معروف إن كل أعضاء الجسم وخلاياه مرتبطة ببعض ارتباط وثيق لدرجة لو تعب عضو باقي الأعضاء بتتأذى، 

وده بيدل إن في علاقة غريبة بين كل عضو وكل خلية، وعوامل مشتركة كتير بينهم..  

وزي ما أعضائنا مرتبطين ومترابطين، إحنا كمان لازم نكون ضمن حلقة الترابط دي، مهم نفهم ونعرف وندرس ونقرأ أكتر وأكتر عن أجسامنا واحتياجاتها ووظائفها، ندخل العالم الداخلي ده ونشوف بيشتغل إزاي 24 ساعة بدون ملل ولا زهق ولا تعب ولا حتى راحة!

أعراض كوم بتعرضلكم كل الحقايق الخفية عن أجسامنا، بتاخدكم في رحلات ممتعة بمعلوماتها ومدهشة بخبايها وملهمة بترابط أفكارها، إحنا في أعراض كوم هندخلك عالم جسمك الغامض وهنوجهك لحلول كتير تقدر تستخدمها لما تشتكي أو تتعب..

وكلمة سر العمليات الحيوية والقوة والصحة والنضارة والتركيز في أجسامنا ..هي (الفيتامينات والمعادن)

أنواع مختلفة لكل نوع وظيفة ودور مهم في الجسم لو نقص أو زاد عن الحد اللازم أجسامنا بتتأذى

أنواع مختلفة بيكملوا بعض علشان يوصلوا بأجسامنا لبر الصحة والآمان.

ومن أكتر من 60 نوع مختلف، أعراض كوم بتركز معاكم في المقال ده على نوع واحد مهم وضروري، نقص معرفة الناس بيه ممكن يوصل لأعراض مرضية كتير مش قادرين نعرف أسبابها أو نسيطر عليها..

مؤخرا انتشرت جملة  بين الناس ردا على تساؤل أي شخص بيعاني من مرض أو بيجيله أعراض تعب وإرهاق مختلفة وهي .. (حلل فيتامين د) .. إيه سر الجملة دي وهل فعلًا التحليل هو الحل!

متقلقش! مهما كانت المشكلة اللي عندك حلها مع أعراض كوم ..

في البداية تعالوا نعرف أكتر إيه هو فيتامين د

1- إيه هو فيتامين د؟

في جدل كبير بيدور عن حقيقة فيتامين د، هل هو فيتامين أم هرمون .. وسبب الجدل ده بيرجع للفرق بين تكوين الهرمون وتكوين الفيتامين،

وبكل بساطة .. الهرمون بيتم إنتاجه داخل الجسم، أما الفيتامين فبنقدر نحصل عليه من الطعام والشراب.

وبسبب جمع فيتامين د بين إنتاجه داخل الجسم وقدرتنا على الحصول عليه من مصادر خارجية، فهو هرمون بنكهة الفيتامين، وفي كلتا الحالتين هو مهم جدا لكل وظائف الجسم.

فيتامين د مهم جدا لصحة الجسم وخصوصا العظام والعضلات والأسنان، وده بسبب وظيفته الأساسية في امتصاص الكالسيوم اللي هو حجر أساس العظام والعضلات والأسنان، من الأمعاء.

السيكوسترويد – Secosteroid هو الاسم الكيميائي لفيتامين د، وهو مشتق من أسرة السترويد – Steroid المسؤولة عن تكوين الكوليسترول والهرمونات الأساسية في جسم الانسان زي هرمون الكورتيزول والهرمونات الجنسية.

السيكوسترويد أو فيتامين د هو من الفيتامينات اللي لها القدرة على الذوبان في الدهون،

ومن أشكاله الكيميائية: الكوليكالسيفيرول أو المعروف بفيتامين د3 وهو الصورة الفعالة لفيتامين د واللي مجرد دخولها للجسم بتقوم بوظايفها الحيوية من غير ما تمر بأي عملية كيميائية تانية، أما الشكل التاني اسمه إركوكالسيفرول أو المعروف بفيتامين د2، وهو نوع رخيص ومش فعال وصعب الامتصاص في الجسم.

والطريقة الطبيعية علشان يتكون فيتامين د هو عن طريق تعريض أجسامنا لأشعة الشمس، اللي بتصنع فيتامين د من الكوليسترول في الجلد.

2- إيه هي طرق حصول الجسم على فيتامين د؟

من خلال ثلاث طرق يقدر الجسم يحصل على فيتامين د، وهم:

أ- عن طريقة الأشعة الفوق بنفسجية اللي بتوصلنا مع أشعة الشمس، وده بيتم عن طريق تعريض الجلد لأشعة الشمس لمدة بتتراوح من 15 – 20 دقيقة ثلاث مرات في الإسبوع،

في الجلد مادة اسمها (ديهيدروكوليستيرول-7 Dehydrocholesterol-7) ولما بنتعرض لأشعة الشمس بتتحول المادة دي لمادة تانية اسمها (الكوليكالسيفيرول – Cholecalciferol) .. بتنتقل المادة دي مع الدم لحد ما توصل للكبد، وفي الكبد إنزيم (ألفا هيدروكسيليز-25) واللي بدوره بيعمل على تحفيز مادة الكوليكالسيفيرول وتحويلها لمادة اسمها (هيدروكسي كوليكالسيفيرول-25) – (hydroxycholecalciferol- 25).

وبعد كده بتنتقل المادة المحفزة دي للكلى واللي بيحتوي على إنزيم (ألفا هيدروكسيليز-1) واللي بيحفز تاني الهيدروكسي كوليكالسيفيرول-25 وبيحولها للصورة النهائية اللي محتاج ليها الجسم والي اسمها ديهيدروكسي كوليكالسيفيرول -1.25 .. أول اللي معروفه ب فيتامين د3 أو (كالسيتريول – Calcitriol).. وهي دي رحلة تحول فيتامين د من صورة أولية غير نشطة للصورة النشطة المهمة لكل الوظائف الحيوية في جسم الانسان.

ب- عن طريق الأغذية الغنية بفيتامين د،

وهنا برضو الفيتامين الداخل للجسم لازم يمر بعمليات في الكبد والكلى عشان يحوله من صورته الغير نشطة لصورته النشطة ويقدر يكون جاهز لعمل وظيفته، بيدخل الكبد وبيتم عملية (الهيدروكسلة – Hydroxylation) والي بينتج عنها هيرزكسي الفيتامين- 25،

بتنتقل المادة دي في الدم وتصل للكلى وهناك بيخصل عملية هيدروكسلة إضافة للمادة وبينتج ثنائي هيدروكسي الفيتامين- 1.25 .. وهي دي الصورة النشطة لفيتامين د والجاهزة للانطلاق وعمل وظائفها الحيوية في أجسامنا.

د- عن طريق المستحضرات الدوائية،

الأطباء بيحذرونا من إننا ناخد فيتامين د2 وده بسبب إنه صناعي ونسبة امتصاصه في الجسم قليلة جدا بتوصل ل 1-3% وبيرهق الجسم عشان يتحول لفيتامين د3

بالتالي فإن الأطباء بينصحونا إننا ناخد فيتامين د3 بعدد وحدات 5000 وحدة يوميا، مع العلم إن احتياج الجسم اليومي بيتراوح من 1500 – 2000 وحدة يوميا، لكن الجسم مبيقدرش يمتص كل الكمية دي وبياخد احتياجه فقط والباقي بيطلع من الجسم مع المخرجات، وعلشان تاخد كبسولات فيتامين د3 مهم جدا أكل أي حاجة فيها دهون زي الزيت زيتون أو الأفوكادو وده بسبب العلاقة الوثيقة بين فيتامين د3 والدهون اللي بيساعده في عملية امتصاصه بسرعة.

الجدير بالذكر هنا إن أسلم طريقة علشان تشبع احتياجات جسمك لفيتامين د هو تعريض جلدك لأشعة الشمس، وده لإنه في المدة ما بين 15- 20 دقيقة وتحديدا من 11 الصبح ل 2 الظهر، هو بيوفرلك الكمية الصحية اللي محتاجلها الجسم، في حين تناولك أي أغذية أو كبسولات دوائية لتوفير فيتامين د لجسمك في احتمالية إن نسبة الفيتامين يزيد في جسمك لمعدلات ضارة، وده الي بيقدر يتحكم فيه الجلد بحيث إنه بياخد احتياجه فقط.

3- إيه اللي بيميز فيتامين د عن باقي الفيتامينات؟

– كل خلايا الجسم موجود فيها مستقبل لفيتامين د بالتالي فهو بيشتغل على كل خلايا الجسم.

– فيتامين د هو الفيتامين الوحيد اللي بيقدر الجسم يصنعه عن طريق تعريض الجلد لأشعة الشمس، وده بسبب أهميته الكبيره جدا في أجسامنا.

– فيتامين د اسمه Pre- Hormone يعني مرحلة ما قبل تصنيع الهرمون، وده لإنه بيدخل في تكوين هرمونات كتير في الجسم زي هرمونات الذكورة والأنوثة والكورتيزول.

4- إيه هي أهمية فيتامين د في الجسم؟

فيتامين د مهم جدا وده بسبب إنه مسؤول عن عملية امتصاص الكالسيوم والفسفور اللي موجود في الأمعاء وبيوصله للدم، بالتالي من غير فيتامين د الكالسيوم في اجسامنا الدم مبيقدرش يمتصه وكده الكالسيوم اللي هو حجر أساس العظام والأسنان يعتبر مالوش أي قيمة!

كمان فيتامين د له دور في أجهزة كتير في أجسامنا، زي الجهاز العصبي والعضلي وكمان الجهاز المناعي.

5- إيه هي علاقة فيتامين د بفيتامين ك2 وفيتامين ف؟

بعد ما بيتم امتصاص الكالسيوم من الأمعاء وتوصيله للدم عن طريق فيتامين د، بيجي هنا دور فيتامين ك2 اللي بياخد الكالسيوم اللي في الدم من الأوعية الدموية والأنسجة وبيوصله للعظم والأسنان ومنع ترسبه في الجسم اللي فيه خطر كبير على الجسم،

أما فيتامين ف فهو بياخد الكالسيوم من الدم وبيوصله للجلد، بالتالي هو بيقدر يحمي الجلد من أي التهابات أو أمراض ممكن الجلد يتعرض لها.

ومن هنا نلاحظ إن أساس عمل فيتامين ك2 وفيتامن ف قايمة على فيتامين د وامتصاصه للكالسيوم، واللي من غيره ممكن يصاب الجسم بأمراض مختلفة.

6- إيه هو مرض نقص فيتامين د؟

مرض نقص فيتامين د أو ممكن نسميه Hypovitaminosis D، معناه إن جسمك بيفتقر لوجود النسبة الصحية من فيتامين د، نتيجة عدم التعرض لأشعة الشمس أو عدم أكل الأطعمة اللي بتحتوي تلى فيتامين د واللي بتقدر تحافظ على توازن الجسم، وعملياته الحيوية تفضل مستمرة بشكل صحي.

7- إيه هي آلية عمل فيتامين د في الجسم وامتى بيكون فعال وقادر على القيام بعملياته الحيوية؟

– تحت الجلد موجود مركل كيميائي اسمها 7-Dehydrocholesterol وبنسميها Provitamine وهي مادة مصنوعة من الكوليسترول، وهي دي الصورة البدائية لفيتامين د.

– مجرد تعرض الجلد لأشعة الشمس خصوصا الأشعة الفوق بنفسجية، هتتحول المادة دي لفيتامين د3 لكن في شكل غير فعال، هيدخل في الجسم ويتحول لشكله الفعال.

– أول مرحلة: بيتم تجميع فيتامين د3 من الجلد ومن الأكل أو الدواء اللي اخدته في الكبد، بيفرز الكبد إنزيم اسمه 25- Hydroxlase الإنزيم ده هيعمل عملية إسمها Hydroxlyation.

– المرحلة الثانية: الكبد هيطلعلنا 25- hydroxyvitamine وهو صورة غير نشطة من فيتامين د، هيدخل للكلي وهيحصله عملية Hydroxlyation تاني وهتحوله للصورة النشطة من فيتامين د3 واللي بنسميها 1.25 – dihydroxyvitamine D3.

– وعلشان كده بنقول على فيتامين د إنه هرمون، لإنه بيشبه الهرمونات من حيث إنه اتكون في مكان واتنشط في مكان ووظيفته الحيوية هتكون في مكان تالت خالص.

– مريض الكبد لازم ياخد جرعات من فيتامين د في صورة 25- hydroxyvitamine D3 في حالة تنشيط مش محتاجة للإنزيم اللي هيفرز من الكبد.

– ولو كمان الكلى تعبانة فلازم ياخد الصورة النهائية الفعالة من فيتامين د3 عشان ميرهقش كليته في فرز إنزيمات لتحويل الفيتامين لشكل فعال.

8- إيه الكمية المناسبة اللي بيحتاجها جسمك من فيتامين د؟ 

كمية فيتامين د اللازم توفرها في الجسم بتختلف بإختلاف العمر، فيتامين د في جسم الأطفال بتختلف عن المراهقين عن البالغين عن الكبار في السن وكمان بتختلف عن الأم الحامل، والكمية اللي أشار ليها الأطباؤ لكل فئة عمرية بالوحدة الدولية IU هي:

– الأطفال من عمر الولادة ل 12 شهر،

الكمية الموصى بيها بتتمثل في 400 وحدة دولية.

– الأطفال من عمر سنة إلى 13 سنة،

الكمية الموصى بيها بتتمثل في 600 وحدة دولية.

– الشباب من سن المراهقة من عمر 14 إلى 18 سنة،

الكمية الموصى بيها بتتمثل في 600 وحدة دولية.

– البالغون من سن 19 إلى 70 سنة،

الكمية الموصى بيها بتتمثل في 600 وحدة دولية.

– البالغون من عمر 71 سنة وأكتر،

الكمية الموصى بيها بتتمثل في 800 وحدة دولية.

– النساء الحوامل أو المرضعات،

الكمية الموصى بيها بتتمثل في 600 وحدة دولية.

في حالات ممكن تحتاج لكمية أكبر من فيتامين د وده بيرجع لنسبة الخطر اللي بيتعرضلها الجسم واللي بتؤدي لنقص فيتامين د، علشان كده مهم تتابع مع طبيب يوصفلك النسبة المناسبة واللي جسمك محتاج ليها.

9- إيه الأسباب اللي بتعرض جسمك لنقص في فيتامين د؟ 

في أسباب كتير مختلفة لو اتعرض لها الجسم هيحصله نقص في فيتامين د .. ومن الأسباب دي:

– جسمك مبيتعرض بشكل كافي لأشعة الشمس.

– الأكل اللي بتتغذى عليه مابيحتويش على الكمية الكافية من فيتامين د.

– عندك مشكلة في امتصاص الطعام اللي بيحتوي على فيتامين د.

– عندك مشكلة في الكبد أو الكلى واللي ليهم دور مهم في تحويل فيتامين د لشكله الفعال في الجسم.

– إنك تكون من الفئة الأكثر عرضة لنقص فيتامين د زي:

1- الحوامل والمرضعات.

2- الأطفال من عمر 6شهور – 5سنوات.

3- اصحاب البشرة الغامقة.

4- السن، كل ما السن كبر كل ما أدى لنقص فيتامين د.

5- اللي بيعانوا من حساسية للحليب ومبيقدروش يتحملوا اللاكتوز.

6- الناس اللي بتعيش في مناطق الشمس فيها قليلة، أو بنسميها بالمناطق الباردة.

7- اللي بيعانوا من زيادة الوزن والسمنة.

10- إيه هي أعراض نقص فيتامين د؟

نقص فيتامين د أعراضه كتير ومختلفة ممكن تغفل عنها أو متكونش مدرك بالظبط التعب ده سببه إيه ..

وعلشان كده أعراض كوم هاتعرضلك أعراض نقص فيتامين د للأطفال والنساء والرجال وكمان كبار السن، ومن خلالها تقدر تشك لو المرض اللي بتعاني منه أو بيعاني منه طفلك سببه نقص نقص فيتامين د ولا لا.

-(أعراض نقص فيتامين د للأطفال) :

لما بينقص معدل فيتامين د في جسم الطفل عن المعدل الطبيعي بيظهر علامات تفهمك إن في خطر لازم تلحقه، وده بسبب إن فيتامين د هو المسؤول عن امتصاص الكالسيوم من أمعاء الطفل وتجهيزه وتوصيله للعظام، وفي حين إن فيتامين د قل بالتالي امتصاص الكالسيوم هيقل بالتالي هيصاب الطفل بأمراض مختلفة، أعراضها بتكون:

1- هتلاحظ إن رأس طفلك لين،

في الطبيعي رأس الطفل لما بيتولد بيكون لين وعظم الرأس بيبدأ يلحم والرأس تكون قوية لما الطفل يوصل لعمر 19 شهر، وده في الحالة الصحية الطبيعية.

أما في حالة تقص فيتامين د رأس الطفل بيفضل لين وعظمه مش قوي وده ممكن يصيب الطفل بأخطار كتير في الجمجمة.

2- هتلاحظ تشوه في عظم طفلك،

نقص فيتامين د هيؤدي لنقص الكالسيوم اللي هو حجر أساس العظام، وده هيأثر على نمو الطفل وكمان هيظهر تشوهات كتير في العظم زي التقوس للساقين أو انحناء في الظهر أو هتلاقي عظم الصدر بارز بشكل مش طبيعي.

3- هتلاحظ إن جسم طفلك وأوضاع نموه الطبيعي بيتأخر،

مثلا مش هيقدر يقعد لوحده أو زحفه ومشيه يتأخروا عن الوقت الطبيعي، وكمان ممكن تلاحظ إن أطرافه بيحصلها ورم.

4- هتلاحظ إن عضلات طفلك ضعيفة وممكن يعبر عن وجع وألم في عظمة،

وده هتشوفه لما تلاقي طفلك مش قادر يرفع رأسه أو يتحكم في جسمه لما يزحف ومزاجه المتعكر وبكاءه كاتعبير عن إحساسه بألم في عظمه وعضلاته لما يبذل مجهود.

5- هتلاحظ إن رأس طفلك بيعرق بطريقة مبالغ فيها.

-(أعراض نقص فيتامين د للنساء) :

نقص فيتامين د دايما مصاحبه إرهاق وتعب ومزاج متغير، ومن أعراض نقصه عن النساء:

1- هشاشه في العظام، وضعفها اللي بيأدي لحصول كسور بسهولة وبشكل متكرر.

2- تعب وضعف في عضلات الجسم والإحساس بوجع مستمر فيها.

3- مزاج معكر وقلق واكتئاب وعصبية وارهاق حتى لو الجسم أخد كفايته من النوم والراحه.

4- ارتفاع ضغط الدم.

5- ممكن يؤدي للعقم.

-( أعراض نقص فيتامين د عند الرجال وكبار السن) :

1- مزاجك مش رايق ودايما حاسس بإكتئاب وعندك صداع بشكل مستمر،

على الرغم من إن العلماء لسه موصلوش لطبيعة العلاقة أو السبب الرئيسي بشكل واضح، إلا إن تفسيراتهم كانت بتدور حوالين دور وتأثير فيتامين د على مراكز الدماغ ودوره في تكوين هرمون السيروتونين واللي بيلعب دور مهم في التأثير على المزاج.

2- مرهق وحاسس بتعب وخمول،

وهنا في علاقة مهمة بين قوة العضلات وفيتامين د، بحيث إن نسبة فيتامين د الصحية في الجسم بتحافظ على القوة في الألياف العضلية وبتقلل الإحساس بالتعب والإرهاق.

3- حاسس بتعب وألم مزمن في العظام والعضلات،

وهنا فيتامين د بيتدخل بشكل أساسي فالإحساس بالتعب في العظام م والعضلات، وده بسبب دوره المهم في امتصاصه للكالسيوم والفسفور اللي بيحتاج ليهم عظامنا وأسنانا وعضلاتنا، وانخفاض نسبة فيتامين د في الجسم بتؤدي لإنخفاض امتصاص الكالسيوم، وده بيخلي الجسم يضطر لإنه يسحب كالسيوم من العظام عشان يغطي احتياج الدم لوجود كالسيوم فيه، وده طبيعي بيخلي عظامنا أقل قوة وبيسبب مرض هشاشة العظام.

4- بتعرق بسرعة ومن أقل مجهود،

لو كنت بتعرق بسرعة ومن أقل مجهود وفي درجات حرارة معتدلة، خلي بالك إنت ممكن تكون بتعاني من نقص في فيتامين د.

5- بيحصل كسر لعظامك بشكل سهل،

نقص فيتامين د بيرتبط ارتباط وثيق بخطر الإصابة بمرض هشاشة العظام للبالغين أو الكساح وتشوهات العظام للأطفال، والسبب بيرجع لإنه المسؤول عن امتصاص الكالسيوم واللي مهم جدا في قوة العظام، خليك حريص دايما على المخافظة على نسبة فيتامين د الصحية في جسمك عن طريق التعرض لأشعة الشمس أو من الأكل أو من المستحضرات الدوائية.

6- دايما حاسس إنك مريض ودور البرد بيجيلك كل شوية وبيقعد معاك فترات طويلة،

فيتامين د ليه دور مهم في الجسم لإنه بيقدر يحافظ على المناعة في الجسم، بالتالي الجسم هيقدر يكافح أي فيروس أو التهاب ممكن يصيبك .. ونقصه هيخليك عرضه بشكل أكبر للأمراض زي إلتهاب الشعب الهوائية والالتهاب الرئوي ونزلات البرد.

7- عندك مشاكل جلدية،

وده بيرجع لعلاقة فيتامين د وفيتامين ف المسؤول عن حماية الجلد من الأمراض.

8- حاسس إن وزنك بيزيد بطريقة غريبة،

وجود فيتامن د بنسبة صحية في الجسم بيقلل من نسبة زيادة وزنك، وده لإنه بيلعب دور مهم في تكوين الهرمونات ومن ضمنهم الهرمونات المسؤولة عن تخزين الدهون في الجسم.

9- أي جرح في الجلد بيلم ببطء وصعوبة،

فيتامين د ببساهم في انتاج مركبات بتساعد في عملية التئام الجروح وتكوين جلد جديد، كمان بيقدر يكافح العدوى وبيسيطر على الالتهابات.

10- بتعاني من تساقط الشعر،

من أسباب تساقط الشعر نقص فيتامين د وده سبب بيغفل عنه كثير مننا، خصوصا إن الأسباب الشائعة لتساقط الشعر هو يا إما وراثة أو بسبب التوتر.

بتواجه مشكلة من المشاكل دي؟ متقلقش الموضوع مش خطير لو قدرت تسيطر عليه في الوقت المناسب.

 

11- إيه هي الأمراض والمشاكل اللي ممكن تصيب الجسم نتيجة لنقص فيتامين د؟

لكل مرض مؤشرات وأعراض بتقولك انتبه إنت لازم تاخد خطوة وتلحق جسمك، في حالة إنك اهملت جسمك رد فعله عليك ممكن تكون عنيفة وتوقعك في خطر أمراض كتير .. ومن الأمراض الناتجة عن نقص فيتامين د :

– كثافة العظام بتقل وده بيأدي لهشاشتها وقلة قوتها واللي بيخليها عرضه بشكل أكبر للكسور.

– بالنسبة للأطفال، النقص الشديد في فيتامين د ممكن يؤدي لمرض الكساح واللي معروف بلين شديد في العظام بيسبب تشوهات وتقوس في العظام.

– أما البالغين، النقص الحاد في فيتامين د بيؤدي لمرض هشاشة العظام واللي من أعراضه سقوط وكسور متكرره وضعف في العضلت وألم في العظام.

– أمراض كتير مختلفة زي ارتفاع في ضغط الدم، ومرض السكر وأمراض المناعة الذاتية زي التصلب المتعدد للشرايين ومرض السرطان والسمنة وأمراض القلب المختلفة، لسه تحت الدراسة والأبحاث من قبل الأطباء والعلماء مستمرة عشان يدرسوا العلاقة بين نقص فيتامين د وحقيقة اتصالها بالأمراض دي، لكن إلى الآن كلها شكوك بتدور حول ارتباط نقص فيتامين د بالأمراض دي.

– إصابتك بمرض الخرف أو المعروف بإسم الزهايمر،

مع زيادة عمرك لازم تهتم بعمل تحاليل بشكل مستمر علشان تطمن على نفسك وخصوصا على نسبة فيتامين د، وده لإن انخفاضه هيسببلك مرض الزهايمر بنسبه ممكن تصل ل 53%.

– الفصام (Schizophrenia)،

وهو مرض بيؤدي لاضطراب حاد في الدماغ ومن أعراضه:

– الهلوسة

– ابتعادك عن أي علاقات اجتماعية

– قلة التركيز وعدم الانتباه

وطبقا لدراسة نشرت في مجلة علمية – Journal of clinical endocrinology& metabolism اثبتوا العلماء إن في علاقة كبيرة بين نقص فيتامين د وأعراض مرض الفصام، وكمان لاحظوا إن المرض ده بيصيب الناس اللي بيعيشوا في الأماكن الباردة واللي الشمس فيها قليله جدا وده مرتبط بشكل مباشر بنقص فيتامين د.

فيتامين د أو زي ما أطلقوا عليه الناس بفيتامين الشمس، مهم جدا وبيدخل في عمليات حيوية كتير في الجسم، وبسبب ترابطة بكل خلية في أجسمانا ومهمته في تكوين هرموناتنا ودوره في امتصاص الكالسيوم .. كل ده بيأكدلنا إن نقصه في أجسامنا ممكن يعرضنا لأخطار وأمراض كتير إحنا في غنى عنها، عشان كده خليك محافظ على نسبته الصحية في جسمك واحفظ نفسك من أزمات مرضية ممكن تصيبك.

12- إزاي أقدر اكفي جسمي بإحتياجه لفيتامين د واحميه من الإصابة بالأمراض؟

مصادر فيتامين د للجسم زي ما ذكرنا قبل كده بتتقسم لثلاث مصادر،

من ضمنها الأطعمة، واللي هي مصدر طبيعي وآمن للجسم وغني كمان بفيتامين د، ومن ضمن الأطعمة دي:

– الأسماك الدهنية وأنواعها بالتحديد زي سمك السالمون والتونة والماكريل.

– كبدة البقر.

– الفطر أو اللي مشهور بينا بالماشروم.

– صفار البيض

– الحليب ومنتجاته

– عصير البرتقال

– والمشروبات اللي بتحتوي على الصويا

13- تتعرض للشمس إمتى وإزاي علشان تستفيد منها بشكل صح وجسمك يقدر يكفي نفسه بطريقة طبيعية من فيتامين د؟

التعرض للشمس وكميته وكيفيته بيختلف من شخص لآخر وده طبقا لعوامل مختلفة، منها:

1- لون البشرة، وده معناه إن لون البشرة الغامق واللي صبغة الميلانين فيه بتكون بصورة أكبر بتحتاج لإنها تتعرض لأشعة الشمس لفترة أكبر من لون البشرة الفاتح.

2- مدة التعرض للشمس بتتراوح من 15 – 20 دقيقة.

3- الوقت المناسب للتعرض بتكون من 11 الصبح ل 2 الظهر.

4- شهر نيسان وأكتوبر هما أفضل الشهور لتعرض للشمس.

5- حاول تقلل من استخدامك للواقي من الشمس علشان هو بيمنع الأشعة المهمة من إنها توصل لجسمك، وبينصح الأطباء استخدام واقي الشمس بنسبة حماية متقلش عن 15 SPF.

14- هل في أغذية بتزود من حدة المرض؟ وإيه هي؟

زي ما في أغذية ليها فوائد في أغذية برضو الفرط في تناولها بيعمل أضرار كبيرة على الجسم كله، ومن الأغذية اللي زيادتها بيأثر على نقص فيتامين د في الجسم، هي:

1- الشاي والقهوة.

2- الأكل اللي بيحتوي على ألياف عالية، زي البقوليات والمكسرات والنوع ده من الأغذية بيسبب عسر هضم وامتصاصها بيكون صعب.

3- ادوية منع الحمل.

4- المضادات الحيوية.

5- الاسبرين.

حاول بقدر الإمكان تستخدم الوسائل الصحية الطبيعية وتعود جسمك على شكل حياة صحي من مصادر طبيعية واتجنب الفرط في تناول أغذية أضرارها بتكون أكبر بكتيير من فوائدها، وخلي الحلول الكيميائية هي أخر الحلول عشان تضمن تعيش حياتك بآمان صحي أكبر.

15- امتى تقرر تروح للطبيب؟

قرارك بزيارة الطبيب لازم يجي لما:

1- تحس بضعف في عضلاتك وعظامك ويزيد احساسك بالألم والتعب فيهم.

2- يجيلك تعب وإرهاق وصداع بشكل قوي ومستمر.

3- لو كنت من كبار السن وبيحصلك سقوط بشكل مستمر وضعف بشكل مفاجيء.

4- يزورك أمراض بشكل مستمر وإحساسك إن مناعتك بدأت تقل ودور البرد بيتكرر عندك بشكل مبالغ فيه.

5- عظامك تبدأ تظهر وتبرز خصوصا عظام العمود الفقري والرجل.

16- لو الطبيب مكتشفش إن عندك نقص في فيتامين د وبدأ يشخص أعراض مرضك بطريقة غلط، إيه اللي ممكن يحصل؟

1- للأطفال،

هيصاب الطفل بمشاكل كبيره في عظامه واللي منها تشوهات وتأخر في نمو العظام ونموها بشكل ضعيف، وده هيؤدي لإصابة الطفل بمرض الكساح وتقوس عظام الساق، وظهور نتوءات على عظام الصدر، وتشنج العضلات، وكل ده بسبب نقص الكالسيوم اللي مقدرش الجسم يمتصه بسبب نقص فيتامين د .. والي الطفل حالته زادت سوء بسبب تشخيص خاطيء من الطبيب.

2- الشباب البالغين،

عدم تشخيص الحالة بطريقة صح، هيؤدي لأمراض كبيرة عند الشباب منها تخلخل العظام وخلل في العمود الفقري والفخد، وكمان هيتنخغض كثافة العظام لدرجة ممكن تسبب تقوس للساق وانحناء في الظهر، وهو سبب في ضعف العضلات وبيرفع من نسبة حدوث كسور للعظم.

3- كبار السن،

لو الطبيب مكتشفش إن شكوى المريض سببها نقص فيتامين د، ده هيؤدي لحدوث هشاشة في عظامه، واللي بينتشر أكثر في النساء بعد سن اليأس، واللي بسببه هيعاني المريض من الالم مزمنة في عظامه وعضلاته وعظامه هتكون هشه ولينه وسهله الكسر.

علشان الأسباب دي، خليك حريص جدا وإنت بتراجع طبيبك، واهتم بكل الأعراض اللي ممكن توحيلك بإنك مصاب بمرض نقص فيتامين د اللي علاجه هيكون أسهل وأسرع بكتير من إهمالك اللي ممكن يصيب حياتك وجسمك بضرر كبير.

 17- إيه الأمراض المرتبطة بنقص فيتامين د؟

1- مرض السمنة،

نقص فيتامين د في الجسم بيؤثر على الهرمونات المسؤولة عن تخزين الدهون في الجسم، وده بيؤدي لمرض السمنة.

2- مرض السكر،

وده بسبب الاضطرابات اللي بتحصل أثناء فرز الأنسولين.

3- أمراض القلب.

4- مرض الذئبة.

5- مرض التهاب الأمعاء.

6- مرض الأكزيما.

7- تسوس الأسنان عند الأطفال.

8- الزهايمر

9- عدوى المسالك البولية.

10- الربو

11- انفصام الشخصية والإكتئاب

12- هشاشة العظام والكساح

13- الضعف اللغوي والتخاطب للأطفال.

14- السرطان

كل الأمراض دي في منها اللي برتبط ارتباط وثيق بنقص فيتامين د زي هشاشة العظام وتسوس الأسنان والكساح، وفي منها اللي لسه العلماء والأطباء بيبحثوا عن مدى قوة علاقة نقص فيتامين د بيهم .. وإلى ان يتم اكتشاف السر خليك محافظ على نفسك وخلي دايما بينك وبين أي أعراض مرض خطوات كبيرة من الصعب إنك تتعداها.

18- إزاي أعالج نقص فيتامين د في جسمي؟

طريقة العلاج بتختلف من جسم لآخر ومن حالة للتانية وكل حابة بتتجه للطريقة اللي جسمها هيتقبلها وهتكون مناسبة ليه، وطرق العلاج بتنقسم لطريقتين وهما:

طريقة العلاج ممكن تكون طبيعية وممكن تكون طبية،

1- الطريقة الطبيعية:

– لازم تعرض جسمك لأشعة الشمس في مدة تتراوح بين 15 – 20 دقيقة وفي وقت ما بين 11 الصبح ل 2 الظهر.

– ركز في أكلك على كل الأطعمة اللي بتحتوي على فيتامين د زي الأسماك الدهنية، وكبد البقر، وصفار البيض.

2- الطريقة الطبية:

– وهو إنك تاخد جرعات من فيتامين د3 الموجودة في

كبسولات دوائية، أو عن طريق الحقن في الوريد.

وزيت كبد الحوت اللي متوفر في كبسولات في الصيدليلات.

19- هو ممكن فيتامين د يكون سام للجسم؟

زي ما في أضرار لنقص فيتامين د في الجسم، في كمان أضرار كبيرة جدا لزيادة نسبته عن حاجة الجسم وده اللي بنسميه تسمم ناتج عن الإفراط في معدل فيتامين د في الجسم،

ومن علامات تسمم الجسم بفيتامين د:

الغثيان والتقيء، شهية ضعيفة للاكل، إمساك، احساس بالضعف وكمان هتلاقي وزنك بيقل بشكل مفاجيء..

ومن أضرار زيادة فيتامين د في الجسم إنه ممكن يسبب تلف في الكبد والكلى، وكمان بيرفع من معدلات ونسبة الكالسيوم في الدم وده ممكن يسبب مشاكل كبيرة في القلب.

زيادة نسبة فيتامين د في الجسم سببه بيكون إفراطك في أخذ كبسولات فيتامين د أو إنك بتتناولها بشكل مش صحيح ومن غير استشارة طبيب،

لكن لو بتتعرض للشمس لوقت كبير فمتقلقش، جسمك قادر يتحكم بشكل طبيعي في النسبة اللي بيحتاجها من فيتامين د ومش ممكن تزيد عن الحد الطبيعي.

20- إزاي تقدر تتعايش مع نقص فيتامين د في جسمك؟

لو قررت تتعايش مع مرض نقص فيتامين د في جسمك، فخليك متأكد إن ده بسبب ضعف إراده منك .. وده لإن المرض علاجه موجود وبين إيديك وحواليك، تقدر تتغلب عليه بكل سهولة بحرصك واهتمامك بصحتك، أعراض كوم بتنصحك بإنك متقررش تتعايش مع المرض لكن قرر تتغلب عليه وعالجه وامنح جسمك فرصته فإنه يعيش حياته بصحة وراحه وده هينعكس على نفسيتك بشكل كبير وهتلاحظ الفرق.

21- إيه المفاهيم الخطأ اللي انتشرت عن نقص فيتامين د؟

أهمية فيتامين د للجسم كبيرة وعظيمة، ونقصه بيعمل ضرر كبير بالجسم وفي احتماليه في إنه يصيب الجسم بأمراض كتير زي اللي ذكرناها في مقالنا، لكن اللي لازم نعرفه كويس إن بكل الأهمية دي في حقيقة واحده واضحة وصريحة مرتبطة بشكل وثيق بفيتامين د،

وهي إنها العامل الأساسي في امتصاص الكالسيوم، واللي بدوره بيقوم بوظايف كتير مهمة زي صحة العظام والأسنان والعضلات وحماية الجلد من الأمراض،

وأي أعراض تانيه هي جايز تكون مرتبطة بيه لكن مفيش دليل طبي واضح وصريح بيجزم بده، فمتخليش الشائعات اللي انتشرت عن فيتامين د والضجة الكبيرة اللي حصلت حواليه تخليك مقتنع إنه سبب لكل الأعراض اللي بتحس بيها،

لكن الأفضل إنك تفضل في منطقة الأمان، وتحافظ على نسبته الطبيعية في جسمك بالشكل طبيعي وتخلي الحلول الصناعية الكيميائية هي آخر حل ممكن تلجأله.

وعلشان تضمن تعيش حياتك بشكل صحي وبعيد عن الأطباء وتشخيصاتهم الكتير، أعراض كوم بتنصحك إنك تلتزم ببقاء فيتامين د بالنسبة الصحية والمعدل اللي بيحتاج ليه الجسم من 1200 وحدة ل 2000 وحدة بشكل يومي، واللي هنلاقيها بسهولة في تعرضنا لأشعة الشمس أو في الأغذية الغنية بفيتامين د، أو حتى في كبسولات فيتامين د3.

ابني جيش قوي يحمي جسمك من أعراض مرضية هتأذي نفسيتك وهتدمر أعضاءك، ابني جيش يدافع عن جسمك لما يتعرض لأذى أو لما يحس حتى بوجود أذى، ومتنساش إن الجيش ده إنت اللي بتبنيه بقراراتك وشكل حياتك وأغذيتك والمحافظة على نسب كل الفيتامينات وعلى رأسهم فيتامين د بصورة طبيعية صحية، ابني جيشك دلوقتي ودربه بشكل صحي .. وهو هيحميك بعدين وهيقدر يبعدك عن أي خطر ممكن تتعرض له..