أعراض تكيس المبايض و ازاى بييجي و ازاى بيروح 

((مش شرط أبدا ان تكون عصبيتك عادى ! و تأخر الدورة الشهرية طبيعي !! او ان تأخر التبويض نصيب !! لو مش عارفة تخسي مش دايما هيكون نتيجة لغبطة الدايت !!!

مش معنى الكلام اللى فوق دة ان لو عندك العرضين تلاتة دول يبقى عندك مصيبة بعد الشر !!!!! لا خالص ! بس لما نطمن على نفسنا أكيد هيكون أفضل .. لو بتظهر عليكي الأعراض دى قد يكون عندك حاجة اسمها تكيس مبايض .. و هنتكلم معاكى تحت فى كل حاجة خاصة بيه ….))

أعراض تكيس المبايض :

  • ايه هو تكيس المبايض ؟ (تكيس المبايض المتعددة)

طيب مبدأيًا مش مرض بالمعنى الحرفى ، هو(((متلازمة)))

يعنى ايه متلازمة ؟

يعنى مجموعة من العوامل او الأسباب اتكاتفت و فضلت تخبط فى بعضها لحد ماطلعتلى مرض ملموس له اعراض واضحة ، منه تكيس المبايض و متناولين أعراضه تحت بالتفصيل 

وهو عبارة عن أعراض بتظهرعند الإناث نتيجة للغبطة فى هرمونات الأنوثة ، منتشر بين النساء فى سن الإنجاب و بتسبب مشاكل فى غدتين المبيض ، زى وجود سماكة حوالين المبيض و بتمنع احيانًا خروج البويضات و كمان وجود اكياس داخل المبيض نفسه بتؤدي لانتفاخ و زيادة حجم المبيض.

  • ايه هوالمبيض و ايه وظيفته ؟ 

المبيضين (ovaries) ، هما زوج من الغدد الصماء – صماء يعنى بتفرز هرمونات و الهرمونات دى بتفرز فى الدم على طول مش محتاجة قنوات خاصة لنقل الهرمون ، و الهرمون دة بيلف مع الدم على كل الجسم ، و لكن بيبان تأثيره على اعضاء معينة بس ف الجسم و بيكون دة العضو المستهدف من الهرمون – و هما غدد تناسلية انثوية (موجودين عند الإناث بس) موجودين على جانبين الرحم فى آخر قناتين فالوب و حجمهم صغير الواحد فى حجم حبة اللوز.

ليهم كذا وظيفة :

1- إنتاج البويضات : بينتج كل مبيض عدد كبير من البويضات لكن بتتحرر بويضة واحدة بس من كل مبيض كل شهرين (يعني التبويض كل شهر بيكون بالتبادل بين المبيضين).

2- إفراز الهرمونات الجنسية الأنثوية : و هما هرمونين 

# هرمون الاستروجين : و دة بتفرزه حوصلة جراف ، و حوصلة جراف دي عبارة عن حصالة بتنمو فيها البويضة داخل المبيض ، و الهرمون دة هو المسئول عن ظهور الصفات الجنسية الثانوية عند البنت وقت البلوغ زى رفاعة الصوت و نمو الثدي و نمو الغدد اللبنية …… إلخ.

# هرمون البروجسترون : و دة بيفرز من تركيب اسمه الجسم الأصفر ، و دة بيتكون من بقايا حوصلة جراف بعد انفجارها و تحرر البويضة وقت التبويض ، و بتفرزه المشيمة اثناء الحمل بداية من الشهر الرابع بدل الجسم الأصفر و بيبدأ يدمر ، و دة مسئول عن انتظام الدورة الشهرية و مسئول عن نمو بطانة الرحم و زيادة الإمداد الدموى ليها – ازدياد الدم فى الاوعية الدموية الى فى جدار الرحم – و دة بيكون كل شهر استعداد لاستقبال جنين لو حصل إخصاب للبويضة و بيستمر لو حصل الحمل ، و لو محصلش حمل بتحصل الدورة الشهرية.

  • ايه بيحصل لما يصاب جسم الأنثي بتكيس المبايض ؟

زيادة السمك او التكيس الى بيكون حوالين المبيض بيخلى فيه صعوبة فى تحرر البويضة في معادها يعني بيمنع التبويض و دة بيأخر الدورة الشهرية و بالتالى هرمون البروجسترون مش بيفرز ، و نتيجة لإن محصلش تبويض جدار الرحم بيكون سميك نتيجة لتأخر الدورة الشهرية ، كل اللخبطة دى بتؤدى لحاجة بعد كدا اسمها زيادة الاندروجينات (هرمونات الذكورة) و دى بتسبب اعراض هنقولها بالتفصيل دلوقتى ….. 

أنواع فرعية للمرض :

  • و دى مش كلها تكيسات بالمعنى الواضح الى قولناه فوق ، بس بتبان على شكل تكيسات فى السونار:

1- التكيس الجلدانى Dermoid cyst :

و دة نمو مش طبيعى بيحصل فى المبيض و يعتبر نوع من أنواع الأورام ، بيبقى عبارة عن كيس موجود جوا المبيض بيحتوى على انسجة مختلفة من انسجة الجسم مش دة مكانها خالص زى الشعر و الجلد و الأسنان !

2- سرطان المبيض :

الأورام السرطانية كلها عبارة عن انقسام عشوائي غير طبيعي للمنطقة فى خلايا نسيج معين فبيزيد عدد الخلايا و بيظهر الورم ، و دة لما بيحصل فى المبيض فكتلة الخلايا المتورمة دى بتبان على شكل تكيس فى السونارفي المرحلة الأولى من الورم.

3- الكيس الوظيفى على المبيض :

زى ماقولنا فوق ان البويضة بتتكون و بتنمو فى حاجة شبه الحصالة اسمها حوصلة جراف موجودة جوا المبيض و الحوصلة دى بتنفجر وقت التبويض و بتتحرر البويضة و بيتكون من بقاياها الجسم الأصفر، أوقات بقة مش بتنفجر الحوصلة دى في معادها و بتفضل تكبر و تخزن جواها سوائل ، و فى الطبيعي بيختفي خلال 10 أسابيع من نفسه و دى حالة من الحالات الحميدة.

4- الحمل خارج الرحم :

و دة عبارة عن ان البويضة المخصبة – اللى بتديني جنين بعد عدد من الانقسامات و يبدأ يكمل نمو – بتنقسم و تنمو فى أماكن غير الرحم ، ممكن يكون فى قناة فالوب و ممكن يكون فى المبيض ، و دة بيظهر فى المراحل المبكرة منه على شكل تكيس مبايض.

المرض بييجي لمين و امتى بيكون أكثر حدة ؟

# طبعا المرض بيصيب الإناث بما ان غدتين المبيضين أعضاء انثوية ، فبيصيب النساء فى سن الانجاب (يعنى بداية من البلوغ و حتى سن اليأس) و دول بيختلفوا من انثى لغيرها ، يعنى سن البلوغ ممكن من سن 12 سنة لسن 18 سنة و سن اليأس من سن 45 سنة لسن 52 – بس النسبة الأكبر بتميل للسن الكبير يعنى قليل الى بتوصل لمرحلة اليأس دى ف سن 45 سنة لكن موجودة – و نسبته بين السيدات من 5 : ل 10 % (يعنى كل 100 ست ممكن يبقة منهم من 5 ل 10 واحدة عندها تكيس مبايض ).

# – السمنة من أهم الأسباب اللى بتخلى اعراض تكيس المبايض أكثر حدة و بيبقى علاجه أصعب نوعًا ما ، و فى نفس الوقت تكيس المبايض بيصعب عملية فقد الوزن (يعنى بينهم علاقة طردية كدا و مرتبطين ببعض)

 – بيكون اصعب فى السيدات الحوامل لأنه ممكن يوصل للإجهاض نتيجة للخبطة الهرمونات اللى بتقلل الإمداد الدموى بتاع الرحم و بيصعب عملية تغذية و نمو الجنين.

الأعراض العامة لتكيس المبايض : 

1- لخبطة فى الدورة الشهرية بسبب لخبطة الهرمونات طبعا.

2- زيادة دهون البشرة و ظهور حبوب الشباب على الوش 

3- زيادة شعر الوجه و الثدى و الفخذين و دة نتيجة لارتفاع هرمونات الذكورة.

4- ارتفاع هرمونات الذكورة بردو بتؤدي لتساقط شعرالرأس.

5- ظهور بقع غامقة فى الجلد و خصوصًا الرقبة و الإبطين.

6- مشاكل فى التبويض (يعنى البويضة مش بتتحرر من المبيض فى معادها).

7- زيادة فى الوزن و صعوبة فى فقدانه يعنى المريضة مش بتعرف تخس بسهولة.

8- الاكتئاب و العزلة و انعدام الثقة فى النفس.

9- آلام – و قد تكون حادة – فى منطقة الحوض على الجانبين (مكان المبيض).

10 الإمساك المتكرر (مش عرض دال او مرشد اوى لكنه بيوجد فى حالات كتير)

و لكن : فى أسباب مختلفة لنفس الأعراض  ….

*الأعراض مش دايما دلائل قاطعة !! لا مفر من التحاليل و السونار …*

# مثلا زى تأخر الدورة الشهرية : 

  • فى أسباب فسيولوجية طبيعية : ممكن يكون حمل أو رضاعة – أحيانا لخبطة هرمونات فترة الرضاعة بتأخر الدورة الشهرية – ممكن يكون السيدة وصلت لسن اليأس فالدورة الشهرية بتبدأ تتأخر (الطبيعى بتحصل كل 28 يوم طالما مفيش حمل او مشكلات و قرب سن اليأس الفترة دى بتزيد) و بعدين تنقطع.
  • ممكن بسبب علاج معين : منها تناول بعض الأدوية زى مضادات الإكتئاب وأدوية الحساسية و زى العلاج الكيمياوى لمرضى السرطان {عافانا الله و إياكم} ، ممكن كمان برشام منع الحمل يلخبط الدورة الشهرية.
  • ممكن كمان عوامل حياتية : زى الضغوطات العصبية و زى التمارين الرياضية العنيفة ممكن تلخبط الهرمونات الأنثوية و زى نقص الوزن بشكل عنيف (دايت تقيل و مش صح فالوزن بينزل بشكل كبير جدا مرة واحدة و دة مضر و بيلخبط الهرمونات).

# مثلا حاجة زى حبوب الشباب :

  • ممكن تظهر بسبب ضغوطات نفسية.
  • ممكن بسبب متلازمة كوشينج ( و دى بإختصار عبارة عن ان الجسم بيتعرض لمشاكل بتخليه يفرز كمية كبيرة جدا من هرمون معين ((الكورتيزول)) و دة بيسبب مشاكل كتيرة بعدين من أعراضها حبوب الشباب)
  • ممكن تظهر بسبب التغذية الغير سليمة (فى دراسات اثبتت ان المأكولات الدهنية و السعرات الحرارية العالية أوى بتزود حبوب الشباب).
  • فى أدوية و عقاقير معينة ممكن من آثارها الجانبية انها تطلع حبوب شباب و عادًة بيكون لها علاقة بالهرمونات.
  • ممكن مشكلة فى الهرمونات عمومًا أدت لعلو هرمون الذكورة فى الجسم لكن مش شرط خالص يكون تكيس مبايض.

# حاجة زى نمو الشعر فى الوجه و الجسم :

  • ممكن متلازمة كوشينج.
  • ممكن مشاكل فى الغدد الكظرية.
  • ممكن استخدام بعض الأدوية بردو.

# حاجة زى تساقط الشعر:

  • ممكن مشاكل فى الغدة الدرقية.
  • ممكن عوامل وراثية (و دة نسبة كبيرة من البنات)
  • ممكن الإصابة ببعض انواع الفطريات تؤدى لتساقط الشعر بكم كبير.
  • بعد الولادة بيكون فى فترة هرمونية عادية جدا بيقع فيها الشعر بغزارة.
  • تناول حبوب منع الحمل أحيانا بيعمل لخبطة هرمونات تؤدى لتساقط الشعر.

# البقع الداكنة على الجلد مثلا :

  • ممكن تكون حروق شمس للبشرات الحساسة.
  • ممكن تكون اصابة بفطريات و خصوصًا تحت الإبط.

# كمان ضعف أو عدم إنتظام التبويض :

  • ممكن عوامل وراثية (مشاكل فى العوامل الوراثية الى واصلة للحالة ف بتعملها مشاكل بتؤدى لضعف التبويض زى متلازمة تيرنر و متلازمة fragile X).
  • ممكن أمراض المناعة الذاتية (و دى أمراض الجسم فيها بيهاجم نفسه ، بمعني ان ربنا خالق ليك جهاز مناعة يدافع عنك و يهاجم الأمراض او الأجسام الغريبة ، ففى أوقات جهاز المناعة دة بيهاجم خلايا الجسم نفسه و دة ممكن يأثر على التبويض).
  • العلاج الكيمياوى بردو.
  • اضطرابات فى نظام الهضم و الأيض بتاع الجسم بيأثر على تصنيع الطاقة و تخزينها فى الجسم و بالتالى بيأثر على التبويض.

# زيادة الوزن بقة : و طبعا دة أسبابه لا تعد ولا تحصى 

  • عوامل وراثية و مشاكل فى الغدد و مشاكل نفسية و ………….. إلخ.

# الاضطرابات النفسية بقة زى الاكتئاب و العزلة :

  • مش معناه ابدأ ان عندك مرض ما ، أصلا كل ست او بنت قبل معاد الدورة الشهرية الخاص بيها بحوالى خمس او ست أيام بتكون متعصبة و متوترة جدا و نسبة الاوفر ثينكينج بتزيد و دة طبيعى نتيجة زيادة بعض الهرمونات الى بتيجي الدورة الشهرية تظبها تانى ، و بيكون معاها ف الفترة دى أعراض تانية ملحوظة زى آلام فى الثديين و وجع الجسم كله اكنه مصاب بكدمات و أرق و ارهاق و عطش و جوع غريبين جدا ، بردو بسبب لغبطة الهرمونات ماقبل الدورة الشهرية و دة طبيعي مايدلش ابدا انها أعراض تكيس مبايض.
  • ممكن تكون ضغوط شغل او دراسة او مشاكل عائلية عادى جدا.
  • ممكن بعض الأدوية تكون من آثارها الجانبية اضطرابات نفسية و فى بعض ادوية الجلد كدا.

# الآلام اللى فى منطقة الحوض :

  • هي مؤشر قوى أيوة ، انما مش دليل قاطع ابدًا لانها احيانا بتكون مؤشر لإلتهابات او مشكلةٍ ما فى القولون بردو ! مش أعراض تكيس مبايض اهو.

# الامساك المتكرر :

  • ممكن جدا تكون مشاكل قولون.
  • ممكن نتيجة للغبطة فى الأكل.
  • ممكن مؤشر لمشاكل فى الجهاز الهضمى ملوش علاقة بتكيس المبايض.

مشاركات حقيقية من مرضى لتكيسات المبايض ردًا على سؤال “عرفتى ازاى ان عندك مشكلة و ايه الأعراض اللى ظهرت عليكى خليتك تروحي تكشفي و تعرفى ان عندك تكيس مبايض؟!”

حالة (1) : 

“البريود الاول كانت بتتاخر وبتخن بسرعه ومهما اعمل دايت واحرم نفسى جسمى مش بينزل بل على العكس كنت بتخن من الهواء وشعرى بقى يقع بطريقه غريبه وبالخصله وكنت فاكره نقص فيتامينات وكده ودا غير شعر بيطلع فى جسمى بطريقه غريبه انا رجلى فى مرة كانت زى بتاعت الرجاله والله مش بهزر ومابقتش عارفه فين المشكله وبيجينى الم سوا ايام البريود او من غيرها اسفل بطنى وعرفت ازاى بقى انى عندى مشكله محتاجه دكتور ؟! ان البيريود مرة اتأخرت جامد حوالى شهرين او اكتر و بقة الموضوع ميتسكتش عليه .. و آة صح من أعراضها الاكتئاب انا كان عندى اكتئاب ومش حابه اخرج واقل حاجه بتعصبنى وازعل منها وفعلا من اعراضها الاكتئاب، فى الاخر روحت لدكتور والحمدلله الدكتور بقالى سنتين بتعالج وحاليا الحمد لله قربت اخف واول سته شهور من العلاج كانت مقرفه بالجد والست شهور التانيه وزنى نزل ١٠ وخاليا انا نزلت تقريبا ١٨ ك وفاضل ٨ ك بس والدكتور هيلغيلى العلاج”.

حالة (2) : 

“انا عملت عمليه للتكيسات لانها كانت تعبتنى جامد وكان من أعرضها عدم نزول دوره نهائيا تساقط شعر ظهور الشعر بسرعه فى الذقن والشنب فا يريت لو فعلا متأكد ان عندك تكيسات متتاخريش فى علاجه لأنها بتاثر عليكى بعد كدا لو حضرتك مش متجوزه لأن بسبب انى اتاخرت فى علاجها الدكتور شال ليا أنبوب لانى حجم الكيس كان كبر وسد الأنبوب ليا”

حالة (3) : 

“لخبطة في البريود وممكن متنزلش زيدت من عند الوسط والخصر اكتر حبوب الشباب حتي مع ان سنى مكنش صغير اوي وزيادة في الشعر في الذقن أو الوش”

حالة (4) :

“عرفت بيسبب تأخر ف البريود وممكن تقعد بال٦ شهور متجيش بس دا كان ف الفتره من ١٤ ل ١٧ سنه ولما بتيجي كانت بيبقا وجعها جامد جدا،غير ان بقا يطلعلي شعر ف دقني وضهري وبطني وحتت غريبه وكنت بخس بصعوبه جدا”

حالة (5) :

“تأخر الدوره الشهرية ممكن لسنه و ظهور شعر كتير ف جسمى و زيادة ف الوزن و تأخر ف الحمل”

حالة (6) :

“هو انا مطلعش عندي تكيس مبايض لكن الدكتور شخصه كدا فى الأول و هو كان قولون عصبي لكن بيوجعني فى منطقة اقرب لمكان المبيض اليمين ، و لما خدت علاج مبايض فى اسبوع متحسنتش عملت أشعة تليفزيونية و طلع التهابات قولون مش تكيس عالمبيض”

أسباب الاصابة بتكيس المبايض المتعددة :

زى ماقولنا فوق تكيس المبايض (متلازمة) يعنى الاصابة بيه و ظهوره بيعتمد على عدة عوامل مش سبب واحد بس. و عشان كدا احنا معندناش سبب قاطع يقول ان دة بيسبب تكيس مبايض 

و لكن له محفزات (حاجات بتساعد على الاصابة بيه) و له كمان بتزيد من حدة اعراضه …

# عوامل وراثية :

أحيانا بيكون فى سجل وراثى فى العايلة من جيل للى وراه بينقل لغبطة الهرمونات الى منها ممكن يكون ارتفاع هرمونات الذكورة (الاندورجينات) *لاحظوا انى مقولتش ان المرض نفسه وراثي لاننا زى ماقولنا فوق هو متلازمة – فالوراثة بتكون فى لغبطة الهرمونات مش المتلازمة نفسها) و اللغبطة دى بقة مع مساعدة حاجات تانية بيبدأ يظهر المرض.

# عوامل فسيولوجية :

  • زيادة افراز هرمون الانسولين او مقاومة الجسم له 

بص : الانسولين دة اصلا هرمون بيفزره البنكرياس مسئول عن ان الجلوكوز (السكر) مايزيدش عن نسبته الطبيعية فى الدم ، الانسولين دة لما بيحصل خلل او مرض ما فى البنكرياس ممكن تزيد نسبته أو ممكن يكون الجسم نفسه فى مشكلة ف تكون خلايا الجسم بتقاوم الانسولين الى متوجه ليها فبيضطر البنكرياس يفزر نسبة انسولين اكبر ؛ و فى الحالتين نسبة الانسولين بتزيد فى الدم ، و دة بيعمل لغبطة و ارتفاع فى هرمونات الذكورة و ممكن يعلى نسبة احتمال الاصابة بتكيس المبايض.

  • تناول ادوية الصرع : احيانا الادوية دى بتعمل لغبطة فى الهرمونات بردو ف بردو بتساعد على الاصابة بتكيس المبايض و ظهور اعراضه.
  • السمنة “تانى السمنة” !
  • اضطرابات الجهاز المناعة : بيكون فى مشكلة فى مناعة الجسم سواء بالضعف (يكون الجسم مناعته ضعيفة) او بالزيادة (أمراض مناعة ذاتية زى ماقولنا فوق) ، فى الحالتين دة ممكن يساعد على الاصابة بتكيس المبايض.

# أسباب نفسية :

بص عشان تكون الأمور واضحة ! أى مرض فى الحيااااااة هيكون فيه عامل نفسي !

و دة له تفسير بسيط : بيتحكم فى استقرار جسمك و ثباته جهازين أساسيين : الجهاز العصبي و الجهاز الهرمونى. 

اى ضغوط نفسية او عصبية ممكن بمنتهى السهولة تلغبط هرمونات جسمك بانها بتزود هرمون ايًا كان فى الهرمون دة معتمد عليه هرمون تانى .. هووووب الهرمونات كلها اتلغبطت !!!!

و بناءًا عليه العامل النفسي مهم جدا جدا جدا فى المساعدة على الاصابة بتكيس المبايض ….

# أطعمة بتزود حدة أعراض تكيس المبايض و المرض نفسه :

  • لسة قايلين فوق انه له علاقة بلغبطة الانسولين ، فطبعا السكريات الاوفر اللى بكميات كبيرة جدا دى و المأكولات الدهنية جدا جدا طبعا بتساعد على ظهور الأعراض بشكل أعنف.
  • اللحوم الحمراء اللى بكميات كبيرة ، بردو بتأثر على هرمونات الجسم.
  • الكافيين الزيادة (شاى و نسكافية و كابتشينو ….. إلخ) دة بيزود الاستروجين الى هو اصلا مش منتظم و فيه مشكلات ، فالمشكلة بتزيد.
  • الكحولات (دى دمار فى كل شئ مش بس أعراض تكيس المبايض).

تكيس المبايض له مراحل ؟؟

اة : أو مراحل لظهور أعراضه بمعنى أصح ..

و هما اربع مراحل :

  • اول مرحلة عبارة عن ان الجسم بيبدأ ياخد خطوات ناحية تكوين التكيس ، زى ماقولنا من شوية فى عوامل وراثية ! و العامل الوراثي بيجيلنا من ابوينا على هيئة جينات موجودة فى المادة الوراثية بتاعتنا ، فأول خطوة ان الجينات الى بتحفز لخبطة الهرمونات دى بتبدأ تشتغل.

بيكون فى نفس المرحلة عوامل تانية بتشجع الجينات زى السمنة مثلا !

  • بتبدأ اول خطوة فى ظهور الأعراض و هى زيادة (الاندروجينات) هرمونات الذكورة ، و كمان بتحصل مشاكل فى الأنسولين زى ماقولنا فوق بسبب لغبطة الهرمونات كلها فبردو الانسولين بيزيد و يتلغبط.
  • تبدأ تظهر أعراض ملموسة أكثر زى تأخر الدورة الشهرية بقة و ظهور حبوب الشباب على الوجه و الصدر ، و ممكن يتلاحظ زيادة الانسولين فى الدم.
  • الاضطرابات النفسية ! تبدأ بقة تيجي حالات الخنقة و تبدأ ثقة البنت او الست فى نفسها تقل و تبدأ تتخنق من أقل حاجة و الموضوع بيوصل لمراحل متقدمة من الاكتئاب لو اتسكت عليه.

سؤال جه فى بالك دلوقتى !!: معظم الأسباب اتقالت فى الأعراض اتقالت فى المراحل !!! هو ايه الى بيسبب التانى ؟؟ 

السؤال دة اجابته نقطتين :

أولًا : ان المرض دة زى ماقولنا من شوية انه متلازمة ملوش سبب محدد بعينه ، ف ممكن مرض تانى اصلا عند الست او البنت يساعد فى ظهور تكيس المبايض و سيظل دة مش مسبب أساسي له.

ثانيًا : و دة الأهم ، أى مرض فى الدنيا هو نار بتاكل فى جسم المريض (شفانا الله جميعًأ) 

انا ليه بقولك كدا ؟ عشان النار لو ملقيتش حاجة تاكل فيها هتطفي ! طول ما فى مادة بتعمل ك وقود للنار دى هتفضل والعة ، لا و كمان هتزيد أكتر !!

بنفس المنطق ! معظم الأمراض بتساعد على الاصابة بامراض غيرها و كل مالمرض بيزيد كل مال الاعراض بتزيد كل ما المسببات نفسها هتزيد و تتكاتف اكتر …

 “متسكتش على اى حاجة تحس بيها و لو دور برد”

مضاعفات تكيس المبايض :

يعنى لو المريضة سكتت عليه و فضل يزيد ايه هيحصل ؟؟ 

1- عقم : ممكن مشاكل التبويض بسبب انسداد المبايض يسبب انقطاع دائم فى التبويض و دة معناه عقم ، و كمان اضطرابات الهرمونات مش بتساعد الجسم على التبويض خالص فى الوضع دة لان الحالة اتأخرت.

2- السمنة : زى ماقولنا فوق السمنة بتساعد على تكيس المبايض و تكيس المبايض بيخلى فقدان الوزن صعب (علاقة طردية) ، فكل مالوزن بيزيد كل ما الوضع بيسوء اكتر.

3- الاصابة بمرض السكر : و طبعا دة نتيجة للغبطة هرمون الانسولين ف الحالة بيجيلها السكر و دة طبعا فى مراحل متقدمة من المرض.

4- تغيرات لون الجلد و ظهور بقع غامقة : طبعا احنا قولنا من الأعراض ظهور بقع على الوجه و الرقبة ، بس مع الإهمال بتبدأ البقع دى توسع و تغمق أكتر و بيكون علاجها أصعب.

5- تضرر القلب و الأوعية الدموية : نتيجة للغبطة هرمونات الجسم كله بالسكوت عالمرض لفترات طويلة مع ان تكيس المبايض اصلا بيعمل لغبطة فى التمثيل الغذائي ؛ بيأدى دة كله لارتفاع نسبة الدهون الثلاثية فى الجسم (الكوليسترول) و دة زيادته خطر جدا جدا على شرايين القلب.

6- ارتفاع ضغط الدم نتيجة لنفس اسباب مشاكل القلب (زيادة نسبة الدهون الثلاثية).

امتى اقلق و اضطر اروح لدكتور ؟!

مبدأيًا : زى ماقولنا فوق الاعراض بتتشابه مابين اكتر من مرض ، فمن فضلك متسكتيش على أى عرض مهما توقعتى انه بسيط !

و فى حاجات مينفعش نصبر عليها ابدا !!

  • زى تغير نسبة الانسولين و لغبطة درجات السكر فى الدم.
  • زى آلام الحوض أكتر من مرة.
  • زى تأخر الدورة الشهرية اكتر من مرة او فترات طويلة.

تشخيص المرض (يعنى الدكتور بيتأكد ازاى ان دى فعلا أعراض تكيس مبايض ؟!)

  1. الكشف : الدكتور بيكشف و بيبدأ يضغط على كذا منطقة فى البطن كلها عشان يتأكد ان الألم فى مكان المبايض بالظبط.
  2. التحاليل : و دى بتبقي تحاليل من عينة دم ، بتكون صورة دم كاملة و دهون ثلاثية و هرمونات طبعا ، ارتفاع هرمون الذكورة بيبان بوضوح فى التحاليل.
  3. السونار : و دة تقريبًا الدليل القاطع فيهم كلهم لان الدكتور بيشوف الكيس اللى على المبيض و بيقدر يحدد مكانه بدقة و بيحدد قطره و حجمه.
  4. التاريخ المرضى : هل المريضة جالها مشاكل قبل كدا بسبب لغبطة هرمونات ؟ هل المريضة اشتكت نفس الشكوات قبل كدا ؟ هل المريضة جالها مشكلة فى الجهاز التناسلى قبل كدا او تأخر فى الدورة الشهرية من فترة ؟؟ فى صعوبة فى فقدان وزنها ولا لا ؟؟؟
  5. التاريخ الوراثى : أحيانًا بيكون مؤشر قوى بيخلينا نعمل تحاليل و اشعة على تكيس المبايض قبل اى احتمال تانى.

الدكتور لو شخص المرض غلط هيحصل ايه ؟ و الغلط دة بييجى منين ؟؟

  • هيحصل المضاعفات الى اتكلمنا عنها فوق ، و لكن هيبان من خلال العلاج لو مفيش تحسن ياريت نغير الدكتور.
  • زى ماقولنا فوق ان الأعراض احيانًا بتتشابه مع أمراض تانية ، فلو الدكتور شخص الألم مثلا على انه قولون ! فهو المفروض يعمل أشعة للتأكيد.
  • لو دكتور الجلدية شخص حبوب الشباب على انها نتيجة استعمال مادة مضرة على البشرة ! طب ما ممكن نعمل تحاليل هرمونات للتأكيد.

المفاهيم الخاطئة عن تكيس المبايض :

“تكيس المبايض يعنى عقم !”

  • لا .. تكيس المبايض مشكلة بتمنع او بتأخر التبويض و بتتعالج عادى جدا خصوصا لو فى مراحل مبكرة منه.

“طالما ماما كان عندها يبقى انا هيجيلى !!”

  • لا مش شرط اطلاقا : اة العامل الوراثى بيساعد عالاصابة لكن مش شرط ولا لازم يجيلك

علاج تكيس المبايض:

اولًا : العلاج بالأدوية :

  •  فى دكاترة بتدي المرضى أدوية منع الحمل ، و دة مش غلط .. أصلا ادوية منع الحمل دى عبارة عن هرمونات انوثة بتاخدها الست طول الشهر عشان تخلى الرحم دايما فى حالة شبه الحمل ف يكون غير مستعد لاستقبال بويضة جديدة لكن فى نفس الوقت بتنظم الاباضة لانها بتدى الجسم هرمون الانوثة الى قد يكون متأثر و قالل بفعل تكيس المبايض ، و بيتاخد فى صورة برشام او اقماع مهبلية.
  • فى دكاترة بتدى السيدات المتزوجات منشطات و محفزات للاباضة (يعنى انتظام التبويض) و دة بيعالج مشكلة تأخر التبويض.
  • معظم الدكاترة بتدى انواع برشام عادية لتنظيم الدورة الشهرية ، يعنى دى بتكون ادوية مش مخصصة لتكيس المبايض لا دى للغبطة الدورة الشهرية عموما ، و بتكون فعالة فى المراحل الأولى من اعراض المرض.

ثانيًا : العلاج بالجراحة :

  • ممكن يكون عن طريق منظار مهبلى و دة هيساعد فى عملية التبويض (بنشيل الجزء السميك الى مانع تحرر البويضة).
  • ممكن عملية اسمها (كى المبيض) بيتشال فيها الجزء السميك الى على المبيض.
  • عمليات استئصال للأكياس الموجودة على المبيض لو حجمها كبير او عددها كتير و دى عملية عادية ببنج.
  • حاجة كمان اسمها ثقب المبيض و دى مش كبيرة اوى بس بتساعد البويضة فى التحرر.

ثالثا : العلاج ببعض السلوكيات (علاج من غير علاج) و طبعا فى المراحل الاولانية بس !

  • طبعااااا اتباع نظام غذائي سليم ، و دة هيقلل وزنك ف هيقلل تكيسات المبايض و هيقلل الكوليسترول ف هتتحسني.
  • الرياضة ، الرياضة هتظبط الدهون هتظبط وزنك هتساعد فى الحفاظ على ضغط الدم هتظبط الهرمونات و هتفيدك حتى فى نفسيتك
  • نقص الوزن (تانى و تالت و عاشر)
  • الابتعاد عن التدخين او الكحولات لانها بتدمر كل هرمونات الجسم بالتدريج.

رابعًا : بالأعشاب :

  • القرفة : من أهم الأعشاب اللى لها علاقة اصلا بتنظيم هرمونات الأنوثة و تنظيم الدورة الشهرية و بينصح بيها دايما فى فترة ماقبل الدورة الشهرية و فيها ذات نفسها.
  • النعناع : له دور فى علاج المشكلة ذات نفسها يعنى اثبت ان له دور فعال فى علاج تكيسات المبايض.
  • الليمون مع الكمون : دول اصلا ديتوكس طبيعي بيخلص الجسم من سموم كتير أوى و بيخلصك من الدهون الضارة ليكي و الى عادةً هيكون لها علاقة بتكيسات المبايض.
  • العرقسوس و البردقوش : الاتنين دول مفيدين جدًا لمرضى الضغط ، و لهم بردو دور شبه مباشر فى علاج تكيسات المبايض.
  • العسل : دة بقة حاجة جميلة جدا جدا جدا للمناعة فوق ماتتخيلوا دة غير انه قادر على ظبط سكر الجسم بشكل غريب رغم انه مسكر الا انه مفيد جدا.

كيفية الوقاية من مرض تكيس المبايض :

فى حاجات احنا مش هنقدر نمنعها ، زى مثلا لو واحدة عندها العامل الوراثى هو العامل الأقوى فى الاصابة بالمرض ! فمش هقدر اقلل العامل الوراثى .. لكن فى حاجات تانية اقدر اخد حذرى منها :

اولًا : التغذية السليمة (مش فاست فود و مسبك و زيوت مهدرجة طول الوقت).

ثانيًا : شرب المية (مهم جدا متستهوينيش) المية بتنظم كل ما تتخيليه و كل مالا تتخيليه فى جسمك حتى وزنك سواء بتزيدي او بتخسسي لازم تشربي مية ، 3 لتر على الأقل و بيزيدوا كل مابيزيد وزنك أو مجهود ، و خصوصا قرب فترة الدورة الشهرية.

ثالثًا : البعد قدر المستطاع عن التوتر و الضغوط العصبية ، زى ماقولنا قبل كدا الاضطرابات النفسية و العصبية بوابة لأمراض و مشاكل كتيرة احنا فى غنى عنها.

رابعًا : نمارس رياضة بنحبها مش شرط حاجة معينة المهم تكون الرياضة و الحركة و النشاط من أساسيات حياتنا.

خامسًا : لو ظهر و اتكرر او حتى قبل مايتكرر أى عرض من الأعراض الى اتكلمنا عنها دى نروح لدكتور فورا و نتابع لحد مانتأكد ان مبقاش فى آثار للمشكلة.

سادسًا : التقليل من شرب الكافيين كفاية فنجان واحد قهوة فى اليوم مش أكتر من كدا ، غلط كترها و الكافيين عموما من شاى و نسكافية و كدا بيسبب انيميا نقص الحديد بالوقت.

سابعًا : متابعة الكشف الدورى سواء بتحاليل الدم و السكر او بقياس الضغط او فحص شامل كل شىء و خصوصا لو فى سجل وراثى مرضى فى العايلة.

أمراض مرتبطة بتكيس المبايض :

  • مرض بطانة الرحم المهاجرة : و دة عبارة عن ان جزء من نسيج الرحم بينمو فى حتة غير الرحم زى على المبيض او فى قناة فالوب ، و دة عادةً بيكون له علاقة بتكيسات المبايض و حاجة منهم بتدل على التانية
  • طبعا السمنة : تكيس المبايض له علاقة قوية بالسمنة و الاتنين بيزيدوا سوا.
  • ارتفاع الكوليسترول : ليهم علاقة قوية ببعض و بردو بيزيدو مع بعض.
  • لغبطة الهرمونات : ممكن تكيس المبايض يجيب مشاكل فى الهرمونات و ممكن مشاكل الهرمونات تؤدى للاصابة بتكيس مبايض.

آخر الأبحاث فى متلازمة تكيس المبايض و أعراضها :

# فى دراسات بتقول ان ممارسة الرياضة 3 مرات اسبوعيًا كل مرة 30 دقيقة بانتظام بينزل الوزن و يساعد على قلة اعراض تكيس المبايض بنسبة كبيرة

# كمان فى دراسات اثبتت ان العلاج الطبيعى و بالأعشاب فعال و ممكن يغنى عن الأدوية.

المصادر : 

  1. https://www.mayoclinic.org/ar/diseases-conditions/pcos/symptoms-causes/syc-20353439
  2. https://www.mayoclinic.org/ar/diseases-conditions/pcos/drc-20353443
  3. https://www.marefa.org/مبيض
  4. https://www.moh.gov.sa/HealthAwareness/EducationalContent/wh/Pages/0014.aspx
  5. https://www.dailymedicalinfo.com/view-article/اعراض-تكيس-المبايض/
  6. https://ar.wikipedia.org/wiki/متلازمة_تكيس_المبايض#الأعراض
  7. https://www.dailymedicalinfo.com/view-article/تأخر-الدورة-الشهرية-اكتشفي-أهم-الاسبا/#section-2
  8. https://www.mayoclinic.org/ar/diseases-conditions/acne/symptoms-causes/syc-20368047
  9. https://www.mayoclinic.org/ar/diseases-conditions/cushing-syndrome/symptoms-causes/syc-20351310
  10. https://www.webteb.com/articles/اسباب-تساقط-الشعر-عند-النساء-الاسباب-الصحية_15109
  11. https://www.dailymedicalinfo.com/view-article/اسباب-ضعف-التبويض/
  12. https://www.dailymedicalinfo.com/view-article/12-سبب-خفي-وراء-زيادة-وزنك/
  13. https://www.dailymedicalinfo.com/view-article/اعراض-تكيس-المبايض/#section-6
  14. https://www.webteb.com/articles/علاج-تكيس-المبايض-بالاعشاب-هل-يساعد-حقا_1824
  15. https://ar.wikipedia.org/wiki/متلازمة_تكيس_المبايض#التشخيص