الحمل : 

الحمل بيحصل نتيجة تخصيب حيوان منوي لبويضة ناضجة ايام التبويض، و يستمر الحمل في الرحم حوالي 40 أسبوع يعني بتكون مدة الحمل حوالي 9 شهور، بسبب الحمل بيحصل تغيرات فسيولوجية وهرمونية كتير في جسم الحامل بينتج عنها بعض الأعراض من أول بداية الحمل لبعد الولادة وفترة الرضاعة.

دور الرحم في الجسم

  • الرحم هو عضو من الأعضاء التناسلية الموجودة في الإناث فقط وتتلخص وظيفته الأساسية في توفير مكان مناسب لنمو الجنين بعد تخصيب البويضات بالحيوانات المنوية وبالتالي بيحصل الحمل.
  • خلال فترة الحمل بيتضاعف حجم الرحم حوالي 22 مرة، و بيتغير وزنه من 50 جرام لحوالي 1100 جرام نتيجة تمدد الرحم واتساعه علشان يحتوي الجنين و يحميه لحد معاد الولادة.
  • لو محصلش حمل يعني محصلش إخصاب للبويضات، بتتمزق بطانة الرحم وتحصل الدورة الشهرية عند الإناث البالغات.

    و تنقسم مراحل الحمل حسب نمو الجنين ل 3 مراحل:

  1. أول 3 شهور يبدأ يتكون دماغ الجنين و النخاع الشوكي والأعضاء التناسلية و بعض الأعضاء التانية زي القلب اللي بينبض اخر اسابيع المرحلة الأولى.
  2. بداية من الشهر الرابع للشهر السادس في الحمل بيكتمل نمو أعضاء الجنين كلها مع بداية نمو بعض الشعر، و المرحلة دي بتبدأ تحس الأم بحركة و ركلات الجنين في الرحم.
  3. اخر 3 شهور في الحمل بيتشكل الهيكل العظمي للجنين و بيكون قادر على فتح و قفل عينه و الإحساس بالضوء، و بيقدر الجنين يخزن المعادن و الكالسيوم اللي محتاجهم علشان يستعد لقرب معاد الولادة.

 التغيرات اللي بتحصل في الجسم نتيجة الحمل: 

  • بيزيد سمك بطانة الرحم خلال 9 شهور الحمل علشان يسمح بتغذية وحماية الجنين.
  • بتزيد هرمونات الأنوثة في الجسم في فترة الحمل و بتلاحظ الحامل اعراض زي زيادة الوزن و احتباس السوائل و انتفاخ الوجه والأطراف.
  • بيزيد هرمون الأستروجين اللي بيسمح للرحم و المشيمة بنقل الغذاء من الأم للجنين
  • بيزيد هرمون البروجيستيرون  اللي بيسمح بارتخاء اربطة الرحم و مفاصل الجسم علشان يساعد الرحم في التمدد مع زيادة حجم الجنين خلال شهور الحمل، علشان كدة الحامل بتحس بضعف في المفاصل في فترة الحمل.

أعراض الحمل المبكر ؟

من أهم وأوضح الأعراض تأخر الدورة الشهرية وده فى حالة إن عندك دورة شهرية منتظمة ..و في اعراض تانية تقدري تلاحظيها قبل الوصول لميعاد الدورة الشهرية لكن أحيانًا مش كل النساء بيحسوا أو يلاحظوا الأعراض دي من البداية، و الأعراض دي زي:

  *الإحساس بالدوخة أو الغثيان وخصوصاً فالصباح.

  *تغيير فى الثديين مثل الشعور بثقل أو تورم أو آلام.

  *الإجهاد من أقل مجهود وكثرة النوم.

  *الأحساس بالوحام و هو زيادة الرغبة فى أكل معين عن بقية الأكلات حتى لو نوع الأكل ده مش من الأكلات المفضلة عندك و كنتي بترفضي أكلها قبل كدة.

*التغيرات المزاجية وديه بتكون نتيجة التغييرات الهرمونية فتكونى فى أوقات سعيدة وأوقات حزينة بدون سبب.

* نقط دم أو نزيف خفيف وبيكون بسبب إنغراس البويضة فى جدار الرحم ودي من الأعراض الأولى لأنها بتحصل تقريبًا في أول أسبوعين من الحمل ولكن العلامة دي مش شائعة و مش بالضرورة تحصل لكل الحوامل.

اعراض الحمل في بقية الأسابيع حتى الولادة بتكون:

  1. انقطاع الدورة الشهرية طول ال 9 شهور.
  2. الصداع المستمر بيروح ويجي على فترات.
  3. زيادة الوزن بشكل ملحوظ خصوصًا مع بداية الشهر الرابع بسبب تمدد الرحم وكبر حجم الجنين.
  4. ارتجاع المرئ أحيانًا والأحساس بحرقان في الصدر لأن تغير الهرمونات خلال فترة الحمل بيضعف صمام المريء وممكن يسبب ارتجاع حمض المعدة للمريء.
  5. اضطراب الجهاز الهضمي فممكن الحامل تعاني من إسهال أو إمساك في فترة الحمل.
  6. تشنجات شديدة في البطن نتيجة تمدد الرحم 
  7. ألم في الظهر بسبب تغيرات الهرمونات و زيادة الوزن خلال فترة الحمل.
  8. بعض الحوامل ممكن يصابوا بمرض فقر الدم ودا بيسبب الأحساس بالدوخة طول الوقت ولازم علاج فقر الدم عن الحامل فورًا لأن من مضاعفاته الولادة المبكرة و مخاطر قلة وزن الجنين.
  9. اكتئاب الحمل بسبب التغيرات الهرمونية ودا بيحصل لحوالي 23% من الحوامل.
  10. الأرق وعدم النوم بشكل كافي.
  11. تغيرات متتالية للثدي بتظهر على هيئة تورم أو انتفاخ في الثدي وتقل وزنه.
  12. بعض الحوامل ممكن يظهر عليهم حب الشباب لكن بيختفي بعد الولادة.
  13. ألم الورك خصوصًا في أواخر شهور الحمل بسبب كبر وتمدد الرحم.

هل تختلف اعراض الحمل المبكر عن اعراض ما قبل الدورة الشهرية؟

من الملاحظ من الأعراض السابقة أن فيه  تشابه بين بعض أعراض الحمل وأعراض  الدورة الشهرية .. أيه الفرق بينهم ؟!

  • فى حالة آلام وتورم الثديين فالعَرَض ده غالبًا مش شائع مع بداية الدورة الشهرية أو بيكون تورم الثديين بسيط وغير محسوس أثناء الدورة،  أما فى حالة الحمل فيبدأ تورم الثديين بعد أسبوع أو اتنين من بداية الحمل وبيفضل مستمر لحد الولادة.
  • قبل الدورة الشهرية تعانى السيدات من الشعور بالإجهاد والتعب ويتحسن الشعور ده مع نزول دم الدورة الشهرية،  ولكن استمرار التعب والإجهاد من غير نزول دم الدورة الشهرية في معادها بيتم اعتباره من اعراض الحمل المبكر و بيستمر التعب ده لمدة طويلة لدرجة إن ممكن يستمر طوال ال٩شهور.
  • غالبًا مش بيظهر إفرازات فيها دم قبل معاد الدورة الشهرية لكن ممكن تظهر الإفرازات دي لمدة أيام قليلة في أول الحمل.
  • الغثيان المستمر والصداع وآلام الظهر من غير نزول دم الدورة الشهرية في معادها ممكن يُعتبر من علامات الحمل.
  • ملحوظة، متقدريش تعتمدي على الأعراض دي لتأكيد الحمل أو نفيه، لأنها ممكن تكون مؤشر لخلل بيحصل للجسم زي بعض الأمراض اللى ممكن يكون ليها نفس الأعراض (سيتم ذكر أمثلة ليها لاحقاً) أو حتى يكون ضعف في الحالة العامة للجسم وبالتالي لو الدورة الشهرية اتأخرت كتير و حسيتي  ببعض الأعراض دي فيُفضل إنك تعملي تحليل الحمل  المنزلى كخطوة مبدئية وبعدها ممكن تعملي تحليل الحمل في المعمل للكشف عن هرمون الحمل في الدم كخطوة تأكيدية.

ما هى اختبارات الحمل؟

في شوية فحوصات و تحاليل بنقدر من خلالها نعرف ان فيه حمل أو نأكد وجوده، و من اشهرها:

تحاليل مبدئية زي:

  أ-الاختبار المنزلى

  • في انواع كتير من تحليل الحمل المنزلي موجود في الصيدليات وبيتم استخدامه بعد تأخر الدورة الشهرية عن معادها الطبيعي و الشك في وجود حمل، لكن نتايجه ممكن متكنش دقيقة أوي علشان كدة الأفضل يتم الاختبار ده بعد ١٠ أيام من تأخر الدورة الشهرية أو بعد ٣ أسابيع من آخر علاقة زوجية.
  • و يفضل استخدام اختبار الحمل المنزلي ده في فترة الصبح لان تركيز هرمونات الحمل في البول بتكون أعلى في التوقيت ده من اليوم.
  • لو نتيجة اختبار الحمل المنزلي سالب و لسه بتعاني من إستمرار غياب الدورة الشهرية، في الحالة دي لازم تروحي تكشفي عند دكتور نسا  فوراً لتحديد سبب تأخر الدورة الشهرية ويكتب لك على العلاج المناسب.
  •  لو كانت النتيجة إيجابية،  فالأفضل انك تعملي تحليل الحمل في المعمل واللي بيكون عبارة عن  تحليل دم بيكشف عن نسبة هرمونات الحمل في الجسم، والتحليل ده يقدر يأكد أو ينفي وجود حمل.

ب- تحليل الدم:

  • ممكن تروحي للدكتور في الخطوة دي عشان يكتب توصية بتحليل الدم أو ممكن تروحي للمعمل على طول لأن إختبار الدم نتيجته بتكون أدق من إختبار البول المنزلي.
  • من خلال تحليل الدم بيتأكد الدكتور من  وجود هرمون الحمل في الدم وكمان يقدر يعرف كميته وده بيساعد الدكتور مع عوامل تانية زي السونار على تحديد عمر الحمل يعني تحديد عمر الجنين والأم حامل في الشهر الكام.

فحوصات و تحاليل بصفة دورية:

الفحص بالسونار

  •  وده بيكون في عيادة دكتور النساء ومن خلال الفحص يقدر يتأكد من وضع الجنين ويحدد عمر الحمل و تحديد معاد تقريبي للولادة.
  • وكمان يقدر يطمن على حالة الرحم وهل حالة الأم أو الجنين تحتاج لرعاية خاصة أثناء و بعد الولادة ولا لأ.
  • وفى المراحل المتقدمة من الحمل يقدر يطمن على قلب الجنين وكثافة عظامه وتطور نموه و الكشف عن وجود تشوهات في الجنين وبعض حالات التشوهات دي يقدر يعلاجها قبل الولادة.

فحوصات دورية تانية غير السونار:

  • لو الأم بتعاني من بعض الأمراض المزمنة زي مرض السكر، لازم تتابع مع دكتور النساء بجانب دكتور الباطنة المختص اللي بيتابع حالتها قبل الحمل علشان يبدأ الدكتور في تنظيم وتغيير نظام الأدوية والتغذية بما يتناسب مع الحمل،و وقتها هيطلب منها الدكتور تحاليل قياس السكر في الدم و غيرها من التحاليل اللازمة حسب حالة الأم و الجنين.

المضاعفات اللى ممكن تحصل في الحمل؟

فيه حالات ممكن تتعرض لمشاكل صحية أثناء الحمل سواء مشاكل خاصة بالأم أو الجنين أو هما الأتنين مع بعض و للأسف المشاكل دي  ممكن تحصل سواء كنتي مصابة قبل الحمل  بمرض مزمن او لأ

علشان كدة لازم متابعة مستمرة لحالة الأم الصحية قبل وأثناء الحمل وبعده علشان تقلل من المخاطر اللي ممكن تتعرض لها خلال فترة الحمل زي:

١- ارتفاع ضغط الدم أو انخفاضه

  • تغير ضغط الدم أثناء الحمل طبيعى جداً ،لأن هرمون البروجيسترون اللى بيفرزه الجسم أثناء الحمل بيخفف الضغط على جدار الأوعية الدموية علشان تتمدد و يبقى سهل وصول الدم للرحم علشان يغذي الجنين، علشان كدا بيكون من الملاحظ انخفاض ضغط دم الحامل خلال المرحلتين الأولى والتانية من الحمل يعني أول 6 شهور تقريبًا.
  • اعراض انخفاض ضغط الدم بتظهر اوي في أول 3 شهور من الحمل زي:
  1. الإحساس بالدوخة والدوار خصوصًا لما تقف.
  2. شحوب البشرة
  3. عطش شديد
  4. صعوبة في التركيز
  • بيعلي ضغط الدم للحامل بعد الأسبوع ال 24 يعني تقريبًا في بداية الشهر السادس.
  • بيبدأ ضغط الدم للحامل يرجع لمعدله الطبيعى فى الأسابيع الأخيرة من الحمل إذا كان الحمل مستمر بشكل طبيعى.

2- ارتفاع ضغط الدم للحامل:

ارتفاع ضغط الدم هو مشكلة بتحصل بسبب معاناة  الشرايين من قوة كبيرة من الدم تندفع تجاه جدران الأوعية الدموية، ومن كل 50 حامل بيحصل ارتفاع ضغط الدم الحملي ل 3 حوامل بس لكنه ممكن يسبب مخاطر صحية كبيرة على الأم والجنين.

*أنواع ارتفاع ضغط الدم عند الحامل بيتصنف على حسب المرحلة اللى ظهر فيها من الحمل:

– ارتفاع ضغط الدم المزمن : يسمى بالاسم ده فى حالة لو كانت الحامل بتعاني من ارتفاع ضغط الدم قبل الحمل أصلًا أو قبل الأسبوع الـ ٢٠ من الحمل، وغالبًا في الحالة دي بتفضل الأم تعاني من ارتفاع ضغط الدم حتى بعد الولادة.

– ضغط الدم الحملي: وده بيكون في حالة ارتفاع ضغط الدم بعد الأسبوع الـ ٢٠ من الحمل ، النوع ده بيكون الإصابة بيه أثناء الحمل فقط وعادة النوع ده مش بيستمر بعد الولادة لكن لازم يكون في متابعة دورية للضغط اثناء الحمل مع الدكتور المعالج.

أعراض ارتفاع ضغط الدم عند الحامل:

  • صداع مستمر شديد جدا
  • تغييرات فى الرؤية زي  تشوش الرؤية أو حساسية مفرطة للضوء.
  • الشعور بألم فى أعلى البطن أسفل القفص الصدري  .
  • كميات صغيرة من البول.
  • غثيان مع دوخة و قيء بس بيكونوا أشد من أعراض الحمل الطبيعية.
  • إرتفاع مفاجئ للوزن بشكل ملحوظ وغير طبيعي، في بعض الحالات ممكن يوصل لكيلو في الأسبوع.
  • ظهور إنتفاخ فى منطقة الوجه واليدين ولكن العلامة ديه ممكن تكون غير ملحوظة نتيجة وجود إنتفاخات طبيعية أثناء الحمل.

اسباب ارتفاع ضغط الدم عند الحامل:

– عدم تدفق كمية كافية من الدم إلى الرحم.

– التغذية غير السليمة للأم.

– التاريخ الطبى والعائلى من حيث الإصابة بإرتفاع ضغط الدم أثناء الحمل.

-الحمل الأول بيكون نسبة الإصابة بارتفاع ضغط الدم الحملي أعلى خلاله.

-نسبة الإصابة بالحالة ديه بتكون أعلى عند حدوث حمل لسيدات فوق سن ال ٣٥.

– الحمل بتوائم.

– السمنة المفرطة.

– التدخين

– لو فيه  تاريخ طبي سابق للحامل بأمراض زي مرض السكر، ضغط الدم المزمن ،مرض في الكليتين أو امراض المناعة زي الذئبة الحمراء.

*مضاعفات ارتفاع ضغط الدم عند الحامل:

نسبة حدوث مضاعفات ارتفاع ضغط الدم للحامل هي أقل من 10% على مستوى العالم، و المضاعفات دي مش بتحصل لكل الحوامل لأن بمجرد ظهور الأعراض الأولية لأرتفاع الضغط عند الحامل لازم يتم المتابعة مع دكتور نسا و دكتور باطنة متخصص و عدم الاستهانة بالاعراض دي، الدكاترة المتخصصين بيقوموا بمتابعة حالة ضغط الأم حتى الولادة مع إرشادات خاصة لنمط حياة الأم والأدوية ونظام الأكل الصحي اللي لازم تتبعه الأم الحامل بعناية شديدة علشان تتجنب مضاعفات زي:

– نقص تدفق الدم للمشيمة وبالتالي عدم تغذية الجنين كويس وضعف نمو الجنين.

– قلة وزن شديدة للطفل عند الولادة ودا بيسبب مشاكل في رئتين الجنين وضيق التنفس عند الولادة وبيحتاج يدخل حضانة لفترة بيحددها الدكتور المعالج.

– في حالات شديدة ومتأخرة ممكن قلة وزن الجنين تسبب مشاكل في الجهاز العصبي زي نزيف في المخ.

– قلة وزن الطفل عند الولادة لأقل من 2.5 كيلو ممكن يسبب متلازمة الموت المفاجئ للأطفال دي.

– ظاهرة ما قبل تسمم الحمل  اللي بتصيب حوالي من 2 ل 8% من الحوامل عالميًا، ونسبة الوفيات بسببه حوالي من 9 ل 26% على مستوى العالم.

-إنفصال المشيمة المبكر و دا ممكن يوصل لـ  نزيف حاد للأم.

ملحوظة: مفيش أي داعي للقلق من مضاعفات ارتفاع ضغط الدم للحامل لأن الأم بتتبع إرشادات الدكتور المختص وبتتناول أدويتها بإنتظام مش هيحصل أي نوع من انواع المضاعفات دي، أهم حاجة هو عدم الاستهانة بأي عرض غير مألوف بتحس بيه الحامل أثناء فترة الحمل.

*التشخيص وعلاج ارتفاع ضغط الدم عند الحامل: 

تشخيص ارتفاع ضغط الدم عند الحامل:

  1. قياس الضغط عند الحامل أعلى من 140/90 لقياسيين في  نفس اليوم بيفصل بينهم 6 ساعات تقريبًا.
  2. تحليل البول للتأكد من وجود بروتين في البول، النسبة العالية من البروتين بتدل على ارتفاع ضغط الدم عند الحامل واللي ممكن يسبب تسمم الحمل، أو بيدل على مشاكل في الكلى.
  3. كشف دكتور النساء على تورم وانتفاخ الأطراف علشان يعرف إذا كان انتفاخ طبيعي في وقت الحمل أو بيدل على مشكلة زي ارتفاع ضغط الدم.
  4. تحاليل وظائف كبد و وظائف كلى.
  5. تحليل صورة دم كاملة و تحليل الصفائح الدموية في الجسم.

متابعة الجنين لو الأم عندها ارتفاع ضغط الدم بتكون عن طريق شوية خطوات زي:

  1. متابعة حركة الجنين بيتم فيه ملاحظة عدد ركلات الجنين و لو كانت أكبر من الطبيعي ده بيدل على إن الجنين متأثر بحالة ارتفاع ضغط الدم.
  2. قياس معدل ضربات قلب الجنين.
  3. السونار وأشعة الموجات فوق الصوتية علشان الدكتور يقيس تدفق الدم في الأوعية الدموية للجنين.

*علاج إرتفاع ضغط الدم الحملى؟

– مفيش علاج محدد للحالة دي ولكن الدكتور غالبا بينصح الحامل بالراحة التامة لتوفير الوقت للجنين لاستكمال نموه بشكل طبيعي.

– لو الحامل فى مرحلة مبكرة من الحمل فيجب الراحة التامة والعلاج الدوائى برغم أن خيارات العلاج الدوائي محدودة بالنسبة للحامل لأن أي دوا ممكن يتنقل من الأم للمشيمة والأدوية الآمنة على الأم والجنين بتكون محدودة.

– أوقات الدكتور بيلجأ لتسريع عملية التوليد لو الحالة خطر و خاصة  لو  كانت الحالة في المراحل الأخيرة من الحمل، يعني بيتم اللجوء لتحديد موعد ولادة مبكرة لو مضاعفات ارتفاع ضغط الدم عند الحامل خطيرة و في احتمالية إن الطفل ممكن يعيش خارج الرحم زي في الحضانات مثلا لحد اكتمال نموه ويكون بصحة سليمة.

*هل فيه طريقة للوقاية من ارتفاع  ضغط الدم الحملي ؟

مفيش نصائح معينة ممكن تتبعها الحامل علشان تتجنب الإصابة بخطر ارتفاع ضغط الدم للحامل غير اتباع نظام يومي صحي وسليم خاصة في الأكل زي تقليل الملح في الأكل وعدم الافراط في تناول الأكلات السريعة المضرة.

ولازم عمل فحوصات بشكل  دورى ومنتظم من بداية الحمل، و لو تم اكتشاف ارتفاع ضغط الدم عند الحامل فلازم الأم تكون على وعي كافى بالحالة وتتعاون مع الدكتور  باتباع التعليمات كويس علشان تتجنب مضاعفات ارتفاع ضغط الدم وعلشان تحافظ على صحتها وصحة الجنين.

٢- سكر الحمل: 

  • وهو إصابة الحامل بمرض السكر  أثناء الحمل برغم إنها مش مصابة بيه في الأصل قبل الحمل
  • بيحصل سكر الحمل في أي شهر من شهور الحمل لكن شائع أكتر في بداية الشهر الرابع
  • بيحصل لحوالي 6% من الحوامل وممكن يختفي لوحده بعد الولادة عند 90% من الحوامل،  و 10% بس بتفضل الأم تعاني من مرض السكر حتى بعد الولادة؛ طبقًا المعهد الوطني للسكري وأمراض الجهاز الهضمي والكلى بالولايات المتحدة.
  • بيحصل سكر الحمل بسبب هرمونات الحمل خصوصًا هرمونات المشيمة اللي بتساعد الجسم إنه يعمل جلوكوز أكتر علشان يتم تغذية الجنين، لكن الجلوكوز دا ممكن يزيد عن حاجة الجسم لدرجة إن البنكرياس مش قادر يفرز كمية كافية من الأنسولين علشان يعادل زيادة الجلوكوز في الدم وبكدا تُصاب الأم بمرض سكر الحمل.

الأكتر عرضة للإصابة بسكر الحمل:

  1. الإصابة السابقة بمرض تكيسات المبايض.
  2. التاريخ العائلي لمرض السكر زي إصابة الأم أو الجدة أو العمة أو الخالة بسكر حمل سابق.
  3. عمر الأم لو أكبر من 35 سنة.
  4. عمر الأب لو أكتر من 55 سنة أحيانًا.
  5. السمنة المفرطة للحامل.
  6. الإصابة بارتفاع ضغط الدم المزمن أو ارتفاع ضغط الدم الحملي.
  7. الحمل السابق لمولود وزنه أكتر من 4.5 كيلو.
  8. المدخنات
  9. حالات نادرة من أمراض الجينات.
  10. بعض الحوامل من أصل أفريقي و جنوب أسيا لأسباب جينية ووراثية.

*اعراض سكر الحمل:

غالبا مفيش اعراض بتظهر  عند معظم السيدات عند الإصابة بسكر الحمل لكن ممكن تظهر أعراض مرض السكر المشهورة زي:

  1. كثرة العطش
  2. تعب شديد وإحساس بالغثيان المستمر
  3. جفاف الف

*كيف يمكن علاج سكر الحمل؟

  • ممكن يلجأ الدكتور المعالج لوصف بعض أدوية السكر أو حقن الأنسولين للحامل على حسب خطورة مستوى سكر الحمل، وبيتم تحديد الجرعة المناسبة بالمتابعة الدورية مع الدكتور.
  • لازم الحامل تتبع نظام غذائي يكون فيه السكر قليل زي البعد تمامًا عن الحلويات والكيك وإن الحامل تعتمد في أكلها على الخضار والفاكهة، وممكن تمارس الرياضة المناسبة لحالتها.

مضاعفات سكر الحمل لو لم يتم علاجه:

  1. كبر حجم الجنين و زيادة وزنه عن 4 كيلو.
  2. الحاجة للولادة القيصرية وصعوبة الولادة الطبيعية.
  3. الولادة المبكرة واللي ممكن تسبب تأخر في نمو الطفل بعد الولادة
  4. إصابة الجنين بمرض الصفراء ولازم يتحط في الحضانة بعد الولادة.

٣-تسمم الحمل: حالة طبية خطيرة عبارة عن إرتفاع مفاجئ لضغط الدم  وممكن يحصل معاها تشنجات أو غيبوبة، وبتوصل معدل الوفيات بسببه حوالي 1% فقط على مستوى العالم.

الأكثر عرضة للإصابة بتسمم الحمل:

  1. لو الأم بتعاني من تشوهات المشيمة و عدم كفاية الدم المتدفق إلى المشيمة.
  2. مشاكل في الجهاز المناعي للحامل زي متلازمة اسمها “مضاد الفوسفولبيد” وهو مرض بيسبب تجلط الدم في الشرايين والأوردة وأحيانًا بيسبب إجهاض.
  3. فى حالة وجود إصابة سابقة بتسمم الحمل في حمل سابق.
  4. بعض الأمراض المصاحبة للحمل زي إرتفاع ضغط الدم الشديد للحمل، سكر الحمل أو أمراض الكلى و أمراض القلب.
  5. الحمل فى سن ال ٣٥ أو أكثر.
  6. الحمل بأكثر من جنين (اتنين او أكثر).
  7. السمنة المفرطة.
  8. مرض قصور الغدة الدرقية عند الحامل.
  9. لو الفرق بين الحمل الحالي وأخر حمل حوالي 10 سنين.
  10. الحمل بالحقن المجهري أحيانًا بيعرض الحامل لخطورة تسمم الحمل

اعراض تسمم الحمل:

  1. إرتفاع ضغط الدم الشديد أكتر من 140/90.
  2. تورم اليد والوجه.
  3. صداع ومشاكل في الرؤية ممكن يوصل لفقدان رؤية مؤقت
  4. ضيق شديد في التنفس بسبب سوائل على الرئة
  5. نوبات تشنج أحيانًا.
  6. عدد قليل للصفائح الدموية وده بيتعرف من تحليل الدم.
  7. اضطراب وظائف الكبد وده بيتعرف من خلال تحاليل الكبد.
  8. ارتفاع نسبة البروتين في البول لأكتر من 300 مليجرام في اليوم، ودا بيتعرف من خلال تحليل البول بالمعمل.

مضاعفات تسمم الحمل:

  1. عدم اكتمال نمو الجنين.
  2. خطر الولادة المبكرة و مخاطر قلة وزن الجنين.
  3. خطر انقطاع المشيمة اللي بيسبب نزيف حاد للحامل لو لم يتم السيطرة عليه هينتج عنه فقدان الجنين، ودا بيحصل بنسبة ضئيلة جدًا حوالي 1% على مستوى العالم.
  4. متلازمة انحلال الدم اللي فيها كرات الدم الحمراء بتتكسر بسرعة جدًا وبتقل الصفائح الدموية في جسم الحامل لدرجة تهدد حياة الأم والجنين.
  5. خطر إصابة الأم بأمراض القلب والأوعية الدموية.
  6. تتضرر أعضاء الجسم الحيوية كلها بالحامل زي القلب والرئة والكبد والكلى في حالات تسمم الحمل الشديدة جدًا.

علاج تسمم الحمل:

  1.  تحت إشراف الدكتور المعالج، بيتم تحديد جرعة بعض الأدوية زي أدوية الضغط وأدوية الكورتيزون وأدوية التشنجات.
  2. ممكن تلجأ الحامل للولادة المبكرة لو حدد الدكتور إمكانية اكتمال نمو الجنين خارج الرحم في الحضانات وإن ده أنسب حل للحفاظ على صحة الأم والجنين.
  3. بينصح الدكتور بالراحة التامة واتباع نظام أكل صحي معتمد على الخضار والفاكهة، وعدم تناول الحامل لأني نوع من أنواع الفيتامينات إلا تحت إشراف الدكتور المعالج.

حالات مشابهة لحالات الحمل الطبيعي

 1-الحمل الكاذب (pseudopregnancy) : اللي بيحصل فيه هو  ظهور أعراض الحمل المختلفة مع  أن المرأة مش حامل في الأصل.

أسباب الحمل الكاذب :

  • ممكن الحالة دي تحصل  بسبب عوامل  نفسية بعد التعرض للإجهاض المتكرر أو الرغبة الشديدة فى حدوث حمل أو التعرض لاعتداء جنسى أو قرب فترة إنقطاع الطمث.
  • ولكن  عموماً  الحمل الكاذب بيكون بسبب تغييرات فى نظام الغدد الصماء فى الجسم ودا  يبؤدى إلى إفراز هرمونات بتسبب تغييرات جسدية شبه التغييرات اللي بتحصل  اثناء  الحمل.

علاج الحمل الكاذب: الحالة دي بتحصل بسبب سوء الحالة النفسية للأم و تسرع الرغبة في الإنجاب وهي حالة طبية غير خطيرة و ملهاش علاج دوائي أو جراحي لكن ممكن تلجأ الأم لطبيب نفسي يساعدها على تجاوز الحالة النفسية السيئة اللي بتمر بيها، وممكن تلجأ الأم لطبيب غدد لعلاج الغدد الصماء وضبط مستوى الهرمونات بالجسم.

2– سرطان المبيض:

  •  أعراض سرطان المبايض ممكن تكون شبه اعراض الحمل من أول غياب الدورة الشهرية مروراً بانتفاخ  البطن إلى زيادة الرغبة فى التبول المتكرر
  • سبب تشابه الأعراض  أن المبايض مسؤولة  عن إنتاج البويضات و زيادة إفراز هرمون البروجيسترون والاستروجين.
  •  أى أورام على أو داخل المبايض بتتداخل و بتأثر  على وظايف المبايض و بينتج عنها  إختلال في الهرمونات اللى بدورها هتعمل في إضطرابات فى الدورة الشهرية وباقى الأعراض اللى ممكن تخلي الأم تظن بالخطأ إنها حامل.

3-إضطرابات الغدة الدرقية:

  •  الغدة الدرقية بتتحكم فى عملية التمثيل الغذائى فى الجسم فلما بتتعرض لإضطرابات زى زيادة نشاط الغدة أو خمولها، ده ممكن يسبب أعراض جسدية تشبه أعراض الحمل
  • يُعتبر نشاط الغدة هو الأقرب و الأغلب فى الحالة دي  لأن الجسم بيميل لتسريع عملية التمثيل الغذائى بنفس الطريقة اللي  بيقوم بيها أثناء الحمل
  • ممكن اضطرابات الغدة الدرقية تتسبب في أعراض تانية زى اضطرابات الحالة النفسية واضطرابات  فى درجة حرارة الجسم الفسيولوجى وعدم انتظام  دقات القلب.

4 –الإضطرابات الهرمونية: ممكن تحصل بسبب:

  • خلل هرموني في أمراض الرحم والجهاز التناسلي المختلفة زي متلازمة تكيسات المبايض.
  •  تغيير وسيلة تحديد النسل ممكن يسبب ظهور أعراض تشبه اعراض الحمل زي تغييرات في الثديين أو ظهور إفرازات مهبلية تحتوي على دم.

ايه هى الخطوات لحمل صحى؟

في خطوات المفترض أخذها بعين الاعتبار مع بداية التفكير في الحمل والخطوات ده بنحاول نوصل بيها لأعلى فرصة للحصول على حمل صحى ومحاولة تجنب أخطاء ممكن  تسبب متاعب صحية للأم و  الجنين، لأن الحمل بيحتاج لفترة إعداد تسمى (فترة التخطيط للحمل).

ا- خطوة التخطيط للحمل: ده الوقت المناسب علشان تغييروا نمط حياتكم علشان يبقى ملائم لاستقبال  فرد جديد ،وهو من أهم المراحل اللي ممكن تأثر على الحمل، والأفضل تكون قبل الحمل ب ٣ شهور على الأقل.

و في الفترة دي  لازم نعرف الخطوات الصحيحة المفروض إتباعها قبل وأثناء الحمل الخطوات دي هتساعد في:

  • زيادة الخصوبة
  • تقليل المشاكل اللي ممكن تحصل أثناء الحمل زي ارتفاع ضغط الدم أو مرض السكر بسبب الحمل.
  • تساعد في الشفاء الجيد بعد الولادة.

ب- خطوة الأستعداد (ما قبل الحمل) :

1- الانتظام  على تناول حمض الفوليك (الفوليك أسيد) من قبل الحمل لأنه مفيد جدا لصحة الأم أثناء الحمل ومفيد لنمو صحى وطبيعى للجنين وتناوله من قبل الحمل هيوفر بيئة مناسبة لحدوث الحمل ويمكن الحصول عليه من خلال تناوله كدواء تحت اشراف الدكتور المعالج أو بتناول الأطعمة اللي بتحتوى عليه زي:

  • الخضروات(البروكلي-السبانخ-خس-مشروم-كوسة)
  • الفواكه(أفوكادو -والبرتقال)
  • البيض 
  • المكسرات

2- التوقف عن التدخين والكحول للزوجين هيكون خيار مهم لصحتهم وصحة أطفالهم

 3- النشاط البدنى: ممارسة التمارين الرياضية بانتظام  قبل الحمل هيقلل من خطورة زيادة الوزن عند الحامل و  هيساعد الجسم على  اكتساب  مرونة العضلات وده هيساعد بعد كده في الولادة وسرعة التئام  الجروح والتقليل من علامات التمدد اللي نتيجة كبر حجم البطن، وهيساعد كمان في التغلب على الأعراض المصاحبة للتغيرات الهرمونية زى تقلبات المزاج.

بس خدي بالك لازم تختاري  نوع الرياضة المناسب لفترة الحمل  و تبعدي عن  الألعاب الرياضية الخطرة واللي  بتحتاج  مجهود بدنى قوى و تختاري  رياضة  تفيد جسمك واللى ممكن تستمري  عليها أثناء الحمل زي المشي  والسباحة واليوجا.

4- حاولي تتجنبى ملامسة الحيوانات الأليفة عامة والقطط خصوصاً لإنها غالباً بتكون محملة بطفيل التكسوبلازما الإصابة بالطفيل ده قبل الحمل أو في المراحل الأولى من الحمل ممكن يسبب إجهاض أو ممكن يتسبب فى تدمير المخ،و الدكتور بيقدر يكتشفه بالتحاليل و يعالجه لو اكتشفه في مراحله الأولى. 

العناصر الغذائية المهمة للحامل:

  • الحديد مهم  أثناء فترة الحمل لأن جسم الحامل بيحتاج  لكميات كبيرة من الحديد علشان تتجنب الإصابة بمرض فقر الدم، وأشهر مصادر الحديد هي  اللحوم الحمراء والدواجن والأسماك والخضراوات الورقية الداكنة أو ممكن تاخديه  كمكمل غذائي تحت إشراف الدكتور المعالج.
  • الكالسيوم : مهم جدا قبل وأثناء الحمل و ممكن خلال  فترة ما قبل الحمل الاكتفاء بكمية كافية من المصادر الطبيعية للكالسيوم زي  كوب لبن يومياً أو كوب زبادى أو قطعتين من الجبن الأبيض.
  • فيتامين د : من العناصر المهمة لصحة الجسم والعظم، وموجود فى بعض الأغذية لكن بكمية بسيطة، و المصدر الرئيسى لفيتامين د هي أشعة الشمس في الفترة من الساعة ١٠الصبح لـ   ٣عصراً هى أنسب وقت للاستفادة  من أشعة الشمس و ممكن  تكتفي بإنك تعرضي  الوجه والكفين والذراعين، وتجنبي الأيام اللي فيها حرارة الشمس عالية علشان تبعدي عن خطر الإصابة بضربة الشمس.

ايه  الخطوات اللي ممكن تساعدك أثناء فترة الحمل؟

  1. متنسيش تفطرى ابداً الفطار وجبة مهمة جدا بتساعدك إنك تقدرى تقومى وتمدك بالنشاط.
  2. الافضل انك تقعدي شوية اول لما تصحي  لحد لما جسمك يظبط ضغط الدم . 
  3. النوم الكافى والراحة وابعدي عن  الأعمال الشاقة او انك تشيلي حاجات  تقيلة .
  4. اتأكدي  من صلاحية المنتجات الغذائية والدوائية لكِ كحامل لان بعض المنتجات بتكون ممنوعة فى فترة الحمل.
  5. تجنب تناول الأدوية المسكنة او الادوية بشكل عام الا بعض عرضها على الطبيب المعالج.
  6. المحافظة على الوزن والمتابعة الدورية مع الطبيب مهمة جداً.

المصادر:

ما هو الحمل

https://www.nichd.nih.gov/health/topics/pregnancy

تطورات الجنين أثناء الحمل

https://www.healthline.com/health/pregnancy/bodily-changes-during

اعراض الحمل

https://www.healthline.com/health/pregnancy

انخفاض ضغط الدم عند الحامل

https://academic.oup.com/humrep/article/16/1/13/3113872

ارتفاع ضغط الدم عند الحامل و تسمم الحمل

https://emedicine.medscape.com/article/261435-overview

ارتفاع ضغط الدم الحملي

https://www.stanfordchildrens.org/en/topic/default?id=gestational-hypertension-90-P02484

https://en.wikipedia.org/wiki/Hypertensive_disease_of_pregnancy

مخاطر قلة وزن الجنين عند الولادة

https://www.urmc.rochester.edu/encyclopedia/content.aspx?contenttypeid=90&contentid=p02382

سكر الحمل

https://en.wikipedia.org/wiki/Gestational_diabetes

تسمم الحمل

https://www.mayoclinic.org/diseases-conditions/preeclampsia/symptoms-causes/syc-20355745

حالات وأعراض تشبه أعراض الحمل لكنها مش حمل

https://www.bustle.com/articles/178872-3-conditions-that-look-like-pregnancy-but-arent

عادات صحية للحامل للحفاظ على صحتها وصحة الجنين.

https://www.pregnancybirthbaby.org.au/healthy-pregnancy

نصائح للأم للتخطيط لحمل صحي وسليم

https://www.pregnancybirthbaby.org.au/planning-for-your-pregnancy