أنا حسس بألم بس مكسوف أروح للدكتور !!

البواسير أو ال hemorrhoids مرض منتشر جدا بين البشر، بعض الناس مبتصنفوش كمرض أصلا وبتعتبره أنه مجرد ألم مصاحب لعملية الأخراج وخلاص 

و للأسف فى مجتمعتنا الشرقية بعاداتها وتقاليدها فى ناس بتجد ثقل وكسوف من أنها تروح لدكتور لما تحس بلألم ده بسبب المكان اللى بيحس فيه بلألم وبالتالي ممكن الموضوع يتفاقم ويتحول من مجرد ألم لما هو أسوأ بكتير. بس قبل ما ندخل فى نقاش هو ألم ولا مرض حقيقي خليني أقولك يعني أيه بواسير ؟

البواسير هي تضخم فى الأوردة الموجوده فى المستقيم أو فتحة الشرج بسبب الضغط عليهم، و ده بيسبب حساسية وحكة وممكن تؤدي لنزيف؛ يعني خلل حصل فى حتة معينه فى الجسم وده يوضح لنا أن البواسير دي مرض مينفعش نستهين بيه.

البواسير في منها نوعين، الأول هو internal hemorrhoids و ده بيبقى موجود فى أعلى المستقيم وغالبا مبتحسش بأي ألم نتيجة أن الأعصاب فى الحتة دي قليلة و مبيبنش إلا لو حصل نزيف إثناء عملية الإخراج

الثاني هو extrnal hemorrhoids و ده النوع الشائع اللى بيوجع وممكن لو الحالة أتطورت برضه يحصل نزيف 

ممكن يحصل تضخم وتدلي للأوردة دي وتقفل ال anal sphincter – مجموعة العضلات عند فتحة الشرج اللى بتتحكم فى خروج البراز – وساعتها بتبقى متشافه وبتبقى شبه النسيج الطري ولونها بيبقى محمر . 

الأسباب غير معروفة أوي بس معظم الحالات اللى أصيبت بالموضوع ده كان بيحصل

١. ضغط فى المنطقة دي على الأوردة زي مثلا أن يكون عندك إمساك 

٢. واحدة تكون حامل والحمل هنا ممكن يأثر بكذا مؤثر 

A. زيادة الوزن بسبب الجنين اللى بيتكون بيعمل ضغط على المنطقة السفلية كلها ومن ضمنها الأوردة 

B. بيحصل مشاكل فى الهضم زي ما هو شائع فى وسط الستات الحوامل و ده بيخلي لأما الست تعاني من الإمساك أو الأسهل و ده برضه بيأثر على تكون البواسير 

٣. حد عنده زيادة فى الوزن أو حد بيشيل حاجات تقيلة 

٤. حد بيوقف ويقعد لفترات طويلة

٥. فى بعض الحالات بالوراثة، يعني بيلاقوا أن فى حد فى عيلة المريض عنده البواسير بس الأحتمال ده ضعيف شوية 

فكل الحاجات دي بتؤثر على تدفق الدم فى الأوردة اللى أصلا بيحتاج لحالة جسمية مرتاحه وأوردة مفيهاش أي نوع من ال tension وبالتالي لما يحصل عكس كده بتضخم وبيحصل مشكلة البواسير .

طب أمتى أحكم أني عندي بواسير أو لأ ؟ 

أعرض البواسير مميزة جدا وسهل تشخيصها أوي وهي 

١. نزيف إثناء عملية الأخراج 

٢. حساسية وإحساس بالحكة فى المنطقة نفسها 

٣. وجع عموما 

٤. إنتفاخ فى فتحة الشرج – اللى سبق وناقشنا سببه فوق – 

هل المرض أو أعراضة بيختلف حسب جنس المريض ؟ لأ إطلاقا الجنسين زي بعض وبيجيلهم بنفس الأسباب وبنفس المعدل 

طب لو أنا أكتشفت أن عندي بواسير أتصرف إزاي علشان أتخلص من الألم ده ؟ 

البواسير ممكن تتعالج بطريقتين 

أول واحده واللى متعارف عليها أكتر هي الطريقة الأسهل أو اللى بتتم فى البيت، عن طريق :

١. حمام ماء دافئ، تملى البانيو ماء دافئ وياريت يكون غويط وتقعد فيه من ١٠ دقايق لربع ساعة

ده أفضل وسيلة علاجية للبواسير ده زائد أنها بتخفف الألم جدا لو موجود ويفضل أنها تكون بعد قضاءك لحاجتك

٢. خل التفاح 

خل التفاح ده كويس جدا لأن مفعوله سريع فى تخفيف الألم والحكة بس أحذر من أستخدامه لفترات طويلة علشان ميعملش حرق فى الجلد 

٣. الصبار 

اللى أقصده هنا مش الجزء الأخضر فى الصبار، أنا أقصد المادة الجيلاتينية اللى فيه اللى أسمها aloe vera، دي ممكن تدهن مباشرة على المكان وليها مفعول ملحوظ لتهدئة الألم، بس مفيش أبحاث تؤكد فعاليتها لكنها كوسيلة فى حد ذاتها مش مؤذية 

٤. Witch hazel أو بندق الساحرة 

ده نبات عشبي ممكن تلاقيه فى الصيدليات الكبيرة لأنه مش متوفر أوي بسبب أنه موطنه أمريكا الشمالية و أوروبا؛ بيشتغل كمضاد إلتهابات طبيعي وبيقلل أعراض المرض لغايت ما يشفى لوحده ولكن برضه الأبحاث العلمية مدعمتش أستخدامه 

٥. قشور السيليوم 

ده بذور بتطحن على هيئة بودرة وبتدوب في الماء وتتأخد كجرعة ألياف علشان تساعد فى عملية الهضم وتحسن عملية الإخراج لأنها بتطري البراز وتخلي خروجه أسهل زيها زي باقي الألياف، و دي تعتبر وسيلة مساعدة للوسائل العلاجية اللى فوق 

بس فى تحذير الدكاترة قالوا عليه، لو بتأخد الألياف دي لازم تشرب كميات كبيرة من الماء ده زائد أنك متفرطش فى إستخدامها سواء بقى أستخدام بكميات كبيرة أو لفترات طويلة، لأنك لو أفرطت في الأستخدام ممكن تعملك غازات أو تقلصات فى المعدة

٦. حط أكياس تلج على المنطقة اللى حاسس فيها بلألم 

٧. حاول أن عملية الأخراج تتم تحت ضغط شديد منك 

٨. خلي دايما المكان نضيف قدر الإمكان 

فى برضه طريقة تانية تحت بند العلاج فى البيت بس الطريقة دي وقائية أكتر ما هي علاجية بس ده ميمنعش أنها مهمه جدا كوسيلة علاج، الموضوع بيتلخص فشوية تعليمات بيتبعهم المريض :

١. نأكل حاجات فيها ألياف زي الخضروات والفاكهة لأن الألياف سهلة الهضم وحركتها داخل الأمعاء أمرن وكمان بتساعد على تجميع الماء فى البراز وده بيلينه أو بيخليها soft أكتر ويخرج أسهل 

٢. نشرب مايه كتير، الماء بيساعد على عملية الإخراج ومبيخليش البراز متحجر فيبقى سهل فى خروجه ده زائد أن الماية بتمنع الجفاف اللى بيبقى أعرضه تعب برضه جايز يتشابه جزئيا مع أعرض البواسير 

٣. نلعب رياضه، الرياضه بتساعد على تلين العضلات فى كل الجسم بشكل مطلق وبالتالي ده يسهل على عضلات المستقيم وفتحة الشرج أنهم يؤدوا وظيفتهم 

٤. منتزنقش جامد فى الحمام لما نحس أننا عايزين ندخل الحمام لازم ندخل، كل ما تلبي نداء الطبيعة أسرع كل ما تقل المشاكل اللى ممكن تنتج عن عدم التلبية دي 

٥. التمرينات والرياضة 

الرياضة مهمه جدا لأنه بتسهل حركة الأمعاء الطبيعية وتحافظ على ليونة الفضلات و ده هو المطلوب 

٦. المسهلات أو الملينات 

الأدوية دي خطيرة جدا لأن معظمها بيعتمد على أنه ينشط حركة الأمعاء ويزود إنقباضها وإنبسطها علشان يسهل خروج وحركة الفضلات لخارج الجسم، فكل ما كان الملين قوي في شغله كل ما فرصة أن الموضوع يقلب بإسهال أو Diharrea تعلى وده بيزود معدل الإصابة بالبواسير، فلازم تأخد بالك من الملين اللى بتستخدمه وأسأل الدكتور قبل ما تستخدمه وخليه يوصفلك اللى بيشتغل مع جسمك مش اللى بيشتغل بداله 

الطريقة التانية وزي ما أكدت فى أول البوست أنك لازم تروح لدكتور علشان لو فى أى تطورات لا قدر الله يقدر يلحقها، ساعتها الدكتور بيبدأ فى ال physical examination ويبدأ يقرر ما إذا كان الموضوع هيستدعي التدخل الطبي ولا لأ.

ال physical examination بيتم عن طريق أنك تضم ركبتك لصدرك وتنام على جنبك ويبدأ الدكتور يفحص المكان 

والفحص بيتم بالطريقة دي علشان يتعرف هل اللى عندك external ولا internal 

وبعد ما يخلص الدكتور بيبدأ يحدد هيعالج أزاي.

التدخل الطبي بيبقي فى ٣ أشكال 

1. Sclero therapy : و دي بتتم عن طريق أن الدكتور يحقن مادة جوا الجزء المنتفخ يخليه ينكمش 

الطريقة دي أأمن طريقة فى التعامل ومبتتطلبش عملية جراحية ولا نزيف 

2. Rubber band ligation : و دي أشهرهم، بتبقى عبارة عن حاجة زي علاج الزوائد الجلدية فبيربط الدكتور ربطة حوالين الجزء المنتفخ علشان يحاصره كله فى مكان واحده ويمنع عنه وصول الدم فيموت أو أنه يشيله هو، الموضوع مش مؤلم إطلاقا و بيتم طبعا تحت تأثير المخدر 

3 . Surgical remover : و دي غالبا أخر طريقة ممكن يلجألها الدكتور لو الموضوع وصل لمرحلة مستعصية صعب حلها والشفاء منها بطريقة طبيعية وبتبقى شبه ال Rubber band فى حتة أنه بيشيل الجزء المنتفخ ويقطعه؛ الطريقة دي بتمنع تكوين البواسير من تاني 

الموضوع ممكن يتعالج فى البيت، ده زائد أن مش أي نزيف معناه أنك مصاب بالبواسير فى بعض الأمراض بتشبه البواسير فى الأعراض زي ال colorectal cancer و anal cancer ودول بيشبهوها فى حتة النزيف اللى بيحصل 

وعلشان تقدر تميز بينهم زياده أعراض ال colorectal cancer هي : 

١. دم فى البراز بيخليه لونه مسود 

٢. ليونه شديدة ” إسهال أو diarrhea ” 

٣. نزول فى الوزن 

٤. تعب وآلام فى الجسم 

٥. نقص فى الحديد 

والعلاج من ده بيبقى دوامة تانية من العلاج الإشعاعي أو الكيميائي وبيبقى ليه إحترازات تانيه خالص 

بس نيجي للسؤال الأهم؛ هل البواسير ممكن تؤدي لأمراض تانية زي ال cancer ؟ 

لأ، البواسير ملهاش علاقة بالسرطان بس ده ميمنعش أن كل ما الحالة أتأخرت كل ما بقى فى مضاعفات خطيرة زي مثلا :

١. الأنيميا : و دي نادرا ما بتحصل وبتكون نتيجة لو حصل نزيف شديد يؤدي لفقدان دم كتير يعمل أنيميا 

٢. أختناق فى المستقيم وده بيتم لو تدفق الدم إنقطع عن الأوردة المنتفخة دي، وده بيخلي الألم مضاعف 

وخلى بالك .. بالرغم من التشابه الشديد بين أعراض الشرخ الشرجي والبواسير إلا أن فى فرق الدكتور طبعا بيعرف منه والفرق هو المرض نفسه 

يعني البواسير عبارة عن إنتفاخ فى الأوردة، أما الشرخ الشرجي فهو قطع بسيط فى الأنسجة والأغشية المبطنه للشرج، والقطع ده طبعا بينتج عنه نفس النزيف ونفس الألم فعلشان كده لازم تروح للدكتور علشان متقعدش تعالج نفسك غلط و ميحصلش أي تحسن، بل فى حالات بيبقى صعب تتعالج وخصوصا لو عدى على إصابتهم بالشرخ لأكتر من ٨ أسابيع أو أن الشرخ يمتد للعضلات المجاورة و دي كارثة أكبر .

الشرخ ليه أسباب مختلفة عن البواسير زي 

١. إصابة فيروسيه بال HIV 

٢. مرور براز بكمية كبيرة 

٣. يكون الإنسان مولود بيه 

٤. مرض السل أو الزهري 

٥. سرطان الشرج أو anal cancer 

قبل ما نختم الدكاترة بيحذروا من موضوع مهم جدا وهي محاولة إخراجك للبواسير بنفسك 

فى بعض من الناس لما يتكون عندهم البواسير وتكبر و تكون زي كتلة بيحسوها أنهم عايزين يخرجوها أو يعملولها pop out فبيحاولوا أنهم يخرجوها زي ما بيخرج البراز فبيعملوا فحص لنفسهم بنفسهم، وده ليه نتائج خطيرة جدا منها أن ممكن الكتلة اللى عندك دي مش بواسير و تطلع سرطان و ده هيبقى الموضوع أصعب بكتير لو حصل أى جرح فى المنطقة.

ممكن كمان تعور نفسك وأنت بتحاول تخرجها و ده يخليك عرضه للإصابة بأي بكتريا موجودة فى المنطقة دي اللى ممكن تسبب 

– نزيف 

– صديد 

– إحمرار وحرارة فى المنطقة 

– حمى 

الموضوع ككل مؤلم جدا وهيزيد الألم عندك لو حاولت تقعد على حيلك.

لو حصل والبواسير فعلا خرجت فالمفروض أنك فى أسرع وقت تروح للدكتور علشان يلحق قبل ما يحصل أى تلوث لجرحك ولغايت ما تروح والدكتور يتصرف ننصحك بأنك تقعد فى حمام ماء دافئ لمدة تلت ساعة علشان يقلل الألم والنزيف وبعد ما تخلص تنشف المكان بفوطة ناشفة ونضيفة من غير كحت أو قشط فى المنطقة 

البواسير مرض دارج ومتعارف عليه أوي ومش خطير بس علشان متحسش بخطورته وعلشان ميأثرش بالسلب على حياتك لازم متهملوش، حاله كحال كل الأمراض الأهمال بيكبره وبيخرج بره السيطرة 

خليك ناصح وخلى بالك من نفسك وأوعى تتكسف من نفسك أو من مرضك، الطب دلوقتي أتقدم والتفكير والثقافة أختلفت فمتقفش أنت عند اللى واقف عنده أجدادنا اللى ممكن يأذينا ده زائد أن الدكاترة ياما شافوا وعدى عليهم حالات من مختلف الأشكال والأعمار ف مفيش أي داعي للحرج