أعراض جرثومة المعدة

1-ايه هي جرثومة المعدة أوH.Pylori  ؟ 

جرثومة المعدة هي مرض بيصيب معدة الإنسان; و هي عبارة عن بكتيريا معروفة باسم “بكتيريا الملوية البابية” و لها اسماء تانية زي “اللولبية البابية” و “الحلزونية البابية” Helicopacter Pylori . و هي بردو أحد مسببات القرحة الهضمية أو “قرحة المعدة و الاثني عشر” Peptic Ulcer Disease و أحد مسببات سرطان المعدة.

=< المعدة بطبيعتها بيوجد فيها أحماض و اللي بتساعد علي هضم الطعام و قتل البكتيريا ; لكن البكتيريا الحلزونية قدرت انها تتعايش في البيئة الحامضية دي لأنها بتمتلك مميزات متعددة .. زي مثلا انها بتنتج انزيم اسمه اليورياز urease و اللي بيساعد في حمايتها من الحمض المعدي ; و البكتيريا الحلزونية ايضا ليها القدرة انها تنتج اكتر من 1500بروتين و اللي بيساعدوها تكون خبيثة أكتر.

2-أعراض الإصابة بجرثومة المعدة؟

الجدير بالذكر إن 80% من المصابين بجرثومة المعدة مش بيعانوا من أي أعراض ; و ده لأن الإصابة بجرثومة المعدة في حد ذاته ملوش أي أعراض ;  إنما ظهور الأعراض بيكون سبب للإصابة بقرحة المعدة الناتجة عن الإصابة بجرثومة المعدة ; و احنا في أعراض.كوم هنعرفكم ايه هي الأعراض دي :

  • ألام في البطن أو حرقة “عادة بيستمر من شوية دقايق لساعات;  و عادة بيحصل بين وجبات الطعام و في منتصف الليل لما بتكون المعدة فارغة لزيادة نسبة الحموضة”.
  • انتفاخ في البطن “مع اسهال و امساك”.
  • فقدان الشهية.
  • كثرة التجشؤ.
  • فقدان الوزن بدون سبب محدد.
  • حمي و تعب و ارهاق شديد.
  • الغثيان”الشعور بالقيء” و ممكن توصل للقيء.
  • صعوبة في البلع.
  • شحوب الوجه.
  • فقر الدم “الأنيميا”.
  • رائحة فم كريهة.

*الضغط النفسي و التوتر يزيدان من الأعراض و لكنهما لايسببان الإصابة.

=< هل تختلف الأعراض عند النساء من الرجال أو الأطفال؟

الأعراض لا تختلف باختلاف الجنس أو السن ; و لكنها تختلف باختلاف درجة تطور المرض فقط.

3-أسباب الإصابة بجرثومة المعدة ؟

الأسباب ممكن تكون حاجات أو عادات سيئة بنعملها كل يوم و بنغفل عنها زي :

  • أكل الغذاء الملوث.
  • سوء التغذية.
  • الاكثار من الوجبات السريعة.
  • التواجد في الأماكن المزدحمة.
  • العدوي من شخص مصاب”عن طريق اللمس أو مشاركة الأدوات الشخصية”.
  • تربية الحيوانات الأليفة.
  • الاكثار من المشروبات الكحولية.
  • الاكثار من الأدوية المضادة للاكتئاب.

4-مضاعفات جرثومة المعدة؟

=< جرثومة المعدة ممكن تسبب حموضة المعدة و التهابات للأمعاء و انتشار السموم.

=< سرطان المعدة:

إهمال جرثومة المعدة يؤدي لسرطان المعدة .

=< الأنيميا و عدم قدرة الجسم علي امتصاص الحديد.

=< انسداد صمام القلب.

=< نزيف داخلي.

=< قرحة في المعدة و دي المرحلة الأولي من التهاب المعدة:

و ده لأن البكتيريا بتهاجم الطبقة المخاطية المبطنة للمعدة من الداخل فبتسبب تآكل فيه فبالتالي بيكون جدار المعدة معرض للانزيمات الهاضمة و الاحماض اللي بتتسبب في تآكل الأنسجة و ده بيؤدي للألم الحاد و أحيانا النزيف و قد يصل الأمر لثقب جدار المعدة.

=< انسداد في الجهاز الهضمي; مما يسبب إعاقة مرور الطعام في مساره الطبيعي.

=< السرطان في بعض الحالات.

***جرثومة المعدة وسرطان المعدة:

5-الفحوصات اللازمة لتشخيص مرض  جرثومة المعدة؟

  • المنظار

و ده اخر وسيلة للتشخيص ; يتم اجراءه بهدف النظر في بطانة المعدة بشكل مباشر عن طريق ادخال منظار من الفم للمعدة و الاثني عشر .. و لازم ننوه هنا ان الطبيب ممكن ياخد عينات من بطانة المعدة لفحصها تحت الميكروسكوب للبحث عن علامات تدل علي الاصابة.

  • اختبار الدم

من اسهل الاختبارات في الكشف عن الاجسام المضادة المتعلقة بالبكتيريا البابية ; لكن مش شرط تدل علي وجود البكتيريا .. قد تدل علي الاصابة بيها قبل كده.

  • الأشعة السينية أو المقطعية.
  • الكشف عبر النفخ.

و هنا بيصوم المريض ل 6 ساعات و يروح لأقرب مختبر و بيشرب محلول معين و بعدها بينفخ في كيس أو أنبوبة ; الاختبار بيعمل علي كشف الكربون المتكون بواسطة البكتيريا.

  • اختبار البراز.

بتتعمل للكشف عن وجود بروتينات البكتيريا في البراز ; لكنه مش بيوضح مدي شدة الإصابة بالعدوي.

6-من هم الأكثر عرضة للإصابة بجرثومة المعدة؟

جرثومة المعدة بتصيب حوالي ثلثين من الأشخاص في العالم ; و حوالي 10% منهم أطفال  و أكتر من 80% بالغين و كبار سن ; و يقال أن الاشخاص اللي بيحملوا فصيلة دم “O” هم أكتر عرضة للاصابة بجرثومة المعدة.

=< جرثومة المعدة و الحمل:

جرثومة المعدة ممكن تسبب التقيؤ الحملي”و اللي بيختلف عن غثيان الحمل” و ممكن تكون الاصابة مكتسبة من قبل الحمل و لكن البكتيريا تم تنشيطها بعد الحمل ; لان التغيرات الهرمونية و المناعية بتعمل علي تنشيط الكربونات البوابية الكامنة و ده بيأثر علي صحة الأم و الجنين.

=مخاطر جرثومة المعدة علي الأم.

-نقص التغذية.

-حدوث جروح في أعضاء الجسم.

-الموت.

=مخاطر جرثومة المعدة علي الجنين.

-نمو غير كاف.

-تشوه.

-الموت.

=< علاقة جرثومة المعدة بسرطان المعدة :

البكتيريا البوابية لما بتهاجم الطبقة المخاطية المبطنة للمعدة و اللي وظيفتها حماية المعدة من الأحماض ; المعدة بتتعرض للأحماض دي فبيحصل مضاعفات و بيوصل الموضوع للسرطان .

*أعراض سرطان المعدة:

-حرقة في المعدة.

-ألم و انتفاخ في البطن.

-غثيان و شعور بالقيء.

-فقدان الوزن بدون سبب محدد.

-الشعور بالشبع حتي بعد تناول كميات قليلة.

7-امتي لازم تروح للدكتور؟

اذا القرحة اللي اتكونت بسبب جرثومة المعدة تعرضت لنزيف “في المعدة أو الأمعاء” يجب زيارة الطبيب لأن الوضع بيكون خطر و محتاج التدخل الطبي فورا

و من أعراض نزيف القرحة:

  • ظهور البراز بلون اسود او احمر غامق أو ظهور دم في البراز.
  • مواجهة مشاكل في التنفس.
  • الشعور بالدوخة لحد يصل للاغماء.
  • ألم حاد في المعدة و استمراره لفترات طويلة.
  • وجود دم في القيء علي شكل حبيبات صغيرة.

8-نصائح مهم اتباعها:

-تجنب المشروبات الكحولية.

-الابتعاد عن التدخين.

-الابتعاد عن الأطعمة الحارة و الدسمة لأنها بتزود التهاب المعدة.

-تجنب المشروبات الغازية و اسبدالهال بالعصائر الطبيعية و الفواكه.

-تجنب مشاركة أدوات الطعام كالأكواب و الأطباق و الملاعق و الأدوات الشخصية مع الأخرين.

-استخدام الخل الأبيض في غسل الخضروات و الفواكه جيدا للتخلص من البكتيريا المعدية.

-تجنب العاجات الغذائية الخاطئة كالنفخ في الطعام مما يسبب انتقال المرض للطعام و منه إلي الشخص اللي هيتناول من الطبق بعدك و ده بيزود احتمالية اصابته بالعدوي.

9-ازاي تحمي طفلك من العدوي؟

  • الحرص علي غسل اليدين بالماء و الصابون قبل الأكل و خاصة بعد استعمال الحمام.
  • تنظيف الطعام وطهيه جيدا قبل الاكل.
  • الحرص علي شرب مياه نظيفة.

10-علاج جرثومة المعدة:

الجدير بالذكر ان المريض بيحس براحة بعد تناول الطعام و شرب اللبن لان اللبن معروف انه بيعالج حموضة المعدة .. لكنها بتكون راحة وقتية و بيرجع المريض يحس بالألم تاني .

لما بتزور الدكتور و بعد عمل الفحوصات المطلوبة و التأكد ان المريض مصاب بجرثومة المعدة بيبدأ الدكتور يوصف الادوية ليك علي حسب السن و الوزن ; و فيه نوعين من الأدوية هما مضادات الحموضة و المضادات الحيوية.

أ-مثبطات مضخة البروتون Proton Pump Inhibitors:

النوع دة من الأدوية بيشتغل علي انه يمنع المعدة من انها تنتج أحماضها و بيندرج تحتها الأنواع دي:

1-لانزوبرازول Lansoprasole

2-بانتوبرازول Pantoprasole

3-أوميبرازول Omeprazole

ب-ضادات أو حاصرات مستقبل الهستامين2H2 Antagonist:

و النوع دة من الأدوية بيشتغل علي انه يوقف تكوين الهستامين اللي بيحفز انتاج أحماض المعدة و بيندرج تحتها :

1-Ranitidine

2-Ciemetidine

ج-بسموث سبساليسيلات Bismuth Subsalicylate:

و النوع دة بيشتغل علي تغليف القرحة فبالتالي يمنع تأثير أحماض المعدة فيها.

فيه نوع تاني من العلاج ناس كتير بتلجأله ألا و هو :

العلاج بالأعشاب:

1-الشاي الأخضر.

الدراسات أظهرت أن الشاي الأخضر بيساعد علي قتل البكتيريا و يقلل شدة التهاب المعدة.

2-العسل.

العسل له تأثير مضاد للبكتيريا.

3-زيت الزيتون.

زيت الزيتون يمتلك قدرات مضادة للجراثيم.

4-عرق السوس.

يساعد علي قتل البكتيريا.

5-براعم البروكلي.

6-صبار الألوفيرا.

7-زيت الليمون.

11-اخر التطورات في علاج جرثومة المعدة:

=< المعالجة الضوئية:

في بعض الأحيان ممكن استخدام الأشعة فوق البنفسجية في القضاء علي البكتيريا الحلزونية داخل المعدة و ممكن تكون أكثر أمانا خصوصا لو العلاج بالمضادات الحيوية مش من ضمن خياراتنا .

12-المصادر:

1- https://mawdoo3.com/أعراض_جرثومة_المعدة_بالتفصيل

2- https://m.youm7.com/amp/2017/11/19/أعراض-جرثومة-المعدة-وتأثيرها-على-صحة-الجسم/3515597

3- https://mawdoo3.com/أعراض_جرثومة_المعدة_عند_الأطفال

4- https://www.altibbi.com/مصطلحات-طبية/الحمل-والولادة/جرثومة-المعدة-والحمل

5- https://www.wattan.tv/ar/news/234537.html

6- https://www.mobtada.com/details/749796

7- https://www.google.com/amp/s/m.youm7.com/amp/2019/1/12/%25D8%25A7%25D8%25B3%25D8%25A8%25D8%25A7%25D8%25A8-%25D8%25AC%25D8%25B1%25D8%25AB%25D9%2588%25D9%2585%25D8%25A9-%25D8%25A7%25D9%2584%25D9%2585%25D8%25B9%25D8%25AF%25D8%25A9-%25D9%2588%25D8%25B9%25D9%2584%25D8%25A7%25D8%25AC%25D9%2587%25D8%25A7/4100623

8- https://youtu.be/V_U6czbDHLE