    ويعتبر أفضل نظام غذائي لمرضى السكر هو النظام اللي بيحتوي على:

    نظام غذائي لمرضى السكر 

    زيت أوميجا 3 الصحي الموجود بالمكسرات وبالأسماك المختلفة زي السالمون والسردين.

    نظام غذائي لمرضى السكر
    الأوراق الخضراء لأنها مغذية وفي نفس الوقت سعراتها الحرارية قليلة و مش بتتسبب في زايدة الوزن وبتحوي على مضادات الأكسدة، زي السبانخ واللفت والجرجير.

    نظام غذائي لمرضى السكر
    القرفة لأنها بتساعد في تقليل مستوى السكر بالدم وبتزود من حساسية خلايا الجسم للأنسولين، لكن بيُصح بعدم الإفراط في تناول القرفة وملعقة شاي صغيرة باليوم الواحد هي كمية كافية لإمداد الجسم بالعناصر اللي بيحتاجها من القرفة.

    نظام غذائي لمرضى السكر
    تناول بيضتين يوميًا كجزء من نظام غذائي لمرضى السكر ممكن يقلل من مقاومة خلايا الجسم للأنسولين طبقًا لبعض الدراسات، بالإضافة أن البيض بيحتوي على مضادات الأكسدة اللي بتحمي العين من الأمراض.

    نظام غذائي لمرضى السكر
    بذور الشيا من اكتر الأطعمة المفيدة لمرضى السكر لأنها بتحتوي على ألياف مفيدة وفيها نسبة قليلة من الكربوهيدرات سهلة الهضم، بالإضافة أن بذور الشيا ليها دور في خفض ضغط الدم المرتفع وبتساعد في علاج الالتهابات.

    نظام غذائي لمرضى السكر
    الكركم بيساعد في خفض مستوى السكر بالدم وله دور فعال كمضاد للالتهاب، وبيساعد في تحسين وظائف الكلى اللي ممكن تضر بسبب مرض السكر؛ وعلشان تساعد جسمك في امتصاص الكركم كويس ممكن تتناوله مع وجبة غنية بالفلفل الأسود لأنه بيزود من امتصاص الكركم بنسبة 2000%

    نظام غذائي لمرضى السكر
    الزبادي ومنتجات الألبان الأخرى بتساعد في خفض الوزن وبيحسن من استجابة الجسم للأنسولين.

    نظام غذائي لمرضى السكر
    المكسرات غنية بمصادر الكربوهيدرات سهلة الهضم وقليلة السعرات الحرارية وبتساعد في خفض مستويات السكر المرتفعة في الدم، زي اللوز والكاجو والبندق.

    نظام غذائي لمرضى السكر
    البروكلي مصدر مهم جدًا للبروتينات والكربوهيدرات سهلة الهضم وبيساعد على خفض الوزن وممكن يساعد في تحسين مستوى الأنسولين في الدم.

    نظام غذائي لمرضى السكر
    استخدام زيت الزيتون بيساعد في ضبط مستوى الكولسترول في الدم وبيقلل من خطر الإصابة بأمراض القلب، علشان كدا هيساعد في خفض الوزن وتحسين اداء جسم المريض بالسكر.

    نظام غذائي لمرضى السكر
    بذور الكتان بتساعد في تقليل خطر الإصابة بأمراض القلب وضبط مستوى السكر بالدم، وبتحسن من اداء الأمعاء وتحسين حساسية الجسم للأنسولين.

    نظام غذائي لمرضى السكر
    خل التفاح بيساعد في  تحسين حساسية الجسم للأنسولين، وخفض مستويات السكر في الدم أثناء الصيام، بالإضافة أنه ممكن يقلل من استجابة السكر في الدم بنسبة تصل إلى 20 ٪ لما بيتم تناوله مع وجبات بتحتوي على الكربوهيدرات.

    نظام غذائي لمرضى السكر
    الفراولة من أكتر الفاكهة المغذية اللي ممكن تناولها لأنها بتحتوي على مضادات الأكسدة وهي مصدر مهم لفيتامين سي، وكمان بتساعد في خفض مستوى الكولسترول وخفض مستوى السكر في الدم.

    نظام غذائي لمرضى السكر
    الثوم  مفيد جدًا في علاج الالتهابات، وبيقلل من مستويات سكر الدم والكوليسترول الضار عند الأشخاص المصابين بالنوع التاني من مرض السكر.

    مفاهيم خاطئة عن مرض السكر

    المريض يعاني من اضطراب جنسي يسبب العقم ويمنعه من الزواج

    مرض السكر لا يسبب العقم لكنه بيتسبب في اضطرابات جنسي عند  بعض المرضى من النوعين نتيجة التهابات الأعضاء التناسلية والتهابات الأعصاب بتلك الأعضاء، وطبقًا للجمعية البريطانية لجراحي المسالك البولية أن من مرض السكر بيمثل 33% من أسباب ضعف الانتصاب عند الرجال، وطبقًا لدراسة أخرى أن حوالي 35% من النساء بيعانوا من مشاكل جنسية بسبب إصابتهم بمرض السكر.

    مرض السكر بيأثر على أمان وسلامة المريض أثناء قيادة السيارة

    كتير من مرضى السكر بيخافوا من انخفاض مستوى السكر عند ممارسة الأنشطة الحياتية زي ممارسة الرياضة أو قيادة السيارة، لكن طبقًا للاحصائيات أن مرضى السكر مش أقل أمان تمامًا عن باقي الأفراد وأن حوادث الطرق لأشخاص بيعانوا من نقص مستوى السكر بالدم وبيتعالجوا بالأنسولين مش بتتعدى ال 0.2% من نسبة حوادث الطرق.

    مريض السكر غير قادر على تناول السكريات ابدًا

    دي من أكتر الخرافات المنتشرة بين الناس أن مريض السكر المفروض ميستخدمش السكر الأبيض والحلويات تمامًا في نظامه الغذائي.
    لكن معظم الأطباء بينصحوا بعمل نظام غذائي متوازن لمرضى السكر ويكون بيحتوي على كل العناصر اللي بيحتاجها الجسم، وممكن تناول السكر بكميات غير كبيرة أو استبدال السكر بالفاكهة.

    مرض السكر (النوع الثاني) بيصيب اللي بيعانوا من السمنة بس

    السمنة عامل من عوامل خطر الإصابة بمرض السكر، لكن مش معنى كدا أن اصحاب الوزن الطبيعي لا يصابوا بمرض السكر! والحقيقة أن حوالي 20% من مصابي النوع التاني من مرض السكر لا يعانوا من السمنة المفرطة.
    دوس هنا وأعرف من هم الأكثر عرضة للإصابة بالسكر.

    النوع التاني من مرض السكر غير خطير لأنه لم يتم ولادة الشخص به

    دا كمان من الإشاعات الخاصة بمرض السكر، ولو لم يتم اتباع نظام علاج السكر اللي حدده الطبيب المعالج ممكن تسوء حالة المريض ويُصاب بإحدى بمضاعفات مرض السكر اللي بعضها بيهدد الحياة.
    دوس هنا وأعرف كل مضاعفات مرض السكر.

    المصابون بمرض السكر غير قادرين على العمل ببعض الوظائف

    مرض السكر مش بيأثر على كفاءة الموظف في حال عدم القيام بمجهود بدني شاق، أو في حال كان العمل يتطلب مستوى قياس نظر معين يمنع مريض السكر من الالتحاق بالوظيفة دي،غير أن مريض السكر لا يمكنه الالتحاق بالوظائف العسكرية وعادًة بياخد إعفاء من خدمة بالجيش.

    المصادر