) أو جرثومة المعدة زى ما هو معروفHelicobacter Pylori الملوية الدودية(

خلينا الأول نعرف يعني معدتنا دى عبارة عن ايه، وهى عبارة عن كيس عضلى فى تجويف البطن متبطن من جواه ببطانة سمكية تحمى جدرانه من العصارة الحمضية إنها تسبب تآكله، وظيفة المعدة استقبال الطعام وهضمه، المعدة متصل أولها بالمرئ و أخرها متصل بالإثنى عشر.

طيب وايه حكاية الجرثومة دى؟

-عبارة عن نوع من البكتيريا ليها شكل حلزونى وبتعيش بالتحديد في جدار المعدة والإثنى عشر وبتهاجم بطانتهم، فى جالات الإصابة الخفيفة بيها مش بتكون ضارة و ممكن الشخص ميكتشفش إصابته بيها خالص. الجرثومة دى هى الأكثر انتشارا بين سكان العالم كله و منظمة الصحة العالمية عندها احصائيات إنها بتصيب أكثر من نصف سكان العالم وكمان إنها الأخطر لأنها أحد المسببات الرئيسية لقرحة المعدة وسرطان المعدة فى حالة المضاعفات الشديدة.

نتيجة إصابةالجسم بجرثومة المعدة:

الجرثومة هى أحد المسببات الرئيسية لقرحة المعدة والإثنى عشر وده لأنها بتعيش في الخلايا المبطنة لجدارهم وبكده بتسبب تلف للبطانة دى، العصارة الهضمية بتكون حامضية وبما إن الجرثومة بتعيش في جدارها فبتقاوم العصارة بإفرازها إنزيمات معينة وبكده بتزيد حساسية جدار المعدة و الإثنى عشر وبيكون سهل إنها تخترقهم وتسبب حفر في الجدار و دى بيطلق عليها اسم ( قرحة).

جرثومة المعدة والقرحة والعلاقة بينهم:

أولا تعريف كل مرض من دول:

جرثومة المعدة/ دى زى ما ذكرنا نوع بكتيريا يصيب بطانة المعدة أو الإثنى عشر وتسبب تلف للبطانة وتنشأ منها قرحة المعدة فى حالة المضاعفات الشديدة. والجرثومة بتيجى من مشاركة الشخص المريض فى أكله أو ملامسة برازه.

القرحة/ القرحة عبارة عن تلف في بطانة المعدة بيسبب ثقوب حمرا فيها بنسميها القرحة. والقرحة ليها كذا سبب منها مثلا شرب مفرط للكحوليات و التدخين وأسباب كتيرة تانية.

طيب كده ممكن واحدة فيهم تسبب التانية ولا لا؟؟

الأبحاث كلها أثبتت إن وجود الجرثومة بيسبب قرحة المعدة فى حالة المضاعفات وتأخر العلاج لكن وجود القرحة مش بالضرورة سبب لوجود الجرثومة لأن زى ما قولنا أسباب القرحة كتيرة جدا والجرثومة جزء منها.

إيه الأعراض اللى تنبهنى لإصابتى بالجرثومة؟

طبعا زى ما قولنا إن أكتر من نص سكان العالم مصابين بالجرثومة ولكن الأغلبية مش بتظهر عليهم الأعراض وحتى ميعرفوش بوجود الجرثومة لأن مفيش أعراض خيرة بتظهر. إنما ظهور الأعراض الخطيرة ده بينبأ بتقدم المرض فى الخطورة وضوروة علاجه ومن أهم الآعراض دى:

آلام أعلى البطن فى حالة المعدة فارغة أو حتى بعد الآكل

شعور بالحموضة فى المرئ

لون البراز بيميل للون الإسود نتيجة تسببها فى قرحة

الغثيان و الشعور الدائم بيه وفي بعض الآحيان بيكون مصاحب بدم

الإسهال

رائحة نفس كريهة 

التجشؤ

الإنتفاخ الدائم

الإرهاق والضعف العام للجسم

هل الأعراض دى بتختلف بإختلاف العمر أو الجنس؟؟

-بعد أبحاث كتير على فئات عمرية مختلفة وعلى مرضى كتير طلع أن ظهور الأعراض بيكون واحد على كل الفئات العمرية سواء طفل أو شاب أو بالغ أو مسن. وكمان مفيش أى إختلاف بين الإصابة عن الرجال والنساء.

كل الأعراض واضحة وواحدة عند كل المرضى.

أسباب الإصابة بجرثومة المعدة:

الحقيقة إن أكتر الأسباب هى عادات صحية غير سليمة زى:

*عدم غسل اليدين بعد استعمال الحمام وطبعا أكل الطعام بدون غسله

*الإشتراك مع المصاب بالمرض في الأدوات اللى بيستخدمها في طعامه و برازه

*وجود المياه الملوثة والطعام الملوث طبعا وعشان كده معظم البلاد النامية بتكون فيها نسبة الإصابة بالمرض عالية جدا.

طيب أنا لو مصاب بالجرثومة إيه الأطعمة اللى اتجنبها؟؟

والعامل المشترك بين كل دول إن أنواع الأطعمة دى بتسبب تهيج لجدار المعدة اللى أصلا مصاب بسبب وجود الجرثومة، زى الحامضيات والبهارات الكتيرة فى الأكل وطبعا الخضروات لو مش مغسولة كويس لأنها عرضة إنها تكون حاملة للجرثومة أو أنواع تانية أشد خطورة وغيرهم زى ما ذكر.

مضاعفات المرض:

زى ام قولنا إن أغلب سكان العالم مصابين بالمرض ولكن متعايشين معاه ومش مكتشفينه ولكن تبدأ المضاعفات تظهر لما حالة المريض تتأخر وتكون الجرثومة نشيطة جدا وقتها فتأثيرها يكون مضاعف سواء على جدار المعدة أو التأثير العام على حالة الجسم، ومن ضمن المضاعفات دى الآتى:

  1. القرحات: طبعا دى من أشهر المضاعفات واللى بيحصل إن الجرثومة بتدمر بطانة المعدة فالسائل الحمضي بتاع المعدة يبدأ يسبب تآكل في جدار المعدة وبدوره يسبب القرحة. في أبحاث قالت إن حوالى 10% من المصابين بالجرثومة معرضين للقرحات.
  2. سرطان المعدة: ودى أسوء نتيجة للإصابة بالجرثومة وتأخير علاجها أو حتى الإكتشاف المتأخر ليها.

إمتى أبدأ أتجه للطبيب؟؟

طبعا ظهور أعراض غريبة ومؤلمة زى أعراض الجرثومة أو أعراض القرحة نتجه للطبيب عشان نبدأ الفحوصات.

ومن هنا في ملاحظة مهمة جدا إن ممكن يحصل إختلاط في التشخيص بين أعراض القرحة والجرثومة وعشان كده لما تظهر الأعراض اللى ذكرناها من الإحتياط إننا نعمل فحوصات الجرثومة والقرحة عشان نقدر بالظبط نحدد الإصابة بمين فيهم.

وصلنا لمرحلة تشخيص المرض ودلوقتى هنبدأ مرحلة الفحوصات وهى كالتالى:

أولا خلينا نتكلم عن الفحوصات العامة اللى بنعملها فى حالة ظهور آلآم فى المعدة أو الجهاز الهضمى عموما:

قبل الفحوصات لازم الطبيب المعالج ياخد معلوماته عن التاريخ المرضى للحالة بتاعته سواء كانت بتعانى من أى أمراض تانية أو ليها تاريخ مع الأعراض والمرض ه من زمان. ونبدأ أشهر فحوصات الجهاز الهمضى عموما وهى:

  •  فحص الدم
  • فحص عينة البراز أو البول
  • التصوير بالأشعة والموجات فوق الصوتية
  • صور الرنين المغناطيسي (MRI)

وبعد تحليل من دول فى حالة ظهور مؤشر للإصابة بالجرثومة تبدأ فحوصات تانية مخصصة ليها وهى كالآتى:

1-تحليل الدم

بناخد عينة من دم المريض و نكشف عن وجود الأجسام المضادة الخاصة بجرثومة المعدة، ببساطة لو دم المريض طلع فيه الجرثومة فالأجسام المضادة دى هتنبأ ن وجودها فى عينة الدم.

2-عمل اختبار التنفس (البولة التنفسية)

اللى بيحص إن المريض بياخد مشروب اليوريا ويبدأ ياخد شهيق عميق وبعده زفير عميق وفى حالة إصابته بتطلع النتيجة إن الجرثومة بتكون متحدة مع ثانى أكسيد الكربون اللى طالع من زفير المريض (اللى مندمج مع مشروب اليوريا) وهنا بنكتشف وجودها فى زفيره. يعنى إحنا بندور على الغاز المصاحب لزفير المريض عشان نعرف هى موجودة ولا لا.

3-فحص البراز

عينة من براز المريض بتتاخد ويبدأ عليها الفحص عشان نعرف الإصابة بالجرثومة، ده بيحصل إن فى حالة وجود الجرثومة الجسم والجهاز المناعى بيطلع أجسام مضادة وفى فحص البراز أو الدم بندور على الأجسام المضادة دى عشان نعرف الجرثومة موجودة ولا لا.

العلاج:

عادة الجرثومة بتكون مصاحبة لقرحة المعدة فبيتم علاج الجرثومة أولا وبعدها القرحة.

أول خطوة للعلاج هي تطبيق العلاج الثلاثي لمدة أسبوع واحد وده بيتكون من مجموعة مضادات حيوية أو مثبطات مضخة البروتون مثل أوميبرازول، ومضادات حيوية مثل كلاريثروميسين و أموكسيسيلين.

بعض المرضي بيكون في بكتيريا مضادة للمواد الحيوية دى وبيفشل معاهم العلاج فبنلجأ لما يسمى العلاج الرباعى ودى برضو مجموعة مضادات حيوية .

-بعض الأبحاث قالت إن تناول الشاى الأخضر والكركم والزنجبيل بيساهم فى العلاج وتناول أطعمة بتحتوى على مقاوم القرحات وإعادة بناء الجدار المخاطى للمعدة زى الكرنب.

هل يمكن التعايش مع جرثومة المعدة؟

يمكن التعايش معاه وده لو مكنش المرض وصل لحالاته المتأخرة والمزمنة (اللي بالطبع بتسبب سرطان المعدة) ولو تم الكشف عليه مبكرا وبدأ المريض في كورس العلاج ( الثلاثى أو الرباعى) بالإضافة لعادات أكل صحية بتساهم في سرعة الشفاء والقضاء عليها حتى لو أخدت وقت طويل. ومن ضمن العادات دى:

*البعد عن الكحوليات تماما والتدخين

*تناول الأكل المسلوق والتأكد من غسيل جيد للخضراوات

*عدم تناول الأكل المليان بهارات كتيرة والمخلالات

المصادر

1-https://www.sehatok.com/symptomsanddiseases/2017/1/30/%D9%87%D9%84-%D8%A3%D9%86%D8%A7-%D9%85%D8%B5%D8%A7%D8%A8-%D8%A8%D8%B3%D8%B1%D8%B7%D8%A7%D9%86-%D8%A7%D9%84%D9%85%D8%B9%D8%AF%D8%A9

2-https://www.webteb.com/multimedia/videos/%D8%AC%D8%B1%D8%AB%D9%88%D9%85%D8%A9-%D8%A7%D9%84%D9%85%D8%B9%D8%AF%D8%A9-%D8%A7%D9%87%D9%85-%D8%A7%D9%84%D8%AA%D9%81%D8%A7%D8%B5%D9%8A%D9%84

3-https://ar.wikipedia.org/wiki/%D9%85%D9%84%D9%88%D9%8A%D8%A9_%D8%A8%D9%88%D8%A7%D8%A8%D9%8A%D8%A9